11

¹ Со бере мыным сётэмын корт, бодылы тупась трость, но верамын вал: "Султы но мерта Инмарлэсь храмзэ, жертвенниксэ но отысь йбырттисьёссэ.

² Но храмлэсь педлось азбарзэ лэдэ эн но эн мерта, уго со сётэмын язычникъёслы: соос ньыльдон кык толызь лёгалозы святой городэз.

³ Мон власть сёто Мынам кык свидетельёсылы, чурыт дэраен дисяськемъёсызлы, пророчествовать карыны сюрс кык сю куатьтон нунал.

⁴ Соос - кык маслинапуос но кык светильникъёс, кудъёсыз сыло музъемлэн Инмарез азьын.

⁵ Кин ке соослы изъян лэсьтыны малпаз ке, соку ик соослэн ымысьтызы тыл потоз но ньылоз соослэсь тушмонъёссэс. Соин ик кинлэн ке соослы изъян лэсьтэмез потӥз ке, виемын луоз.

⁶ Соослэн вань кужымезы инбамез пытсаны, медам зор шуыса, со нуналъёсы, ку соос пророчествовать каро. Озьы ик соослэн вань кужымзы вуосты вир лэсьтыны, но келяны музъем вылэ котькыӵе курадӟёнъёс, куке соослэн мылзы потоз.

⁷ Куке соос дугдозы свидетельствовать каремысь, пыдэстэмысь потӥсь зверь, ожмаськоз соосын, вормоз соосты но виёз.

⁸ Быдӟым городлэн ульчаяз со кельтоз соослэсь шӧйъёссэс, кудзэ духъя Содом но Египет шуо, кытын асьмелэн Кузё-Инмармы кортӵогамын вал.

⁹ Тросэз калыкъёс, выжыос, улӥос, пӧртэм кылъёсын вераськисьёс пӧлысь адӟёзы соослэсь шӧйъёссэс куинь но ӝыны нунал но уз лэзе шӧйёссэс ватыны шайгуосы.

¹⁰ Музъем вылын улӥсьёс та понна шум потозы но шулдыръяськозы. Соос ог огзылы кузьымъёс кузьмалозы, уго та кык пророкъёс музъем вылын улӥсьёсты курадӟытылӥзы.

¹¹ Нош куинь но ӝыны нунал ортчем бере пыриз пророкъёс пушкы Инмарлэн улон сётон духэз, соку соос султӥзы пыд вылазы. Ваньзэ тае адӟисьёс туж зол кышказы.

¹² Соос инмысь кылӥзы бадӟым куара: « Тубе татчы», но тубизы пилем вылын инме, нош тушмонъёссы учкыса кылизы.

¹³ Со дыр куспын ик туж зол музъем зурказ, но дасэтӥ люкетэз городлэн куашказ. Музъем зуркан дыръя кулӥзы сизьым сюрс адями, нош мукетъёсыз кышкатскизы но данъяллязы инмысь Инмарез.

¹⁴ Кыктэтӥез курадӟён кошкиз, нош ӝог гинэ лыктэ куиньметӥез.

¹⁵ Сизьыметӥ ангел гумыаз пельтӥз, но инмын кылӥськизы бадӟым куараос: «Та дуннелэн царствоез луиз асьмелэн Иисус Христос Кузёмылэн Царствоез, но Со царствовать кароз котькуд дыръёсы».

¹⁶ Инмарлэн тронэзлэн азяз пукись дас ньыль песятайъёс, усьытскизы ымныр вылазы но йыбырттӥзы Инмарлы,

¹⁷ вераса: «Ӟечкыласьком Тонэ, Кузё-Инмар Ваньзэбыгатӥсь, Кудӥз вал но вань, ӟечкыласьком, Тон басьтӥд Тынэсьтыд быдӟым кужымдэ но царь луид.

¹⁸ Лекомизы калыкъёс. Но вуиз Тынад вожпотонэд но дыр судӥть карыны кулэмъёсты но дано кузьым сётыны Тынад рабъёсыдлы, пророкъёслы, святойёслы но Тынад нимыдлэсь кышкасьёслы, пичиослы но бадӟымъёслы, но быдтыны соосты, кин быдтэ музъемез».

¹⁹ Инмын учкиз Инмарлэн храмез, но Солэн храмаз адӟиськыны ӧдъяз Солэн заветэзлэн ковчегез. Со дыр вал чилекъяськемъёс, гудыръяськемъёс, музъемзурканъёс но ыльыс йӧ куштэм.