8 ¹ Энди, биродарлар, Македониядаги Жамоатларга берилган Худонинг инояти ҳақида сизларга билдириб қўймоқдамиз. ² Чунки улар азобларнинг шиддатли синовларида қувончга тўлиб тошмоқдалар, уларнинг ўта камбағаллиги эса уларнинг ҳимматининг бойлигига тўлиб тошмоқда. ³ Улар кучлари борича, ҳатто кучларидан ҳам ортиқ ихтиёрий берувчилар эканликларига мен гувоҳман. ⁴ Улар шу иноятни ва муқаддаслар учун хизматда иштирок этишларини қабул қилишимизни биздан кўп ўтиниб сўрадилар. ⁵ Боз устига, нафақат биз умид қилганимизни, балки улар ҳам олдин Раббийга, кейин эса Худонинг иродаси бўйича бизга ўзларини бағишладилар. ⁶ Шундай қилиб, Титус сизларда бу иноятни бошлаганидек, биз ундан буни охиригача етказишини илтимос қилдик. ⁷ Сизлар эса ҳамма нарсада: имонда, Сўзда, билимда, ҳар қандай ғайратда ва бизга бўлган севгингизда тўлиб тошганингиздек, бу иноятда ҳам тўлиб тошинглар. ⁸ Мен буни сизларга буйруқ сифатида айтмаяпман, лекин бошқаларнинг ғайрати билан севгингизнинг самимийлигини синаб кўряпман. ⁹ Чунки сизлар Раббимиз Исо Масиҳнинг иноятини биласизлар: У бой бўла туриб, сизлар учун камбағал бўлди, токи сизлар Унинг камбағаллиги туфайли бой бўлинглар. ¹⁰ Бу нарсада мен сизларга бир маслаҳат бераман, бу сизлар учун фойдали бўлади, чунки сизлар буни нафақат қила бошладингиз, балки ўтган йилдан бошлаб буни хоҳлаган эдингиз. ¹¹ Энди эса ғайрат билан бажармоқчи бўлган ишингизни борига яраша охиригача бажаринглар. ¹² Чунки агар ғайрат бўлса, унда бирор кишида йўғига қараб эмас, балки борига яраша қабул қилинади. ¹³ Бошқаларга енгиллик, сизларга эса оғирлик бўлиши эмас, балки тенглик бўлиши керак. ¹⁴ Ҳозир сизларнинг тўқчилигингиз уларнинг етишмовчилиги учундир, кейин эса уларнинг тўқчилиги сизларнинг етишмовчилигингиз учун бўлади, токи тенглик бўлсин. ¹⁵ Худди ёзилганидек: “Кимда кўп бўлса, ортиғи бўлмади; кимда оз бўлса, камчилиги бўлмади”. ¹⁶ Сизлар учун Титуснинг юрагига бундай ғайратни жо қилган Худога шукр! ¹⁷ Чунки Титус илтимосимни қабул қилган бўлса ҳам, лекин ўта ғайратли бўлиб, у сизларнинг олдингизга ўз ихтиёри билан борди. ¹⁸ Яна биз у билан бирга ҳамма Жамоатларда Хушхабар воизлиги учун мақталган биродарни юбордик. ¹⁹ Бунинг устига ўша биродар Жамоатлар томонидан бу иноят учун бизга йўлдош қилиб танланган. Бу иноят сизларнинг ғайратингиз бўйича биз орқали Раббийнинг шуҳратига хизмат қилмоқда. ²⁰ Бизга ишониб топширилаётган бундай мўл-кўлчилик туфайли биров бизни таъна қилмасин, деб эҳтиёт бўлмоқдамиз. ²¹ Чунки биз фақат Раббий олдидагина эмас, балки инсонлар олдида ҳам тўғри бўлишга ҳаракат қилмоқдамиз. ²² Шунинг учун кўп марта ва кўп нарсаларда ғайрати синалган бошқа бир биродаримизни улар билан бирга юбордик. Энди эса унинг сизларга ишончи комил бўлиб, ғайрати янада ошди. ²³ Титусга келсак, у менинг шеригим ва сизларга хизмат қиладиган ҳамкоримдир. Биродарларга келсак, улар Жамоатларнинг элчилари ва Масиҳнинг шуҳратидирлар. ²⁴ Шундай қилиб, Жамоатлар олдида буларга ўз севгингиз исботини ва сизлар ҳақингиздаги мақтовимиз тўғрилигини кўрсатинглар.