15 ¹ Исроилнинг подшоҳи Йеробоам ҳукмронлигининг йигирма еттинчи йилида, Яҳудиянинг подшоҳи Амазийаҳнинг ўғли Азарийаҳ подшоҳ бўлди. ² У подшоҳ бўлганида ўн олти ёшда эди. У Йерусалимда эллик икки йил ҳукмронлик қилди. Унинг онасининг исми Йехолийаҳ бўлиб, у Йерусалимдан эди. ³ У ўз отаси Амазийаҳ каби барча нарсада Раббийнинг нигоҳида тўғри ишларни қилар эди. ⁴ Фақат тепаликлар йўқ қилинмаган эди. Халқ ҳамон тепаликларда қурбонликлар келтирар ва тутатқилар тутатар эди. ⁵ Раббий подшоҳни урди ва у ўлими кунларигача мохов бўлиб қолди, шунинг учун алоҳида уйда яшар эди. Подшоҳнинг ўғли Йотам сарой устидан ҳукмронлик қилар ва ернинг халқини бошқарар эди. ⁶ Азарийаҳнинг бошқа фаолияти ва унинг қилган барча ишлари Яҳудиянинг подшоҳлари йилномаси китобида ёзилган. ⁷ Азарийаҳ кўз юмиб, ўз оталарига қўшилди ва уни оталари ёнига, Довуднинг шаҳрида дафн этишди. Унинг ўрнига унинг ўғли Йотам подшоҳ бўлди. ⁸ Яҳудиянинг подшоҳи Азарийаҳ ҳукмронлигининг ўттиз саккизинчи йилида, Йеробоамнинг ўғли Закарийаҳ Самарияда Исроил устидан подшоҳ бўлди ва олти ой ҳукмронлик қилди. ⁹ Унинг оталари қилгани каби у Раббийнинг нигоҳида ёвуз ишларни қилар эди. У Исроилни гуноҳга ботирган Небат ўғли Йеробоамнинг гуноҳларидан чекинмас эди. ¹⁰ Шунда Йобэш ўғли Шаллум унга қарши фитна уюштирди, уни халқнинг олдида яралаб ўлдирди ва унинг ўрнига подшоҳ бўлди. ¹¹ Закарийаҳнинг бошқа ишлари Исроилнинг подшоҳлари йилномаси китобида ёзилган. ¹² Раббийнинг Йеҳуга: “Сенинг ўғилларинг тўртинчи авлодгача Исроилнинг тахтида ўтиради”,- деб айтган сўзи шундай эди. Бу амалга ошди. ¹³ Яҳудия подшоҳи Азарийаҳ ҳукмронлигининг ўттиз тўққизинчи йилида Йобэшнинг ўғли Шаллум подшоҳ бўлди ва у Самарияда бир ой ҳукмронлик қилди. ¹⁴ Чунки Гадининг ўғли Менаҳим Тирзаҳдан чиқиб, Самарияга келди ва Йобэшнинг ўғли Шаллумни Самарияда яралаб ўлдирди. Шундай қилиб, у унинг ўрнига подшоҳ бўлди. ¹⁵ Шаллумнинг бошқа ишлари ва у тузган фитнаси ҳақида Исроил подшоҳлари йилномаси китобида ёзилган. ¹⁶ Сўнг Менаҳим Тирзаҳдан бошлаб, то Типсах шаҳригача унинг чегараларида бўлган барча одамларни қириб ташлади, чунки улар унга дарвозани очмаган эдилар. Шунинг учун ҳам у шаҳарни вайрон қилди ва ундаги ҳомиладор хотинларни ёриб ташлади. ¹⁷ Яҳудиянинг подшоҳи Азарийаҳ ҳукмронлигининг ўттиз тўққизинчи йилида Гадининг ўғли Менаҳим Исроил устидан подшоҳ бўлди ва Самарияда ўн йил ҳукмронлик қилди. ¹⁸ У Раббийнинг нигоҳида ёвуз ишларни қилар эди: Исроилни гуноҳга ботирган Небат ўғли Йеробоамнинг гуноҳларидан ўз ҳаётининг барча кунларида чекинмас эди. ¹⁹ Шунда Ашурнинг подшоҳи Пул Исроил ерига келди. Менаҳим эса Пулга бир минг талант кумуш берди, токи унинг қўли у томонда бўлсин ва у шоҳликни ўз қўлида мустаҳкамласин. ²⁰ Менаҳим Ашурнинг подшоҳига бериш учун бу кумушни исроилликлардан, барча бой кишилардан, ҳар бир кишидан эллик шеқел кумушдан олди. Ашурнинг подшоҳи ортига қайтди ва у Исроилда қолмади. ²¹ Менаҳимнинг бошқа фаолияти ва унинг қилган барча ишлари Исроилнинг подшоҳлари йилномаси китобида ёзилган. ²² Менаҳим кўз юмиб, ўз оталарига қўшилди ва унинг ўрнига унинг ўғли Пекаҳийаҳ подшоҳ бўлди. ²³ Яҳудиянинг подшоҳи Азарийаҳ ҳукмронлигининг эллигинчи йилида Менаҳимнинг ўғли Пекаҳийаҳ Самарияда Исроил устидан подшоҳ бўлди ва икки йил ҳукмронлик қилди. ²⁴ У Раббий нигоҳида ёвуз ишларни қилар эди. У Исроилни гуноҳга ботирган Небат ўғли Йеробоамнинг гуноҳларидан чекинмас эди. ²⁵ Шунда унинг амалдори Ремалийаҳнинг ўғли Пекаҳ унга қарши фитна уюштирди. У эллик нафар гилъадлик кишини олиб, Самарияда, подшоҳ уйининг саройида Аргоб ва Орий билан бирга подшоҳни шикастлаб ўлдириб, унинг ўрнига подшоҳ бўлди. ²⁶ Пекаҳнинг бошқа фаолияти ва унинг қилган барча ишлари Исроилнинг подшоҳлари йилномаси китобида ёзилган. ²⁷ Яҳудиянинг подшоҳи Азарийаҳ ҳукмронлигининг эллик иккинчи йилида Ремалийаҳнинг ўғли Пекаҳ Самарияда Исроил устидан подшоҳ бўлди ва йигирма йил ҳукмронлик қилди. ²⁸ У Раббий нигоҳида ёвуз ишларни қилар эди. У Исроилни гуноҳга ботирган Небат ўғли Йеробоамнинг гуноҳларидан чекинмас эди. ²⁹ Исроилнинг подшоҳи Пекаҳнинг кунларида Ашурнинг подшоҳи Тиглатпилазар келиб, Ижонни, Абел‑Бей‑Маақаҳни, Йанохаҳни, Қедешни, Ҳазорни, Гилъадни, Галилени, Нафталининг бутун ерини босиб олди ва исроилликларни Ашурга кўчириб кетди. ³⁰ Элаҳнинг ўғли Ҳўшейаҳ эса Ремалийаҳнинг ўғли Пекаҳга қарши фитна уюштирди ва уни яралаб ўлдириб, унинг ўрнига подшоҳ бўлди. Бу воқеа Яҳудиянинг подшоҳи Ўззийаҳ ўғли Йотам ҳукмронлигининг йигирманчи йилида содир бўлди. ³¹ Пекаҳнинг бошқа фаолияти ва унинг барча қилган ишлари Исроилнинг подшоҳлари йилномаси китобида ёзилган. ³² Исроилнинг подшоҳи Ремалийаҳнинг ўғли Пекаҳ ҳукмронлигининг иккинчи йилида Яҳудиянинг подшоҳи Ўззийаҳнинг ўғли Йотам подшоҳ бўлди. ³³ У подшоҳ бўлганида, йигирма беш ёшда эди. У Йерусалимда ўн олти йил ҳукмронлик қилди. Унинг онасининг исми Йеруша бўлиб, у Садокнинг қизи эди. ³⁴ У Раббийнинг нигоҳида тўғри ишларни қилар эди. Унинг отаси ҳар соҳада қандай йўл тутган бўлса, у ҳам шундай йўл тутар эди. ³⁵ Фақат тепаликлар йўқ қилинмаган эди. Халқ ҳамон тепаликларда қурбонликлар келтирар ва тутатқилар тутатар эди. ³⁶ Йотамнинг бошқа фаолияти ва унинг қилган барча ишлари Яҳудия подшоҳлари йилномаси китобида ёзилган. ³⁷ Ўша кунларда Раббий Суриянинг подшоҳи Ретсинни ва Ремалийаҳнинг ўғли Пекаҳни Яҳудияга қарши юбора бошлади. ³⁸ Йотам кўз юмиб, ўз оталарига қўшилди ва ўз отаси Довуднинг шаҳрида, оталарининг ёнида дафн этилди. Унинг ўрнига унинг ўғли Ахаз подшоҳ бўлди.