13

¹ Мон адӟи мореысь потӥсь зверез, кудӥзлэн сизьым йыръёсыз но дас сюръёсыз: солэн сюръёсаз дас диадемаос, йыръёсаз - Инмарез ултӥясь нимъёс.

² Зверь, кудзэ мон адӟи, барслы тупа, пыдъёсыз гондырлэн кадь, ымыз левлэн кадь. Дракон сётӥз солы аслэсьтыз кужымзэ но тронзэ, но туж бадӟым властьсэ.

³ Мон адӟи, солэн одӥгез йырыз кулонние вуытозь ранить каремын, нош со ранаез бурмиз. Зверь шоры учкыса вань музъем паймылӥз, но йыбырттӥзы драконлы, малыке шуоно со сётӥз зверьлы власть.

⁴ Но йыбырттӥзы зверьлы, вераса: “Кин ӵошатскыны быгатоз та зверен? Но кин быгатоз ожмаськыны соин?”

⁵ Солы сётэмын вал ым, вылтӥяськыса но ултӥян кылъёс вераны Инмарлы пумит но власть сётэмын вал ньыльдон кык толэзь.

⁶ Но со усьтӥз аслысьтыз ымзэ, ултӥяны Инмарез но Солэсь нимзэ, Солэсь улоннизэ но инмын улӥсьёсты.

⁷ Солы лэземын вал ожмаськыны Инмарлы оскисьёсын но вормыны соосты. Но власть сётэмын вал солы котькуд выжыос но калыкъёс, котькыӵе кылъёсын вераськисьёс но улӥсьёс вылын.

⁸ Солы йыбыртозы музъем вылысь вань калыкъёс, кудъёсызлэн нимъёссы гожтымтэ вал, Ыжпилэн улон книгаяз, кудиз жертвалы чакламын вал дуннелэн кылдытэм тырысеныз.

⁹ Кинлэн вань пельёсыз мед кылоз.

¹⁰ Кин пленэ келя, со ачиз пленэ басьтэмын луоз. Кин мечен вийылэ, сое ассэ мечен виозы. Татын чиданзы но осконзы Инмарлы оскисьёслэн.

¹¹ Собере адӟи музъемысь потӥсь мукетсэ зверез. Солэн вал ыжпилэн кадь кык сюрыз, но вераськылӥз, дракон кадь.

¹² Со тырше нырысетӥ зверь азьын но солэн сётэм властеныз но кужмысь косэ вань музъемез но отын улӥсьёсты йыбырттыны нырысетӥ зверьлы, кудӥзлэн кулоно ранаез бурмиз.

¹³ Со лэсьтэ быдӟым тодметъёс, калык азьын тыл инмысь васькытэ.

¹⁴ Паймымон ужъёсыныз, кудъёссэ солы лэземын лэсьтыны зверь азьын, со пӧя музъем вылын улӥсьёсты, мед лэсьтозы шуыса зверьлэсь суредзэ, кудӥзлэн мечлэсь ранаез вал но бурмиз.

¹⁵ Солы леземын вал лул сётыны зверьлэн суредэзлы, вераськыны мед быгатоз шуыса но мед лэсьтоз озьы – котькуд адями виемын мед луоз, кин уз йыбыртты зверьлэн сурэдезлы.

¹⁶ Со лэсьтӥз, ваньмызлы: покчиослы но бадӟымъёслы, узыръёслы но начаръёслы, свободнойёслы но рабъёслы бур киязы яке кымысазы пуктэмын луоз клеймо.

¹⁷ Нокин но медам быгаты шуыса басьтыны яке вузаны, ӧвӧл ке солэн клеймоез, яке зверьлэн нимыз, яке солэн числоез.

¹⁸ Татын кулэ визьлык. Кинлэн вань визьмыз, мед лыдъялоз зверьлэс числозэ, уго со число адямилэн. Солэн числоез куатьсю куатьтон куать.