19

¹ Собере мон инмысь кылӥ бадӟым куара, трос калыкъёслэн вераськемзы кадь, кудӥз вераз: «Аллилуя! Мозмытскон но дан, сиё-дан но кужым асьмелэн Кузё-Инмармылы!

² Солэн судъёсыз зэмлыкоесь но шонересь. Уго Со та быдӟым калгись кышномуртэз судить кариз, кудӥз азытӥз музъемез аслаз калгеменыз, но пунэмен берыктӥз солы Аслаз рабъёсызлэсь вирзэс кисьтем понна».

³ Собере кыктэтӥзэ соос веразы: «Аллилуйя! Солэн ӵыныз ӝутиське котькуд дыръёсы»,

⁴ Соку кызь ньыль песятайёс но ньыль пудоос усьытскизы но йыбырттӥзы трон вылын пукись Инмарлы, вераса: «Аминь! Аллилуйя!»

⁵ Но трон дорысь куара кылӥськиз: «Ушъялэ асьмелэсь Инмармес, ваньмыз Солэн рабъёсыз но Солэсь кышкасьёсыз, покчиос но быдӟымъёс».

⁶ Собере мон, трос вуослэн ӵашетэмзылы, зол гудыръяськемлэн дымбыртэмезлы тупась, тросс калыкъёслэсь куараоссэс кылӥ, кудъёсыз вераллязы: «Аллилуйя! Уго асьмелэн Ваньзэбыгатӥсь Кузё – Инмармы царь луиз.

⁷ Ойдолэ шумпотом но шулдыръяськом но сётом Солы дан, уго вуиз Ыжпилэн сюан шулдыръяськонэз, но Солэн кышноез дась ини.

⁸ Солы сётӥзы дӥсяны дун но пиштӥсь виссон. Виссон со – святойёслэн шонерлыко ужъёссы».

⁹ Ангел шуиз мыным: «Гожты: «Шудоесь соос, кинъёс ӧтемын Ыжпилэн ӝыт сюан шулдыръяськоназ». Собере со шуиз на мыным: «Та Инмарлэн кылъёсыз зэмлыкесь ».

¹⁰ Мон усьытски солэн пыд азяз, солы йыбырттыны, нош со шуиз мыным: «Эн лэсьты озьы.Уго мон тонэныд но тынад вынъёсыныд ӵош ужась, кудъёсыз Иисус сярысь иворто. Инмарлы йыбыртты! Уго Иисусэз ивортон – пророчестволэн духез луэ».

¹¹ Но мон адӟи усьтӥськем инэз. Отысь - тӧдьы валэз. Со вылын Пукисьсэ нимало Оскымон но Зэмлык, Кудӥз шонер судить каре но ожмаське.

¹² Солэн синъёсыз, ӝуась тыл кадь, Солэн йыр вылаз трос диадемаос. Солэн вал гожтэмын нимыз, кудзэ нокин но уг тоды, Ачиз сяна.

¹³ Со вылын вал вирен пыӵам дӥсь. Солэн нимыз – «Инмарлэн Кылыз»,

¹⁴ Со сьӧры мыно инмысь ожмаськисьёс, дӥсьсы соослэн тӧдьы но пиштӥсь виссон.

¹⁵ Солэн ымысьтыз потэ лэчыт меч, соин со калыкъёсты быттоз. Со возьма соосты кортлэсь жезылэн, но лёга виноград нельконниын Ваньзэбыгатӥсь Инмарлэсь вожпотонэзлэсь но лекезлэсь виназэ.

¹⁶ Солэн дӥсь вылаз но макесаз гожтэмын ним: «Царьёслэн Царьзы но кузёослэн Кузёзы».

¹⁷ Собере мон адӟи шунды вылын сылӥсь одӥг ангелэз. Со кесяськиз бадӟым куараен, ин шортӥ лобась вань тылобурдоослы: «Лыктэ татчы! Люкаське Инмарлэн быдӟым юон шулдыръяськоназ,

¹⁸ сиыны царъёслэсь шӧйёссэс, кужмоослэсь шӧйёссэс, ожгарчиосын кивалтӥсьёслэсь шӧйёссэс, валъёслэсь но соос вылын пукисьёслэс шӧйёссэс, свободнойёслэсь но рабъёслэсь шӧйёссэс, покчиослэсь но быдӟымъёслэсь шӧйёссэс».

¹⁹ Собере мон адӟи зверез, но музъем вылысь царьёсты но соослэсь армизэс. Соос люкаськизы ожмаськыны вал вылын Пукисен но солэн армиеныз.

²⁰ Зверь кутэмын вал, но соин ӵош, со азьын паймымон ужъёс лэсьтӥсь лжепророк, кудъёсыныз со йыромытӥз соосты, кинъёс зверьлэсь клеймозэ басьтӥзы но йыбырттӥзы солэн суредэзлы. Соос кыкназы куштэмын вал улэпскын сераен ӝуась тылын озерое.

²¹ Мукетъёсыз виылэмын вал вал вылын Пукисьлэн меченыз, кудӥз ымысьтыз потэ. Но вань тылобурдоослэн кӧтсы шӧйъёсын тыриз.