12

¹ Инмын быдӟым тодмет адӟиськиз: кышномурт шундыен дӥсяськемын. Солэн пыд улаз толэзь, йыраз дас кык кизилиослэсь венец понэмын.

² Со секытэн вал но нылпи вайёнэн курадӟыса, вӧсезлы чидатэк, кесяськиз.

³ Со бере инмын адӟиськиз мукет тодмет: бадӟым горд дракон, кудӥзлэн сизьым йырыз но дас сюрыз но йыръёсыз вылын сизьым диадем вал.

⁴ Солэн быжыз кыскиз куиньметӥ люкетсэ инмысь кизилиосты но куштӥз музъем вылэ. Та дракон султӥз секытэн кышномурт азе, пинал вордскем бере, солэсь нылпизэ сиён вылысь.

⁵ Солэн пи вордӥськиз, кудӥз вань калыкъёсты кортлэсь жезлэн возьманы кулэ. Солэсь пизэ нуэмын вал Инмарлы но Солэн тронэз доры.

⁶ Нош кышномурт пегӟиз пустыняе Инмарен солы дасям интые, сое отын мед сюдозы шуыса сюрс кыксю куатьтон нунал.

⁷ Соку инмын ожмаськон кутскиз. Михаил но солэн ангелъёсыз ожмаськизы дракон пумитэ, дракон но солэн ангелъёсыз ожмаськизы соос пумитэ,

⁸ нош кужымзы ӧз тырмы, но соослы инмын инты ӧз ни шедьы.

⁹ Быдӟым дракон куштэмын вал - вашкала змея, кудзэ нимало дьявол но сатана, быдэс дуннеез пӧяськонэ-йыромонние пыртӥсь, куштэмын музъем вылэ ангелъёсыныз ӵошен.

¹⁰ Соку мон кылӥ Инмысь бадӟым кураен верамез: “ Табере вуиз утиськон, кужым но асьмелэн Инмармылэн царствоез, но Солэн Христосэзлэн кивалтэмез, уго куштэмын вынъёсмес янгыше уськытӥсь, кудӥз уй но нунал тыршылӥз янгыше уськытыны соосты асьмелэн Инмармы азьын.

¹¹ Соос вормизы сое Ыжпи вирен но асьсэлен ивортэм кылынызы, но кулытӵёзь лулзэс ӧз яратэ.

¹² Соин ик, шулдыръяське, инъёс но отын улӥсьёс! Куректон музъем вылын но море вылын улӥсьёслы! Уго тӥ доры туж бадӟым йыркурен дьявол васькиз, тодыса солы ӧжыт дыр кылиз ни шуыса.

¹³ Куке дракон адӟиз, музъем вылэ куштэмын шуыса, соку ӧдъяз уйылыны кышномуртэз, кудӥз пи пина вайиз.

¹⁴ Нош кышномуртлы сётэмын вал бадӟым оръёллэсь кык бурдъёссэ, со мед лобалоз шуыса пустыняе, змеялэн син азьысьтыз, аслаз интыяз, но отын дыр, дыръёс но ӝыны дыр ӵоже кӧтсэ мед тыроз шуыса.

¹⁵ Змея ымысьтыз шур кадь ву лэзиз, кышномуртлэн бӧрсяз, шур сое мед нуоз шуыса.

¹⁶ Но музъем кышномуртлы юрттӥз: музъем усьтӥз ымзэ но драконлэсь ымысьтыз лэзем шурез ньылӥз.

¹⁷ Соку драконлэн кышномуртлы туж зол вожез потӥз но мынӥз ожмаськыны солэн кылем нылпиосыныз, кудъёсыз Инмарлэсь куронзэ быдэсъяло но Иисус Христослэсь верамзэ возё.