¹ Muze chimeneneme chahate , asasendote nyi akwa kuyula ja watu yatwamine punga hali Yesu ngwo amushihe . ² Yamukasa , yamutwala , nyi kumuhana kumoko ja nguvulu Pilatu . ³ hohene Yundase , yoze wamukunjikile , hakumona ngwenyi hamuhisa Yesu , yalikonekena nyi kuhilwisa mbongo makumi atatu ja pulata kuli asasendote nyi makulwana. ⁴ Nyi kwamba ngwo, '' Hingunavulumuna mumu ngunakunjika manyinga ja mutu yono keshi mulonga .'' Ayo yamnba ngwo , '' Yika ayo kuli yetu ? chitale yenamwene .'' ⁵ Yambila hashi mbongo ja pulata mu tembele , yakatuka nyi kuya mu kulisukika. ⁶ Mba asasendote ambachile mbongo ja pulata nyi kwamba ngwo , '' kuchatelele kusa ndando mu mulambu ya tembele mumu hi ndando ya manyinga ''' ⁷ Yashimutwila wano maliji hamuwika , nyi kulanda nyi mbongo wande wa tengi hanga ukapwe chifuka cha yilambala. ⁸ Mumu wachino jina lya wande kakuwamba ngwo, '' wande wa manyinga '' kuheta nyi lino tangwa. ⁹ Mba yize yahanjikile kapulofeta Yelemiya yihetesee , kwamba ngwo, '' Anjile makumi atatu a pulatu , ndando yize amuselele kuli ana ja Isalele , ¹⁰ nyi kuhana ku wande wa tengi , ngwe muze Mwene ahanjikile nhali yami.'' ¹¹ Mba Yesu mamana ku meso ja nguvulu , nyi a nguvulu yamuhulisa ngwo , '' Yena mwanangana wa a yunda ?'' Yesu ya akumbulula ngwenyi , '' chena cho nwamba .'' ¹² Muze asasendote nyi ma kulwana amusumine , kakakumbulwile . ¹³ Mba Pilatu yamba kuli yiye , ngwenyi, '' Waivwile milonga yize ana ku hane? ¹⁴ Mba kakawakumbulwile chipwe liji limuwika , chocho nguvulu yalikomokena chikolo. ¹⁵ Alyoze hachiwanyino nguvulu kapwile nyi ndako ya kutuhwisa funge umuwika yoze mbunga yinafupu . ¹⁶ Hayize shimbu kwapwile funge umwe jina lyenyi Mbalamba . ¹⁷ Muze akungulukile eswe hamuwika , Pilatu yamba kuli ayo ngwo, Yiya munafupe ngunu tuwishile ? Mbalamba , chipwe Yesu yoze jina lyenyi Kilishitu ?'' ¹⁸ Mumu kanyingikine ngwo hamukunjika Yesu ha mulonga wa ukwa. ¹⁹ Mumu shimbu kanachitwama ha chitwamo cha upatwilo wa milonga , pwo lyenyi yatuma maliji kuli yiye nyi kwamba ngwo , '' kanda ulinga nyi chimwe kuli yono mutu wa ululi. Mumu namona lamba linji musono hamukunda wa chiloto napwanga nacho hali yiye.'' ²⁰ Mba asasendote nyi makulwana yakununa mbunga nyi kuhula Mbalamba , Nyikuzanga ngwo Yesu amushahe. ²¹ Nguvulu yawahulisa ngwenyi, ''Yiya hakachi ka wano aali nuna fupu hanga ngunutuswile?'' Yamba ngwo , '' Mbalamba .'' ²² Pilatu yawakumbulula ngwenyi, '' Yika mu ngulinga nyi Yesu yono akusanyika ngwo Kilishitu ?'' Yakumbulula ngwo, '' Muhachikenu ha kulusu.'' ²³ Yamba ngwenyi , '' Mumu waka , chuma muka chipi alinga ? '' Mba yakololoka ngwo , '' muhachikenu ha kulusu'' ²⁴ Muze Pilatu amwene ngwenyi yakwihi anandeho , alyoze chizungozungo muchikatuka, yambata meya , yasana ku moko kulutwe ya punga , nyi kwamba ngwenyi , '' chishi nyi mulonga nyi manyinga ja yono mutu wa ululi . Munachimono.'' ²⁵ Atu eswe yahanjika ngwo, '' Manyinga jennyi apwe hali yetu nyi ana jetu .'' ²⁶ Nyi kutusula Mbalamba kuli ayo , mba yamunjika nyi kumuhana kuli ayo ngwo amuhachike ha kulusu. ²⁷ Hohene maswalale yambata Yesu nyi kumutwala ku zuwo lya wangana nyi kukungulula chihuji cha maswalale muchikunguluka . ²⁸ Yamuzula mazalo jenyi nyi kumujika hina lya ngengu. ²⁹ Yayinda chipangula cha mingonga nyi kumujika kumutwe, nyi lumbungo mu kwoko lyenyi lya chindume . Yalyondela kuli yiye nyi kumukekuna ngwo , '' yena mwanangana wa yundeya!'' ³⁰ Yamufwilila mate , yambata lumbongo nyi kumulamba kumutwe. ³¹ Muze te hamukekuna, yamuzula hina nyi kumujika mazalo jenyi nyi kumutwala mukumuhachika ha kulusu. ³² Muze atuhukile , yawana mutu wafuma ku Selena jina lyenyi Semone , yoze yamushijila kuya no hanga ambate kulusu . ³³ Ha kuheta kuma jina lyako Ngolongota , chize chinalumbunuka ngwo '' chihela cha kola.'' ³⁴ Yamwaha vinyu yakunwa yakuchinga nyi kasashiso . Alyoze muze kayipanjika , kakanwine. ³⁵ Muze hamuhachika ha kulusu , yalyanyina mazalo jenyi nyi kutelaho chela, ³⁶ nyi kutwama nyi nyikumulayilako. ³⁷ Helu lyamutwe wenyi yasaho chize hamusuma nacho , chize chakusoneka ngwo, '' yono Yesu Mwanangana wa a Yunda .'' ³⁸ Yamuhachika nyi mihuza aali nyi yiye , umuwika ku chindume chenyi nyi mukwo ku chimese . ³⁹ Waze apwile nyi kupalika yamushililika nyi kuhunga mitwe jo. ⁴⁰ Nyi kwamba ngwo, '' yena wakwonona tembele nyi kwangulula mu matangwa atatu , lilamwine yenamwene ! Ngwe uli mwana wa Zambi , sunuka aho hakulusu!'' ⁴¹ Chizechene nhyi asasendote newo kapwile nyi kumukekuna, kumuwika nyi akusonyeka nyi maku lwana , nyi kwamba ngwo , ⁴² ''Walamwinyine akwo , mba kahashile kulilamwina mwene. Yiye Mwanangana wakwa Isalele, Asunuke hakulusu , nyi mba mutumufulyela. ⁴³ Wakololokele muli Zambi , echenu Zambi amupulule halyapwila , nyingwe Zambi machitayiza kumukasununa, Mumu kahanjikile ngwenyi , ' Nguli mwana wa Zambi ''' ⁴⁴ Chimuwika nyi waze mihuza amuhachikile nenyi newo amuchomekele nyi maliji. ⁴⁵ Mba mu wola yamuchisambano mulima yejile hashi heswe ndo ku ola yamuchilivwa. ⁴⁶ Ha wola yamuchilivwa, Yesu watetele nyi liji linene ngwo , '' Eli, Eli, lambatani ?'' chize chinalumbunuka ngwo , ''Zambi yami,Zambi yami, kuchi te mwangwehukila?'' ⁴⁷ Muze amwe akuli waze amanyineko achivwile , '' Yono kanatambika Eliya.'' ⁴⁸ Haze hene umwe yazomboka nyi kumbata shiponja, yayizalisa nyi vinyu yapangaminya , yayisa ku lumbunga nyi kumwaha ngwo anwe. ⁴⁹ Alyoze waze asalileho hahanjika ngwo , Muhichikenu uka wenyi. Echenu tutale nyingwe Eliya meza nyi kumulamwina .'' ⁵⁰ Yesu watetele nawa nyi liji linene nyi kwecha shipilitu yenyi . ⁵¹ Hohene , hina lya mutembele lyapulikile hakachi kufuma kwilu nyi kuheta hashi , nyi chifuchi vhanyikishile , nyi mawe apalukile. ⁵² Nyi mafuka kazulukile , nyi mijimba ya waze asandu apombele tulo kanaka hinduka . ⁵³ Kanakatuhuka mu mafuka jo kulutwe ya kuhinduka chenyi, kanakanjila mu limbo lisandu, nyi kusoloka kuli annji. ⁵⁴ Muze kapitau nyi waze apwile nyi kumutala Yesu amwene kunyika nyi yiko yalingikile , yevwile woma wunji nyi kwamba ngwo, '' chamwenemwene yono kapwile mwana Zambi .'' ⁵⁵ Mapwo anji amukawile Yesu kufuma ku Ngalileya waze ayile nyi kumufunga kapwile nyi kutalila hasuku. ⁵⁶ Hakachi kwo hapwile Maliya ka Mandala , Maliya naye wa Tiyangu nyi Joze, nyi naye wa ana ja Zembendeu. ⁵⁷ Muze te tangwa hilyatoka , kwejile lunga pichi wa ku Alimetiya , jina lyenyi Jose , yoze wapwile kambajika Yesu . ⁵⁸ Wahanjikile nyi Pilatu nyi kwita mujimba wa Yesu . Mba pilatu wa lyekele ngwenyi amwehe. ⁵⁹ Jose wambachile mujimba , wamuvungile ha hina lipema lya linyu, ⁶⁰ nyi kuwusa mu fuka lyenyi lyaha lize atotele muliwe. Walangumwinyineko liwe linene lize ku chikolo cha fuka nyi kukatuka nyi kuya . ⁶¹ Maliya ka Mandala nyi Maliya muku kanakapwako , kanakatwama ku sali ya fuka. ⁶² Tangwa liko lya kahwileko , lize lyapwile tangwa lya kufuma lize lya kululika , asasendote nyi Afwaliseu alikungulwile hamuwika nyi Pilatu . ⁶³ Yahanjika ngwo '' Mwene , tunewuluka shimbu yono muka kwonga wambile shimbu apwile nyi mwono , ngwenyi , kulutwe lyamatangwa atatu makahinduka .' ⁶⁴ Shikaho ambenu keshika akoleke fuka ndo kutangwa lya muchitatu, nyingwe ka tumbaji twenyi meza ufuku nyi kumwiyamo nyi kwamba kuli atu ngwo , '' Hahinduka mukachi ka afu, ' Mba kulumbuka chisula muchinyana kulumbuka chitangu.'' ⁶⁵ Pilatu wambile kuli ayo ngwenyi , ''Tulayi muli no. Yenu mu kalikoleke mumu nunanyingika.'' ⁶⁶ Ayo ayile nyi kukoloka fuka , nyi kusako liwe nyi kusako tulayi.