17

¹ Собере лыктӥз одӥгез сизьым пӧлысь ангел, солэн кияз вал сизьым чашаез но со шуиз мыным:" Лык дорам, мон возьмато тыныд кыӵе приговор вите трос вуос вылын пукись азыса - калгыса улӥсь кышномуртэз.

² Соин калгылӥзы музъем вылысь царьёс, но солэн азон - калгон винаеныз кудӟылӥзы музъем вылын улӥсьёс".

³ Ангел духен монэ пустыняе нуиз. Отын мон адӟи льӧль зверь вылын пукись кышномуртэз, со зверьлэн сизьым йырыз но дас сюръёсыз но мугораз тросс ултӥян кылъёс гожъямын.

⁴ Кышномурт дӥсяськемын порфир но ӵыж горд дӥсен но зарниен, дуно изъёсын но жемчуген чебермамын вал. Солэн кияз зарнилэсь чаша тырмытэмын юрӟымъёсын но азыса-калгыса улонэзлэн кырсьёсыныз.

⁵ Солэн кымысаз гожтэмын ватӥськем ним: "Вавилон - быдӟым шор кар, азыса - калгыса улӥсьёслэн, музъем вылысь юрӟымъёслэн анайзы".

⁶ Мон адӟи со кышномурт вӧсяськисьёслэн вирынызы но Иисус сярысь ивортӥсьёслэн вирынызы кудӟемын вал. Но, сое адӟыса, мон туж пайми.

⁷ Ангел юаз мынысьтым:" Малы тон паймиськод? Мон верало тыныд лушкемзэ та кышномурт сярысь, сое нуллӥсь сизьым йыро но дас сюро зверь сярысь:

⁸ " Зверь, кудзэ тон адӟид, вал нош табере ӧвӧл. Нош со дасяське потыны пыдэстэмысь но мыныны аслаз быроннияз. Соку музъем вылын, кинъёслэн нимъёссы гожтымтэ дунне кылдон дырысен улон книгае, паймозы, куке адӟёзы - зверь вал но ӧвӧл, озьы ке но со вань".

⁹ Тае валаны визьлык кулэ. Сизьым йыръёс - сизьым гурезьёс, кудъёсыз вылын пуке кышномурт,

¹⁰ но сизьым царьёс, кудъёсыз пӧлысь витез кулэмын ни, одӥгез вань на, нош мукетыз ӧз на лыкты, куке лыктоз, кемалы уз улы.

¹¹ Зверь, кудӥз вал но кудӥз ӧвӧл, - тямысэтӥез сизьым пӧлысь, кудӥз быронние мынэ.

¹² Дас сюръёс, кудъёссэ тон адӟид, - дас царьёс, кудъёсызлэн царствозы ӧвӧл на, нош зверен ӵошен соослэн властьсы луоз, царъёслэн кадь, одӥг часлы.

¹³ Соослэн одӥг кадь малпанъёссы, но соос сётозы зверьлы асьсэлэсь властьсэс но кужымзэс.

¹⁴ Соос ожмаськозы Ыжпиен, но Ыжпи вормоз соосты. Уго Со - кузёоослэн Кузёзы но царьёслэн Царьзы. Но соос, кин Соин, - ӧтемъёс, быръемъёс но осконоос".

¹⁵ Но вера мыным:" Вуос, кудъёссэ тон адӟид но кудъёсыз вылын пуке азӥсь - калгись кышномурт, - адямиос, калыкъёс, выжыос но котькыӵе кылъёсын вераськисьёс.

¹⁶ Дас сюръёс, кудъёссэ тон адӟид зверь вылын, калгись кышномуртэз адӟемпотостэм карозы, разорить карозы но голик кылёзы, сиёзы солэсь мугорызлэсь люкетъёссэ но сутозы сое тылын.

¹⁷ Уго Инмар понӥз соослэн сюлэмъёсазы быдэстыны Аслысьтыз волязэ, быдэстыны одӥгзэ волязэ но сётыны соослэсь царствозэс зверьлы, со дырозь ку Инмарлэн верам кылъёсыз быдэсмозы.

¹⁸ Кышномурт, кудзэ тон адӟид, - быдӟым шор кар, кудӥз кивалтэ музъем вылысь царьёсын".