16

¹ Собере мон кылӥ храм пушкысь сизым ангелъёслы верась бадӟым куара: " Мынэ но музъем вылэ кисьтэлэ сизьым чаша Инмарлэсь вожпотонзэ ".

² Нырысетӥ ангел мынӥз но кисьтӥз аслэсьтыз чашазэ музъем вылэ. Кинлэн вал зверьлэн пусэз но йыбырттылӥз солэн суредезлы, соослэн мугоразы туж зол висись но юрӟымесь урӟектэм яраос кылдӥзы,

³ Со бере кыкэтӥ ангел кисьтӥз чашазэ морее. Кулэм муртлэн вирызлы тупась, вир кылдӥз, но мореын ваньмыз лулоез кулӥз.

⁴ Собере куиньметӥ ангел кисьтӥз аслысьтыз чашазэ шуръёсы но ошмесъёсы - но вир кылдӥз.

⁵ Мон кылӥ вуослэн ангелэзлэсь верамзэ: "Шонерлыко Тон, Кузё-Инмар, Кудӥз вал, вань но святой! Уго Тон шонер судить кариськод.

⁶ Инмарлы оскисьёслэсь но пророкъёслэсь вирзэс кисьтэмзы понна, Тон сётӥд соослэн ужъёссыя соослы вир юыны.

⁷ Собере мон кылӥ мукетсэ, жертвенник дорысь верасьсэ: "Бен! Ваньзэ Быгатись Кузё-Инмар! Зэмлыкоесь но шонерлыкоесь Тынад судъёсыд!"

⁸ Собере ньылетӥ ангел кисьтӥз аслысьтыз чашазэ шунды вылэ, но шундылы лэземын вал калыкъёсты тылын сутыны.

⁹ Адямиосты ӟырдыт пӧсьлэсь ӵушкаськылӥзы но ултӥяллязы Инмарлэсь нимзэ, Кудӥзлэн властез вань та курадӟытонъёс вылын, нош соос покаяться но ӧз кариське ӧз но данъялэ Сое.

¹⁰ Собере витетӥ ангел кисьтӥз аслаз чашаысьтыз зверьлэн трон вылаз - солэн царствояз ӝомыт луиз. Соос куртчылӥзы асьсэлэсь кылъёссэс курадӟёнлы чидатэк

¹¹ но урод кылын вераллязы инмысь Инмарез асьсэлэн курадӟемзы но яраоссы сэрен. Озьы ке но соос сьӧлыкъёссылэсь ӧз куштӥське.

¹² Собере куатетӥ ангел кисьтӥз аслаз чашаысьтыз Ефрат быдӟым шурэ - но отысь ву куасьмиз, шунды ӝужанысен мед луоз шуыса царъёслы сюрес .

¹³ Соку мон адӟи, кызьы драконлэн но зверьлэн но лжепророклэн ымысьтыз потӥзы, бакаослы тупасесь куинь нечистой духъёс.

¹⁴ Соос вал тодметъёс лэсьтӥсь демонъёслэн духъёссы. Соос мынӥзы быдэс дуннеысь ваньмыз царъёс доры, Ваньзэбыгатӥсь Инмарлэн быдӟым нуналаз соосты люканы ожмаськонэ.

¹⁵ " Лыкто лушкаськись кадь, соин ик шудо со, кин сэзь улэ но дӥськутсэ дась возе, медам ветлоно луы шуыса голик, но нокин но медам адӟы солэсь возьытсэ".

¹⁶ Со люказ царъёсты, еврей кылын, Армагедон нимаськись интые.

¹⁷ Собере сизьыметӥ ангел кисьтӥз аслысьтыз чашазэ омыре - но инмысь храмлэн тронэз дорысь кылӥськиз бадӟым куара: " Быдэсмиз!"

¹⁸ Соку чилекъяськиз, гудыръяськиз, ӵаш вал, туж кужмо музъем зурказ. Сокем кужмо музъем зуркан ӧй вал адямиос музъем вылын кылдон дырысен.

¹⁹ Быдӟым шор кар Вавилон пазьгиськиз куинь полэс но вань калыкъёслэн городъёссы куашказы. Инмар тодаз ваиз со сярысь но сётӥз солы Аслаз вожпотонэзлэн лек винаен чашазэ.

²⁰ Ваньмыз островъёс ышизы но гурезьёс быризы.

²¹ Талант бытчаесь йӧ куштӥз калыкъёс вылэ. Калыкъёс урод кылын ултӥяллязы Инмарез наказаниез понна, уго йӧ куштон бадӟым изъян кылдытӥз.