14

¹ Со бере мон учки но адӟи: Сион гурезь вылын сылэ Ыжпи, но Соин сю ньыльдон ньыль сюрс, кудъёсызлэн кымысазы гожтэмын Солэн нимыз но Солэн Атаезлэн нимыз.

² Но инмысь мон кылӥ куара, трос вуослэн ӵаш каремзылы но гудырилэн дымбыртэмезлы тупась. Куара, кудзэ мон кылӥ, тупа крезен шудемлы.

³ Соос кырӟяло выль кырӟян трон азьын, ньыль пудоос но песятайъёс азьын. Нокин но ӧз быгаты дышетыны та кырӟянэз, сю ньыльдон ньыль сюрсъёс сяна, музъем вылысь дунын басьтэмъёсыз сяна.

⁴ Соос, кин ӧз саптаськы кышномуртъёсын, соос пилыксэс ӧз ыштэ. Соос, кинъёс мыно Ыжпи сьӧры, кытчы Со мынэ. Соос басьтэмын калыкъёс пӧлысь, нырысетӥосыз Инмарлы но Ыжпилы.

⁵ Соослэн кылазы шонертэмез ӧвӧл. Соос дунэсь Инмарлэн престол азяз.

⁶ Собере мон адӟи ин шортӥ лобись мукетсэ ангелэз. Солэн вал Шумпотон-Ӟеч Иворэз, кудӥз пумтэм дауръёс ӵоже луэ, кудзэ со ивортоз музъем вылысь котькыӵе калыкъёслы, выжыослы, кылын вераськисьёслы но рассаослы.

⁷ Со вераз бадӟым куараен:" Кышкалэ Инмарлэсь! Данъялэ Сое, уго вуиз Солэн судэзлэн дырыз. Йыбырттэ инэз, музъемез, мореез но ошмесъёсты Лэсьтӥсьлы".

⁸ Со сьӧры лыктэ кыкэтӥ ангел, вераса: "Куашказ, куашказ быдӟым Вавилон шор кар. Со, кудӥз азон-калгонлэн лек винаеныз сектаз вань калыкъёсты".

⁹ Со сьӧры лыктэ куиньметӥ ангел, бадӟым куараен вераса: " Кин йыбырттэ зверьлы но солэн изображениезлы но пуктыны лэзе клеймо аслаз кымысаз но ки вылаз,

¹⁰ со юоз Инмарлэн вожпотонэзлэн чашаысьтыз Солэсь лек но кизертымтэ виназэ. Но курадӟытэмын луоз тылын но сераын святой ангелъёс но Ыжпи азьын.

¹¹ Соослэн курадӟемзылэсь ӵын ӝутскоз пумтэм дауръёс ӵоже. Соос, кинъёс йыбырттозы зверьлы но солэн изображениезлы, но соос кинъёс басьтозы солэн нимызлэсь клеймозэ, шутэтсконэз уз адӟе уй но нунал но.

¹² Татын Инмарлы оскисьёслэн чиданлыксы, быдэсъясьёслы Инмарлэсь заповедьёссэ но Иисуслы осконзэс утисьёслы.

¹³ Собере мон кылӥ инмысь верам куара: "Гожты: " Та дырысен майбыресь ваньмыз, кин кулоз Кузё-Инмар пушкын"."Бен! - вера Дух. - Соос шутэтскозы асьсэлэн ужъёссылэсь, уго соослэн ужъёссы мыно сьӧразы".

¹⁴ Мон учки но адӟи югыт пилем, Пилем вылын пуке Адямилэн Пиезлы тупась Кинке. Солэн йыр вылаз зарни венец, нош Солэн киях лэчыт сюрло.

¹⁵ Со бере потӥз мукетыз ангел но кеськиз бадӟым куараен пилем вылын пукисьлы: "Келя сюрлодэ но ара, уго аранлэн дырыз музъем вылын вуиз ини.

¹⁶ Пилем вылын Пукись куштӥз аслысьтыз сюрлозэ музъем вылэ, но музъем вылын аран быдэсмиз.

¹⁷ Со бере инлэн храмысьтыз потӥз мукетыз ангел, солэн но лэчыт сюрлоез вал.

¹⁸ Но мукетыз ангел, кудӥзлэн тыл вылын кузёяськыны властез вань, палэнскиз жертвенник дорысь но бадӟым куараен кеськиз солы, кинлэн вал лэчыт сюрлоез: " Келя лэчыт сюрлодэ но ванды виноград гурыосты музъем вылысь виноградникысь, уго солэн емышез вуиз ини".

¹⁹ Ангел куштӥз аслысьтыз сюрлозэ музъем вылэ, вандӥз музъем вылысь виноградэз но куштӥз сое Инмарлэн вожпотонэзлэн нельконаз.

²⁰ Собере виноград лёгамын вал город сьӧрысь нельконниын, но нельконниысь вир бызиз валлэн кортнэтэз ӝужда, сюрс куатьсю стадиозь вӧлмиз.