13 ¹ Яҳудиянинг подшоҳи Ахазийаҳнинг ўғли Йоаш ҳукмронлигининг йигирма учинчи йилида Самарияда Исроил устидан Йеҳунинг ўғли Йеҳоахаз подшоҳ бўлди ва у ўн етти йил ҳукмронлик қилди. ² У Раббийнинг нигоҳида ёвуз ишларни қилар эди. У Небат ўғли Йеробоамнинг Исроилни гуноҳга ботирган гуноҳларида юриб, улардан чекинмас эди. ³ Шунда Раббийнинг ғазаби Исроилга алангаланди ва У уларнинг барча кунларида уларни Суриянинг подшоҳи Ҳазаэлнинг қўлига ва Ҳазаэлнинг ўғли Бен-Ҳададнинг қўлига топширди. ⁴ Сўнг Йеҳоахаз Раббийнинг юзига ибодат қилди ва Раббий уни эшитди, чунки У Исроилнинг эзилишини ва Суриянинг подшоҳи уларни қандай эзаётганини кўрди. ⁵ Раббий исроилликларга қутқарувчини берди ва улар Суриянинг қўл остидан чиқди. Исроил ўғиллари худди олдингидек ўз чодирларида яшай бошладилар. ⁶ Бироқ улар Исроилни гуноҳга ботирган Йеробоам хонадонининг гуноҳларидан чекинмас, уларда юрар эдилар. Бунинг устига, Самарияда Аштарот бути турар эди. ⁷ Йеҳоахазнинг қўшинларидан фақат элликта отлиқ, ўнта арава ва ўн мингта яёв жангчи қолди, чунки Суриянинг подшоҳи уларни қириб ташлади ва уларни топталадиган тупроққа айлантирди. ⁸ Йеҳоахазнинг қолган фаолияти, унинг қилган барча ишлари ва куч-қудрати ҳақида Исроил подшоҳлари йилномаси китобида ёзилган. ⁹ Йеҳоахаз кўз юмиб, ўз оталарига қўшилди ва уни Самарияда дафн этдилар. Унинг ўрнига унинг ўғли Йоаш подшоҳ бўлди. ¹⁰ Яҳудиянинг подшоҳи Йоаш ҳукмронлигининг еттинчи йилида Самарияда Исроил устидан Йеҳоахазнинг ўғли Йоаш подшоҳ бўлди ва ўн олти йил подшоҳлик қилди. ¹¹ У Раббийнинг нигоҳида ёвуз ишларни қилар эди. У Исроилни гуноҳга ботирган Небат ўғли Йеробоамнинг барча гуноҳларидан чекинмас, уларда юрар эди. ¹² Йоашнинг қолган фаолияти, унинг қилган барча ишлари ва унинг куч-қудрати, унинг Яҳудия подшоҳи Амазийаҳ билан қандай жанг қилгани ҳақида Исроил подшоҳлари йилномаси китобида ёзилган. ¹³ Йоаш кўз юмиб, ўз оталарига қўшилди ва Йеробоам унинг тахтига ўтирди. Йоаш Самарияда Исроил подшоҳлари билан бирга дафн этилди. ¹⁴ Элиша касал бўлиб қолди ва шу касалликдан ўлди. Исроилнинг подшоҳи Йоаш унинг олдига келди ва унинг олдида йиғлаб: “Менинг отам, менинг отам, Исроилнинг араваси ва унинг отлиқлари!”- дер эди. ¹⁵ Элиша унга: “Камон ва камон ўқи ол”,- деди. У камон ва камон ўқларини олди. ¹⁶ Шунда у Исроил подшоҳига: “Қўлингни камонга қўй”,- деди. У қўлини қўйди ва Элиша ўз қўлини подшоҳ қўлининг устига қўйди. ¹⁷ Сўнг у: “Деразани шарқ томонга оч”,- деди. У очди. Шунда Элиша: “Ўқ от”,- деди. У ўқ отди. У: “Бу ўқ – Раббийнинг нажоти ва Суриядан қутулиш ўқидир, чунки сен сурияликларни тор-мор бўлгунларича, Афоқ шаҳрида қирғин қиласан”,- деди. ¹⁸ Элиша яна: “Ўқларни ол”,- деди. У олди. У Исроил подшоҳига: “Ерга ур”,- деди. У уч марта ерга урди ва тўхтади. ¹⁹ Худонинг одами ундан ғазабланиб: “Сен беш ёки олти марта уришинг керак эди, шунда сен сурияликларни буткул қириб ташлаган бўлар эдинг, энди эса сурияликларни фақат уч марта енгасан”,- деди. ²⁰ Элиша ўлди ва уни дафн этдилар. Кейинги йили ерга мўабликларнинг бир тўдаси келишди. ²¹ Шундай бўлдики, бир кишини дафн этаётганларида, бу бир тўда одамни кўриб, дафн этувчилар ўша кишини Элишанинг қабрига тушуриб юбордилар. У тушиб кетиб, Элишанинг суякларига тегиб кетди ва у тирилиб, ўз оёқларига турди. ²² Суриянинг подшоҳи Йеҳоахазнинг барча кунларида исроилликларни эзар эди. ²³ Лекин Раббийнинг уларга раҳми келиб, уларга шафқат қилди ва Иброҳим, Исҳоқ, Ёқуб билан тузган аҳди ҳақи уларга ўгирилди. Раббий уларни қириб ташлашни истамади ва улардан Ўз юзини ҳозиргача ўгирмади. ²⁴ Суриянинг подшоҳи Ҳазаэл ўлди ва унинг ўрнига унинг ўғли Бен-Ҳадад подшоҳ бўлди. ²⁵ Йеҳоахазнинг ўғли Йоаш эса ўз отасининг қўлидан уруш пайтида Ҳазаэлнинг ўғли Бен-Ҳадад томонидан тортиб олинган шаҳарларни Бен-Ҳададнинг қўлидан қайтариб олди. Йоаш уни уч марта мағлуб қилиб, Исроилнинг шаҳарларини қайтариб олди.