14 ¹ Исроил подшоҳи Йеҳоахаз ўғли Йоаш ҳукмронлигининг иккинчи йилида Яҳудиянинг подшоҳи Йоашнинг ўғли Амазийаҳ подшоҳ бўлди. ² У подшоҳ бўлганида йигирма беш ёшда эди. У Йерусалимда йигирма тўққиз йил ҳукмронлик қилди. Унинг онасининг исми Йеҳоадден бўлиб, у йерусалимлик эди. ³ У Раббийнинг нигоҳида тўғри ишларни қилар эди, фақат унинг отаси Довуд каби эмас эди. У барча нарсада отаси Йоаш каби йўл тутар эди. ⁴ Фақат тепаликлар йўқ қилинмаган эди. Халқ ҳамон тепаликларда қурбонликлар келтирар ва тутатқи тутатар эди. ⁵ Унинг подшоҳлиги унинг қўлида мустаҳкамланганида, у подшоҳни – унинг отасини ўлдирган хизматкорларни ўлдирди. ⁶ Лекин Амазийаҳ қотилларнинг фарзандларини ўлдирмади, чунки Раббий амр этган Мусонинг қонуни китобида: “Оталар фарзандлари учун ўлим билан жазоланишлари керак эмас ва фарзандлар ҳам оталари учун ўлим билан жазоланишлари керак эмас, лекин ҳар бир киши ўзининг жинояти учун ўлим билан жазоланиши керак”,- деб ёзилган эди. ⁷ У ўн мингта эдўмликни Туз водийсида ўлдирди. У уруш қилиб, Селани қўлга киритди ва унинг номини Йоктеил, деб атади. Бу ҳозирги кунгача шундайдир. ⁸ Сўнг Амазийаҳ Исроил подшоҳи Йеҳунинг ўғли, Йеҳоахаз ўғли Йоашнинг олдига: “Чиқ, юзма‑юз учрашайлик”,- дейиш учун элчиларни юборди. ⁹ Исроил подшоҳи Йоаш Яҳудия подшоҳи Амазийаҳнинг олдига бундай дейиш учун одам юборди: “Лебанондаги тикан Лебанондаги кедрнинг олдига: Ўз қизингни менинг ўғлимга хотинликка бергин, деб хабар юборди. Лекин Лебанондаги йиртқич ҳайвонлар ўтиб, бу тиканни топтаб ташдилар. ¹⁰ Сен Эдўмни мағлуб қилдинг ва сенинг юрагинг мағрурланди. Бундан шарафлангин ва ўз уйингда ўтиргин. Ўзингга кулфат орттиришнинг нима кераги бор? Сен ва сен билан бирга Яҳудо ҳам қулайди”. ¹¹ Лекин Амазийаҳ қулоқ солмади. Шунинг учун Исроил подшоҳи Йоаш борди. У ҳамда Яҳудиянинг подшоҳи Амазийаҳ Яҳудиядаги Бейт-Шемешда юзма‑юз учрашдилар. ¹² Исроил Яҳудони мағлуб этди ва улар ўз чодирларига тарқаб кетдилар. ¹³ Шунда Исроилнинг подшоҳи Йоаш Яҳудиянинг подшоҳи Ахазийаҳ ўғли, Йоаш ўғли Амазийаҳни Бейт-Шемешда тутиб олди ва Йерусалимга бориб, Йерусалимнинг деворини Эфрайим дарвозасидан то бурчак дарвозасигача тўрт юз тирсак жойни вайрон қилди. ¹⁴ У Раббийнинг уйида, подшоҳнинг уйидаги хазиналардан топилган барча олтинларни, кумушларни ва барча идишларни, шунингдек, асирларни олиб, Самарияга қайтиб кетди. ¹⁵ Йоашнинг бошқа фаолияти, унинг қилган ишлари, унинг куч-қудрати, у Яҳудиянинг подшоҳи Амазийаҳ билан қандай жанг қилгани ҳақида Исроил подшоҳлари йилномаси китобида ёзилган. ¹⁶ Йоаш кўз юмиб, ўз оталарига қўшилди ва Самарияда Исроилнинг подшоҳлари билан бирга дафн этилди. Унинг ўрнига унинг ўғли Йеробоам подшоҳ бўлди. ¹⁷ Яҳудиянинг подшоҳи Йоаш ўғли Амазийаҳ Исроилнинг подшоҳи Йеҳохаз ўғли Йоашнинг ўлимидан сўнг ўн беш йил яшади. ¹⁸ Амазийаҳнинг бошқа ишлари Яҳудиянинг подшоҳлари йилномаси китобида ёзилган. ¹⁹ Унга қарши Йерусалимда фитна уюштирдилар ва у Лақишга қочиб кетди. Лекин унинг ортидан Лақишга одамларни юбордилар ва уни ўша ерда ўлдирдилар. ²⁰ Сўнг уни отларда олиб келдилар ва уни Йерусалимда, оталари ёнида Довуднинг шаҳрида дафн этдилар. ²¹ Яҳудиянинг бутун халқи ўн олти ёшли Азарийаҳни олиб, унинг отаси Амазийаҳнинг ўрнига подшоҳ қилдилар. ²² У Элатни қурди ва уни Яҳудияга қайтарди. Сўнг подшоҳ кўз юмиб, ўз оталарига қўшилди. ²³ Яҳудиянинг подшоҳи Йоаш ўғли Амазийаҳ ҳукмронлигининг ўн бешинчи йилида, Исроилнинг подшоҳи Йоашнинг ўғли Йеробоам Самарияда подшоҳ бўлди ва қирқ бир йил ҳукмронлик қилди. ²⁴ У Раббийнинг нигоҳида ёвуз ишларни қилар эди. У Исроилни гуноҳга ботирган Небат ўғли Йеробоамнинг барча гуноҳларидан чекинмас эди. ²⁵ Исроилнинг Раббий Худоси, Ўз қули Амиттай ўғли Йонаҳ, гиттаҳ-ҳеферлик пайғамбар орқали айтган сўзи бўйича у Исроилнинг чегараларини Ҳаматга кириш қисмидан саҳро денгизигача қайта тиклади. ²⁶ Чунки Раббий Исроилнинг ўта аччиқ кулфатини кўрди, зеро Исроилга ёрдам беришга қодир на қул, на озод қолган эди. ²⁷ Раббий само остидан Исроилнинг номини ўчириб ташлашни истамади ва уларни Йоаш ўғли Йеробоамнинг қўли билан қутқарди. ²⁸ Йеробоамнинг бошқа фаолияти, унинг қилган барча ишлари, унинг куч-қудрати, у қандай жанг қилиб, Яҳудияга тегишли Дамашқ ва Ҳаматни Исроилга қайтаргани ҳақида Исроилнинг подшоҳлари йилномаси китобида ёзилган. ²⁹ Йеробоам кўз юмиб, ўз оталарига, Исроилнинг подшоҳларига қўшилди. Унинг ўрнига унинг ўғли Закарийаҳ подшоҳ бўлди.