15 ¹ Довуд ўзига Довуд шаҳрида уйлар қурди ва Худонинг Аҳд Киботи учун жой тайёрлаб, у учун Чодир қилди. ² Сўнг Довуд: “Левитлардан бўлак ҳеч ким Худонинг Аҳд Киботини кўтариб юриши мумкин эмас, чунки Раббий уларни Худонинг Аҳд Киботини кўтариб юриш ва Унга абадий хизмат қилиш учун танлаган”,- деди. ³ Довуд Раббийнинг Аҳд Киботини унга тайёрлаган жойга олиб келиш учун бутун Исроилни Йерусалимга йиғди. ⁴ Довуд Аҳарўннинг ўғиллари ва левитларни чақирди: ⁵ Қэҳат ўғилларидан бошлиқ бўлган Уриэл ва унинг бир юз йигирма нафар биродарини, ⁶ Мерари ўғилларидан бошлиқ бўлган Асаҳийаҳ ва унинг икки юз йигирма нафар биродарини, ⁷ Гершом ўғилларидан бошлиқ бўлган Йўэл ва унинг бир юз ўттиз нафар биродарини, ⁸ Элизафан ўғилларидан бошлиқ бўлган Шемайаҳ ва унинг икки юз нафар биродарини, ⁹ Хеброн ўғилларидан бошлиқ бўлган Элиэл ва унинг саксон нафар биродарини, ¹⁰ Узиэл ўғилларидан бошлиқ бўлган Аминадаб ва унинг бир юз ўн икки нафар биродарини чақирди. ¹¹ Довуд руҳонийлар Садок ва Абиатарни, левитлар Уриэл, Асаҳийаҳ, Йўэл, Шемайаҳ, Элиэл ва Аминадабни чақириб, ¹² уларга деди: “Эй, левит авлодларининг бошлиқларисизлар, ўзларингизни ҳам, биродарларингизни ҳам покланглар ҳамда мен Исроилнинг Раббий Худосининг Киботи учун тайёрлаган жойга уни олиб келинглар. ¹³ Чунки олдинги сафар буни сизлар қилмаганингиз сабабли, биз Раббий Худойимизни излашимиз керак бўлганидек изламаганимиз учун У бизни шикастлади”. ¹⁴ Шундай қилиб, руҳонийлару левитлар Исроилнинг Раббий Худосининг Киботини олиб келиш учун ўзларини покладилар. ¹⁵ Раббийнинг сўзи бўйича Мусо амр этганидек, левитларнинг ўғиллари Худонинг Киботини елкаларида ходалар билан кўтариб бордилар. ¹⁶ Довуд левитларнинг бошлиқларига мусиқий асбоблар, ғижжаклар, қўбизлар ва жарангдор зиллар чалиб, баланд овозда қувонч садосини чиқариш учун қўшиқчиларни тайинлашни буюрди. ¹⁷ Шундай қилиб, левитлар Йўэлнинг ўғли Ҳеманни ва унинг биродарларидан Береқийаҳнинг ўғли Асафни, Мерари ўғилларидан эса Кушайаҳнинг ўғли Этанни тайинладилар. ¹⁸ Улар билан бирга иккинчи ўриндаги биродарлари: Закарийаҳ, Бен, Йаҳазиэл, Шемирамот, Йехиэл, Унни, Элиаб, Бенайаҳ, Маасейаҳ, Маттатийаҳ, Элифелеҳ, Микнейаҳни ҳамда дарвозабонлардан Обед-Эдом ва Йеҳиэлни тайинладилар. ¹⁹ Қўшиқчилар Ҳеман, Асаф ва Этан мис жарангдор зилларни баланд овозда чалишга тайинланган эдилар. ²⁰ Закарийаҳ, Азиэл, Шемирамот, Йехиэл, Унни, Элиаб, Маасейаҳ ва Бенайаҳ эса ингичка товушли ғижжакларни чалишга тайинландилар. ²¹ Маттатийаҳ, Элифелеҳ, Микнейаҳ, Обед-Эдом, Йеҳиэл ва Азазийаҳ кириш қисми учун қўбизларни чалишга тайинландилар. ²² Левитларнинг бошлиғи Хенанийаҳ эса ашула ўргатувчи бўлди, чунки у бунда моҳир эди. ²³ Береқийаҳ ва Элканаҳ Аҳд Киботи олдида дарвозабон эдилар. ²⁴ Руҳонийлар Шебанийаҳ, Йеҳошафат, Натаниэл, Амасай, Закарийаҳ, Бенайаҳ ва Элиэзер Худонинг Киботи қаршисида карнай чаладиган бўлдилар. Обед-Эдом ва Йеҳийаҳ эса Киботи олдида дарвозабон эдилар. ²⁵ Шундай қилиб, Довуд ва Исроилнинг оқсоқоллару мингбошилари Раббийнинг Аҳд Киботини Обед-Эдомнинг уйидан тантана билан олиб келишга кетдилар. ²⁶ Раббийнинг Аҳд Киботини кўтараётган левитларга Худо ёрдам берганида, улар еттита бузоқ ва еттита қўчқорни қурбонликка келтирдилар. ²⁷ Довуд ва Аҳд Киботини кўтараётган левитларнинг барчаси, ашулачилар, мусиқачилар ва ашулачиларнинг бошлиғи Хенанийаҳ зиғир матосидан кийим кийган эдилар. Довуднинг эгнида эса зиғир толали эфод ҳам бор эди. ²⁸ Шундай қилиб, бутун Исроил Раббийнинг Аҳд Киботини бурғу, карнайлар, жарангдор зиллар, ғижжаклар ва қўбизлар чалиб ҳайқириқлар билан олиб келдилар. ²⁹ Раббийнинг Аҳд Киботи Довуд шаҳрига кириб келганида, Шоулнинг қизи Микал деразадан қараб, подшоҳ Довуднинг сакраётганини ва рақсга тушаётганини кўриб, ўз юрагида уни пастга урди.