10 ¹ Энди мен – сизларнинг орангизда камтар, сизлардан узоқда эса сизларга нисбатан жасур бўлган Повул – Масиҳнинг мулойимлиги ва муруввати билан сизларга мурожаат қиламан: ² Сизлардан сўрайманки, мен олдингизга келиб, баъзиларингизга қарши ишлатмоқчи бўлган қатъий жасоратимни қўлламай. Чунки улар бизни тана изми бўйича ҳаракат қиляпти, деб ўйламоқдалар. ³ Ҳа, биз танада юрсак ҳам, тана изми бўйича жанг қилмаяпмиз. ⁴ Чунки жангимиздаги қуроллар танавий измига оид эмас, балки истеҳкомларни барбод қилиш учун Худо томонидан қудратлидир. ⁵ Булар билан Худони таниб билишга қарши кўтариладиган ҳар қандай хаёл ва кеккайишни йиқитамиз, ҳар қандай фикрни Масиҳга бўйсуниши учун асир қиламиз, ⁶ ва сизларнинг итоатингиз бажо бўлганида, ҳар қандай итоатсизликни жазолашга тайёрмиз. ⁷ Ташқи қиёфага қараяпсизларми? Ким ўзининг Масиҳники эканлигига амин бўлса, у ўзича буни англаб билсин: у қандай Масиҳники бўлса, биз ҳам худди шундай Масиҳникимиз. ⁸ Раббий бизга сизларни барбод қилиш учун эмас, балки барпо қилиш учун берган ҳокимият ҳақида мен янада кўпроқ мақтанганимда ҳам, уятда қолмас эдим. ⁹ Бироқ мактубларим билан сизларни қўрқитаётган одам бўлиб кўринмайин. ¹⁰ Чунки баъзилар: “У мактубларида қатъий ва кучли, лекин шахсан заиф ва сўзлари ҳам арзимас”,- деяптилар. ¹¹ Бундайлар шуни англаб билсинки, биз орангизда йўқлигимизда, мактубларимиздаги сўзларда қандай бўлсак, орангизда борлигимизда ҳам амалда худди шундаймиз. ¹² Ўзларини тавсия этаётган баъзилар билан биз ўзимизни тенг тутишга ёки солиштиришга журъат этмаймиз. Улар ақлсизларча ўзларини ўзлари билан ўлчаб, ўзларини ўзлари билан солиштирадилар. ¹³ Биз эса меъёрсиз мақтанмаймиз, лекин сизларга ҳам етиб боришимиз учун Худо бизга тайин этган меъёр бўйича, яъни улуш меъёрида мақтанамиз. ¹⁴ Биз гўё сизларга етиб бормагандай, ҳаддимиздан ошмаяпмиз, чунки сизларга ҳам Масиҳнинг Хушхабари билан етиб борганмиз. ¹⁵ Биз бошқаларнинг меҳнати билан меъёрсиз мақтанмаяпмиз, лекин сизларнинг имонингиз ўсиши билан сизларда ўз улушимизни мўл-кўл оширишга умид қиламиз, ¹⁶ токи бировнинг улушидаги тайёр ишлар билан мақтанмай, сизлардан узоқроқда ҳам Хушхабарни воизлик қилайлик. ¹⁷ Мақтанаётган эса Раббий билан мақтансин. ¹⁸ Ўзини ўзи мақтайдиган эмас, балки Раббий мақтайдиган одам мақтовга лойиқдир.