18

¹ Собере мон адӟи инмысь васькемзэ мукетызлэсь ангеллэсь. Солэн вал быдӟым властез. Музъем югыттэмын вал солэн данэныз.

² Со кеськиз кужмо куараен: " Куашказ, куашказ быдӟым азыса-калгыса улӥсь - Вавилон! Со луиз демонъёслэн улон интызы, котькыӵе нечистой(кырсь) духъёслэн люкаськон интызы, карзы котькыӵе юрӟым но урод тылобурдоослы. Уго азон-калгонлэн лек винаеныз со кудӟытӥз вань калыкъёсты.

³ Музъем вылысь царъёс калгизы соин, но музъем вылысь вузкарисьёс узырмизы солэн бадӟым узырлыкеныз.

⁴ Собере мон кылӥ инмысь мукет куара, кудӥз вера: "Мынам калыке, палэнскы со дорысь, солэн сьӧлыко ужъёсаз эн пырӥськы, солэсь курадӟёнзэ медам адӟёно луы шуыса.

⁵ Уго солэн сьӧлыкъёсыз инмозь вуизы, но Инмар тодаз вайиз солэсь преступлениоссэ.

⁶ Пунэмен солы тыре соин ик, кызьы со тӥледлы тыриз, но кык полэс тыре солы солэн ужъёсызъя. Чашаын, кудаз со дасялляз тӥледлы вина, дасялэ солы кык полэс.

⁷ Кӧня солэн вал данэз но узырлыкез, сомында сётэ солы курадӟён но куректон. Уго со аслаз сюлэмаз вералляз:" Царь кадь пукисько, мон палкышно ӧвӧл, ноку уг адӟы куректонэз!"

⁸ Соин ик вуоз нунал, куке вуозы со доры шуг секытъёс но кулон, бӧрдон но сютэм улон. Со сутэмын луоз тылын, уго сое судить карись Кузё – Инмар кужмо.

⁹ Куке солэн городэз ӝуалоз, адӟёзы ӵынзэ но со сярысь зар бӧрдозы музъем вылысь царъёс, кудъёсыз соин калгылӥзы но узырлыкеныз улӥзы.

¹⁰ Соос солэсь курадӟемзэ адӟыса кышкаменызы палэнын сылозы но вералозы солы: " Куректон, куректон тыныд, быдӟым шор кар Вавилон! Кумо шор кар! Уго одӥг час куспын тон вылэ вуиз наказание".

¹¹ Музъем вылысь вузкарисьёс зар бӧрдозы со сярысь, уго соослэсь вузъёссэс нокин но уз ни басьты:

¹² зарнилэсь но азвесьлэсь но вузъёссэс, дуно изъёссэс но жемчугзэс, виссонзэс но порфиразэс, буртчинзэс но нап-горд дуно басмаоссэс, ческыт зыно пуоссэс, слон лылэсь но дуно писпуослэсь пӧртэм арбериоссэс но ыргонзэс но кортсэс но мраморзэс,

¹³ корицазэс но фимиамзэс, мирразэс но ладанзэс, виназэс но елейзэс, пызьзэс но чабейзэс, бадӟым сюро пудозэс но ыжъёссэс, валъёссэс но уробооссэс, адями мугоръёсты но лулъёсты.

¹⁴ Ӧз ни луэ тынад емышъёсыд, кудъёссэ лулыд кулэ карылӥз. Ваньмыз тынад чеберлыкед но узырлыкед тонэ кельтӥзы, но тон уд ни шедьты соосты".

¹⁵ Ваньмыныз таин вузкарисьёс но солэсь узырмемъёс султозы палэнэ кышкаменызы адӟыса солэсь курадӟемзэ. Бӧрдыса но куректыса,

¹⁶ соос вералозы:" Куректон, куректон тыныд, быдӟым шор кар, виссонэн, порфирен но пурпурен дӥсямын, чебермамын зарниен, дуно изъёсын но жемчуген,

¹⁷ уго одӥг час куспын узырлыкед быриз!" Но ваньмыз, кин руль сьӧрын сылэ, но ваньмыз, кин корабыльёсын уя, ваньмыз морякъёс но морской вузкарисьёс палэнэ султӥзы.

¹⁸ Солэсь ӝуамезлэсь ӵынзэ адӟыса кесяськизы: " Кыӵе городэз ӵошатыны луоз та быдӟым шор карен?!"

¹⁹ Соос пызьналлязы пенен асьсэлэсь йыръёссэс но кесяськыса зар бӧрдылӥзы:" Куректон, куректон тыныд, быдӟым шор кар, кудӥзлэн узырлыкеныз узырмизы ваньмыз мореетӥ уясь корабыльёслэн кузёоссы. Нош одӥг час куспын тон тыртэмид!

²⁰ Шум пот со сярысь ин, святой апостоллъёс но пророкъёс. Уго Инмар быдэстӥз тӥлестыд суддэс со вылын".

²¹ Собере одӥгез кужмо ангел басьтӥз бадӟым кӧльы, излы тупась, но куштӥз сое морее, вераса:" Озьы ик кужмо салемын луоз быдӟым шор кар Вавилон, но со уз ни луы отӥяз".

²² 22 Крезен шудӥсьёслэн, кырӟасьёслэн, чипчирганэн шудӥсьёслэн, гумы пеллясьёслэн тон дарын куараоссы уз ни чузъяське. Тон дорын уз ни луэ нокыӵе ужбыгатӥсьёс но нокыче киужъёс но. Вуко кӧльылэн но ужамез уз нӥ кылӥськы.

²³ Светильникъёс уз ни пиштэ тон дорын. Но уз ни кылӥське тон дорын эмеспилэн но кенлэн куараоссы. Уго тынад вузкарисьёсыд тодмо адямиос вал музъем вылын. Вань калыкъёс пыртэмын вал йыромонние тынад пелляськеменыд.

²⁴ Та шор карын шедьтэмын пророкъёслэн но Инмарлы оскисьёслэн но ваньзылэн музъем вылын виылэмъёслэн вирзы".