14 ¹ Тир подшоҳи Хирам, Довудга уй қуриш учун унинг олдига элчиларни, кедр дарахтларини, тош йўнувчиларни ҳамда дурадгорларни юборди. ² Довуд Раббий уни Исроил устидан подшоҳ қилиб мустаҳкамлаганини ва Унинг халқи Исроил ҳақи унинг подшоҳлиги баланд кўтарилганини англаб етди. ³ Шунда Довуд Йерусалимда яна кўп хотин олди. Довуддан яна кўп ўғил ва қизлар туғилди. ⁴ Мана булар ― Йерусалимда ундан туғилган болаларининг исмлари: Шаммуайаҳ, Шобаб, Натан, Сулаймон, ⁵ Ибҳар, Элишуа, Элифелет, ⁶ Ногаҳ, Нефег, Йафийаҳ, ⁷ Элишама, Беэлиада ва Элифалет. ⁸ Пелиштликлар Довудни бутун Исроил устидан подшоҳликка мойланганини эшитганларида, барча пелиштликлар Довудни излаш учун кўтарилдилар. Довуд бу ҳақида эшитиб, уларга қарши борди. ⁹ Пелиштликлар келиб, Рафаликлар водийсида жойлашдилар. ¹⁰ Довуд Раббийдан сўраб: “Мен пелиштликларга қарши борайми? Сен уларни менинг қўлларимга топширасанми?”- деди. Раббий унга: “Боргин ва Мен уларни сенинг қўлларингга топшираман”,- деди. ¹¹ Шундай қилиб, улар Баал-Перазимга бордилар ва ўша ерда Довуд уларни қириб ташлади. Довуд: “Сув ёриб ўтганидек, Раббий менинг қўлим билан душманларимни синдирди”,- деди. Шунинг учун ҳам улар ўша жойни “Баал-Перазим”, деб номладилар. ¹² Пелиштликлар ўша ерда ўз худоларини қолдирдилар, Довуд буйруқ берди ва улар оловда ёндирилди. ¹³ Пелиштликлар яна келиб, водий бўйлаб жойлашдилар. ¹⁴ Довуд Худодан яна сўради ва Худо унга деди: “Уларга тўғри бормагин. Уларни четлаб ўтиб, уларга тутзор томондан боргин. ¹⁵ Тутзор тепасида қадам товушларини эшитганингда, ўшанда жангга отлангин, чунки Худо пелиштликларнинг қўшинини қириб ташлаш учун сендан олдинда бораётган бўлади”. ¹⁶ Довуд, Худо унга буюрганидек қилди ва улар пелиштликларнинг қўшинини Гибъўндан Газергача қириб ташладилар. ¹⁷ Довуднинг номи барча юртлар бўйлаб тарқалди ва Раббий уни барча халқлар учун даҳшатли қилди.