¹ Achi kulutwe lya sambata , shimbu kwaputukile kutemwoka hatangwa litangu lya Semana , Maliya ka Mandala nyi Maliya mukwo ayile nyi kutala ku fuka . ² Kumanyi , kwapwile minyiko yinene, mumu mungelo wa mwene wahulumukine mwilu yeza kwalumuna liwe ku chikolo , yatwamaho. ³ Kusoloka chenyi chapwile ngwe mihenyo , nyi mazalo jenyi atoma ngwe wanda. ⁴ Mba akwa kufunga kufuka achikimine nyi woma nyi alumukine ngwe afu. ⁵ Mungelo wahanjikile nyi mapwo wambile ngwenyi , '' kanda nwivwa woma , mumu ngunanyingika ngwami nunafupu Yesu , yoze anakahachila hakulusu . ⁶ Amuno keshimo mumu hahinduka , chize chene ngwe ambile . Tweyenu nutale hano haze apombanga Mwene . ⁷ Yenu nyi kawashi mukambulwile tumbaji jenyi ngwenu , 'Hahinduka mukachi ka afu . Talenu iye manutetekela ku Ngalileya. Kuze munukamu wana.'Talenu ,hina nwambulwila.'' ⁸ O akatukile nyi kawashi ku fuka nyi woma nyi kuwahilila kunene, azombokele mu kwambulwila tumbaji jenyi. ⁹ Kumanyi , Yesu wa atakanyine nyi kwamba ngwenyi , '' Vulye !'' mapwo amukundamine , amukwachile kumolu nyi kumuwaila . ¹⁰ Hohene Yesu wambile kuli ayo ngwenyi, '' kanda nwivwa woma . Yenu nukambulwile mandumbu jami aye ku Ngalileya . Kwenako makangumona.'' ¹¹ Shimbu mapwo machiya , amwene akulitulayi ayile ku chihunda nyi kwambulwila asasendote yuma yeswe ize yasolokele. ¹² Muze hakunguluka hamwe nyi makulwana nyi kutwama punga , ahanyine mbongo jinji kuli maswalale . ¹³ nyi kwalweza ngwo , '' Ambenu ngwenu , 'Tumbaji ke zanga ha ufuku kamwiyanga shimbu yetu te tuli mutulo. ¹⁴ 'Nyi kachi chino muchiheta ku matwi ja nguvulu , mutumukumuna mutu nulamwina ku yipikalo yeswe . ¹⁵ Maswalale atambwile mbongo alingile chize chene ngwe aalongesele. Niliji lino linafumana hakachi ka Ayunda ndo kutangwa lino. ¹⁶ Alyoze e tumbaji kumi nyi umuwika ayle ku Ngalileya , ku mulundu uze aashikile kulu kuli Yesu . ¹⁷ Muze amumwene amuwahilile , alyoze amwe ayambashanine. ¹⁸ Yesu wakundamine kuli ayo nyi kuhanjika kuli ayo ngwenyi , '' Haanangwehe yiyulo yeswe mwilu nyi hashi . ¹⁹ Keshika yenu nukatayise tumbaji a ku mavungu eswe . Nuka papachise mu jina lya Tata, nyi lya Mwana, nyi lya Shipilitu Musandu. ²⁰ Nukalongese kufuma yuma yeswe yize nanuhele. Nyingikenu, Ami kunguli hamuwika nyi yenu matangwa ewe ndo kumanunuka cha mwaka.''