9 ¹ Муқаддасларга хизмат қилиш ҳақида сизларга ёзишим ортиқчадир. ² Чунки мен сизларнинг тиришқоқлигингизни биламан, шунинг учун ҳам: “Ахая аҳолиси ўтган йилдан бери тайёр”,- деб Македонияликлар олдида сизлар билан мақтаниб юрибман. Сизларнинг рашкингиз кўпларни ҳаракатга келтирди. ³ Шунинг учун мен биродарларни юбордим, токи бизнинг сизлар ҳақингиздаги мақтовимиз шу тариқа беҳуда бўлмасин, сизлар эса худди айтганимдай тайёр бўлинглар. ⁴ Яна агар Македонияликлар мен билан бирга бориб, сизларни тайёр бўлмаган ҳолда топсалар, унда биз (“сизлар” демаяпман) уятда қолмайлик, чунки биз шундай ишонч билан сизлар ҳақингизда мақтанган эдик. ⁵ Шунинг учун эълон қилинган эҳсонингиз мажбурий йиғиш эмас, балки ихтиёрий эҳсон сифатида бўлиши учун мен биродарлардан аввал олдингизга бориб, буни тайёрласинлар, деб илтимос қилиш кераклигини кўрдим. ⁶ Шуни айтиб қўяйки: хасислик билан экадиган хасислик билан ўриб олади, сахийлик билан экадиган эса сахийлик билан ўриб олади. ⁷ Ҳар ким қайғу ёки мажбурият билан эмас, балки юрак хоҳиши билан берсин, чунки Худо қувониб берувчини севади. ⁸ Сизлар ҳамиша ҳамма нарсада ҳар қандай қаноатга эга бўлиб, ҳар қандай хайрли ишларга бой бўлишингиз учун Худо сизларни ҳар қандай инояти билан бой қилишга қодир. ⁹ Ёзилганидек: “Сарфлаб, камбағалларга берди; унинг ҳақлиги абадий туради”. ¹⁰ Уруғ экувчига уруғ берадиган, озиқа учун эса нон берадиган Худо сизларнинг экканингизни ҳам мўл қилади ва ҳақлигингизнинг ҳосилларини ошириб юборади, ¹¹ токи сизлар ҳар қандай сахийлик учун ҳамма нарсада бой бўлинглар. Сахийлигингиз эса биз орқали Худога миннатдорчилик келтиради. ¹² Чунки бу хизматнинг ижро этилиши нафақат муқаддасларнинг эҳтиёжларини қондиради, балки кўпчилик томонидан Худога миннатдорчиликни мўл-кўл қилади. ¹³ Улар бу хизматингизнинг ишончлилигини кўриб, сизлар эътироф қилаётган Масиҳнинг Хушхабарига итоаткорлигингиз учун, ҳамда уларга ва ҳаммага нисбатан самимий саховатингиз учун Худони улуғлайдилар. ¹⁴ Шундай қилиб, улар сизларга кўнгил қўйиб, сизларда ошиб бораётган Худонинг инояти учун ибодат қилмоқдалар. ¹⁵ Худонинг тил билан ифодалаб бўлмайдиган инъоми учун Унга шукроналар бўлсин!