16 ¹ Улар Худонинг Киботини Йерусалимга олиб келдилар. Довуд Киботни унинг учун қурган Чодирнинг ўртасига қўйдилар. Сўнгра Худога тамоман ёндириш қурбонликлари ва тинчлик қурбонликлари келтирдилар. ² Довуд тамоман ёндириш ва тинчлик қурбонликларини келтиришни тамомлаганида, Раббийнинг номи билан халқни дуо қилди. ³ У ҳар бир исроилликка: эркакларга ҳам, аёлларга ҳам бир донадан нон, бир бурдадан гўшт ҳамда майизли кулча тарқатди. ⁴ У Исроилнинг Раббий Худосини шарафлаш, миннатдорчилик билдириш, улуғлаш учун левитлардан баъзиларини Раббийнинг Аҳд Киботи қаршисига хизматга қўйди: ⁵ Асафни бошлиқ қилиб, ундан кейин Закарийаҳ, Йеҳиэл, Шемирамот, Йехиэл, Маттатийаҳ, Элиаб, Бенайаҳ ва Обед-Эдомни қўйди. Йеҳиэлни, ғижжаклар ва қўбизлар чалиш, Асафни эса жарангдор зиллар чалишга қўйди. ⁶ Руҳонийлар Бенайаҳ ва Йаҳазиэлни Худонинг Аҳд Киботи қаршисида доимо бурғу чалишлари учун қўйди. ⁷ Ўша куни Довуд биринчи бор Асаф ва унинг биродарларига Раббийни шарафлаш учун ушбу санони берди: ⁸ “Раббийни шарафланглар! Унинг номини чорланглар! Халқларда Унинг ишларини эълон қилинглар! ⁹ Унга куйланглар, Унга санолар куйланглар! Унинг барча мўъжизаларини сўзлаб беринглар! ¹⁰ Унинг муқаддас номи билан мақтанинглар! Раббийни изловчиларнинг юраклари қувонсин! ¹¹ Раббийни ва Унинг кучини изланглар, Унинг юзини доимо изланглар. ¹² Унинг қилган мўъжизаларини, Унинг аломатларини ва Унинг оғзидан чиқаётган ҳукмларини ёдда тутинглар, ¹³ эй, Исроилнинг уруғи, Худонинг қуллари, Ёқубнинг ўғиллари ва Унинг танланганлари! ¹⁴ У – бизнинг Раббий Худойимиздир, Унинг ҳукмлари бутун ер узрадир. ¹⁵ Буларни ёдда тутинглар: Унинг аҳдини, Унинг минг авлодларга амр қилган сўзини, ¹⁶ Унинг Иброҳимга ваъда қилган ва Исҳоқка қасам ичган васиятини, ¹⁷ Унинг Ёқубга қонун сифатида тайинлаган, Исроилга абадий аҳд қилиб қўйган, ¹⁸ “Канъан ерини сизларга меросий улуш қилиб бераман”, деб айтган ваъдасини. ¹⁹ Исроилликлар ўша пайтда кам сонли ва жуда ҳам кам бўлганларида, ҳали Канъан ерида мусофир бўлганларида, ²⁰ бир халқдан бошқа халққа ва бир шоҳликдан бошқа халққа кўчиб юрар эдилар. ²¹ Бироқ Раббий ҳеч кимга уларни хафа қилишларига йўл қўймас ва улар ҳақида подшоҳларга шундай танбеҳ берар эди: ²² “Менинг мойланган одамларимга тегманглар ва Менинг пайғамбарларимга ёвузлик қилманглар”. ²³ Эй, бутун ер, Раббийга куйланглар, Унинг нажотини кундан кунга воизлик қилинглар! ²⁴ Мажусийларга Унинг шуҳратини, барча халқларга Унинг мўъжизаларини эълон қилинглар! ²⁵ Чунки Раббий буюк, У кўп мақтовларга сазовордир! У барча худолардан кўра даҳшатлироқдир! ²⁶ Зеро халқларнинг барча худолари бутлардир, Раббий эса самоларни яратган. ²⁷ Шараф ва улуғворлик Унинг юзи қаршисида, қудрат ва қувонч Унинг масканидадир! ²⁸ Раббийни шарафланглар, эй, халқларнинг қабилалари, Раббийни шуҳрати ва қудрати учун шарафланглар! ²⁹ Раббий номининг шуҳратини шарафланглар! Қурбонликни олиб, Унинг қаршисига боринглар. Раббийга Унинг муқаддасворлигининг гўзаллигида сажда қилинглар. ³⁰ Эй, бутун ер, Унинг қаршисида титрагин, чунки У борлиқни мустаҳкам ўрнатди, у тебранмайди. ³¹ Осмонлар қувонсин, ер тантана қилсин! Халқлар орасида: “Раббий ҳукм сурмоқда!”- десинлар. ³² Денгиз ва уни тўлдириб турган нарсалар ҳайқирсин! Дала ва ундаги ҳамма нарса қувонсин! ³³ Барча ўрмон дарахтлари Раббийнинг юзи қаршисида ҳайқирсинлар, чунки У оламни ҳукм қилиш учун келмоқда. ³⁴ Раббийга ташаккур айтинглар, чунки У эзгу ва Унинг шафқати абадийдир! ³⁵ Бундай денглар: “Эй, бизнинг Нажоткоримиз Худо, бизни қутқаргин! Бизни йиғиб олгин ва халқлардан халос қилгин, токи биз Сенинг муқаддас номингга ташаккур айтайлик ва Сенинг шуҳратинг билан мақтанайлик! ³⁶ Раббий Исроилнинг Худоси абадулабад муборакдир!” Шунда бутун халқ: “Омин, Раббийга ҳамдлар бўлсин!”- деди. ³⁷ Раббийнинг Аҳд Киботи қаршисида доимо, ҳар куни хизмат қилиш учун Довуд Аҳд Киботи олдида Асаф ва унинг биродарларини, ³⁸ Обед-Эдом ва унинг биродарларини, жами олтмиш саккиз кишини қолдирди. Йедутуннинг ўғли Обед-Эдом ва Ҳосаҳни эса дарвозабон қилиб тайинлади. ³⁹ Руҳоний Садок ва унинг руҳоний биродарларини эса Гибъўндаги тепаликда бўлган Раббийнинг Чодири олдига қўйди, ⁴⁰ токи улар тамоман ёндириш қурбонгоҳида Раббийга доимо (эрталаб ва кечқурун) тамоман ёндириш қурбонлиги келтирсинлар ҳамда Раббий Исроилга амр этган Унинг қонунида ёзилган ҳамма нарсани бажарсинлар. ⁴¹ Улар билан бирга Ҳеман, Йедутун ва номма-ном тайинланган бошқа танланган кишиларни Раббийни шарафлаш учун тайинлади, чунки Унинг шафқати абадийдир! ⁴² Уларнинг ёнида Ҳеман ва Йедутун карнайлар, жарангдор зиллар ҳамда ҳар хил мусиқали асбоблар чалиб, Худони шарафлар эдилар. Йедутуннинг ўғилларини эса дарвозабон қилиб қўйди. ⁴³ Сўнгра бутун халқнинг ҳар бири ўзининг уйига кетди. Довуд ҳам ўз уйини дуо қилиш учун ортига қайтди.