15
1
Собере инмысь мон адӟи мукетсэ быдӟым но паймымон тодмет: сизьым ангелъёсты, кудъёсызлэн сизьым берпуметӥ наказаниоссы вал, кудъёсыныз Инмарлэн вожпотонэз быдэсме.
2
Мон адӟи, стеклолы тупась мореез, кудӥз тылын сурамын вал. Стеклолэсь море вылын сыло зверез но солэсь образзэ вормисьёс, солэсь пуссэ но солэн нимызлэсь лыдзэ вормисьёс, киязы возё вал Инмарлэсь крезьёссэ.
3
Соос кырӟазы Инмарлэн ляльчиезлэсь Моисейлэсь но Ыжпилэсь кырӟанъёссэ, вераса: "Туж быдӟымесь но паймымонэсь Тынад ужъёсыд, Ваньзэбыгатӥсь Кузё - Инмар! Шонерлыкоесь но зэмлыкоесь Тынад сюресъёсыд, вань святойёслэн Царьзы!
4
Кин уз кышка Тынысьтыд, Кузё - Инмар! Кин уз даннъя Тынысьтыд нимдэ? Уго Тон огняд Святой! Ваньмыз калыкъёс йыбырттозы Тыныд, уго усьтӥськизы Тынад шонерлыкед Тынад ужъёсад.
5
Собере мон адӟи: инмысь ивортон храмлэн скинияез усьтӥськемын.
6
Храмысь потӥзы сизьым ангелъёс, кудъёсызлэн сизьым курадӟёнъёссы. Соос чылкыт, югыт етӥн дӥсен дӥсяськемын, гадь вылазы зарни кускерттон кэрттылэмын.
7
Ньыль пудоос пӧлысь одӥгез сётӥз та сизьым ангелъёслы сизьым зарни чашаос, кудъёсыз тырмытэмын, Пырулӥсь Инмарлэн вожпотонэныз.
8
Но храм тырмиз ӵынэн Инмарлэн данэзлэсь но Солэн кужымезлэсь. Нокин но ӧз быгаты пырыны храме, сизьым ангелъёслэн, сизьым наказаниоссы бырытӵёзь.