¹ Hohene yesu yamba ku mbunga nyi kuli tumbaji jenyi. ² Yamba ngwo,''Akwa ku sonyeka nyi Afwaliseu hanatwame mu chitwamo cha Mose. ³ Halyapwila yeswe manwamba lingenu nyi ku yifunga . Alyoze kanda nulinga yilinga yo, mumu kakuhanjika yuma alyoze keshi kuyilinga . ⁴ Ewa , kakukasa yiteli yilemu yize yikalu kumbata mba mayitwika hayipaya ya atu. Alyoze ayo ene keshi kuyitutulula chipwe nyi munwe umuwika. ⁵ Kakulinga yitanga yo yeswe hanga akamoneke kuli atu. Mumu kakutohwesa yipenya yo nyi kutohwesa mapula jo. ⁶ Kazanga yihela yakulutwe ku yiteleka nyi yitwamo yakulutwe mu sunangonga, ⁷ nyi kwameneka muyitanda , nyi kwavulwoka kuli atu ngwo Longeshi. ⁸ Alyoze kanda akanuvuluka ngwo 'Longeshi'mumu nuli nyi Longeshi umuwika, mba enu eswe nuli mandumbu. ⁹ Mba hano hashi kanda nuvuluka umwe ngwo Tata, mumu Tatenu umuwika nulinenyi, mba kali mwilu. ¹⁰ Chipwe kanda anuvuluka ngwo 'Longeshi', mumu nuli nyi Longeshi umuwika , mwe Kilishitu. ¹¹ Alyoze yoze munene unahyana hali yenu mapwa ndungo wenu. ¹² Mweswawo malinangamisa kuma ka mulelesa. Mba mweswawo malilelesa makamunangamisa. ¹³ Alyoze lamba lyenu , akwa kusonyeka nyi Afwaliseu , yilembese! nwajila wanangana wa malilu hali atu. Mumu kunwa njililemo yenu ene, chipwe waze mazanga kunjila kunushi kwatayiza. ¹⁴ Lamba lyenu, akwakusonyeka nyi Afwaliseu yilembese! mumu nwakuvumbula mazuwo ja twamishi ja mapwo, shimbu te , ha ulembekese , nwaku lemba yipinji yisuku . Keshika kumunukatambula upatwilo wahiana. ¹⁵ Lamba lyenu , akwa kusonyeka nyi Afwaliseu , yilembese! mumu nwakunjika kaulunga lwiji nyi hashi homu mukutayiza kambaji umuwika ; nyi muze hata , nwakumupwisa mukwa heteze yisulo yali kuhyana yenwene. ¹⁶ Lamba ,lyenu, tusonga akupuputa , yenu nwa kuhanjika ,'' Mweswawo malishinga nyi tembele , chamokomoko . Alyoze mweswawo malishinga nyi olu ya tembele , iye kalikasa,' ¹⁷ Yenu yihepuke tupuputa ! chili chilemu ,hakachi ya olu nyi tembele yize yakupwisa olu usandu? ¹⁸ Mba , ' Mweswawo malishinga nyi chilumbilo, chamokomoko. Alyoze mweswawo malishinga nyi mulambu wuze wuliho, iye kalikasa.' ¹⁹ Yenu atu tupuputa! chili chilemu , hachi ka mulambu nyi chilumbilo chize chakupwisa mulambu usandu ? ²⁰ Halyapwila , yoze malishinga nyi chilumbilo kalishinga nyi yeswe yize yiliho. ²¹ Wuze malishinga nyi tembele kalishinga nyi wuze watwamamo. ²² Mba wuze malishinga nyi malilu kalishinga nyi ngunja ya Zambi nyi yoze watwamaho. ²³ Lamba lyenu, akwa ku sonyeka nyi Afwaliseu , yilembese! mumu nwaku fweta chihanda cha kumi cha ku chimbumba nyi endulu nyi kominyu, Alyoze hinunalelesa yuma yilemu yahyana ya shimbi- upatwilo wa kulita nyi keke nyi ufulyelo. Alyoze yino chanutamba kulinga kanda nulelesa yikwo. ²⁴ tusongo atupuputa ,nwakusala kangunu alyoze nwakumina kamelu! ²⁵ Lamba lyenu, akwa ku sonyeka nyi Afwaliseu, yilembese! mumu nwakutomesa haze lya musenge nyi panda , alyoze mukachi himunazale nyi mbenga nyi kuhungumuka nyi solo. ²⁶ Yene Kafwaliseu kapuputa! chitangatu pemesa mukachi kamusenge nyi mukachi ka panda, hanga haze lyayo hakapeme. ²⁷ Lamba lyenu, akwa ku sonyeka nyi Afwaliseu , yilembese! mumu nunapu ngwe mafuka akutomesa nyi pemba, waze haze akusoloka kupema , alyoze mukachi munazale nyi yifwaha ya atu akufwa nawa nyi luchisa mweswe. ²⁸ Chochene , nyi yenu nawa hazs nunasoloka akwa ululi kuli atu, alyoze mukachi hinunazale nyi yilembese nyi uhulia. ²⁹ Lamba lyenu, akwa kusonyeka nyi Afwaliseu , yilembese! mumu nwakutunga mafuka a tupulofeta nyi kuwahisa mafuka ja akwa ululi. ³⁰ Nwakwamba ngwo, 'kachi yetu tunakatwama muma tangwa ja akaka jetu, kate twa kalifutwile ha manyinga ja tu pulofeta. ³¹ Halyapwila nwakulishindakenya yenwene nuli ana waze ashihile tupulofeta. ³² Yenu nwakuzalisa njongo ja akakenu. ³³ Yenu tupela, vungu lya yihili, kuchi nukaseunuka upatwilo wa Ngehena? ³⁴ Halyapwila , talenu, ngunanutumina apulofeta nyi akwa mana nyi akwa kusonyeka. Amwe munuwa shiha nyi kuwa hachila, mba amwe nuwa lamba nyi shikote mu masunangonga jenu nyi kwatuhwisa mu limbo nyi limbo. ³⁵ Hanga manyinga eswe a ululi akumwangana hano hashi akeze hali yenu, chize kumanyinga akwa ululi Ambele, ndo kumanyinga ja Zakaliya mwana Mbalakiya, wuze nwashihile hakachi ka tembele nyi chilumbilo. ³⁶ Chamwenemwene ngunambe kuli kuli yenu, yuma yeswe ayi muyikeza hachisemuko chino. ³⁷ Yelusaleme, Yelusaleme, yena washiha tupulofeta nyi kwasa mawe waze atumine kuli yena! Yisuho yapwa haha hingunazange kukungulula ana je , ngwe chize chali akukungulula ana jenyi mwishi lya ma pulwa jenyi, alyoze kunwakatayileko! ³⁸ Talenu zuwo lyenu hananuhichika lya hululu. ³⁹ Mumu ngunambe kuli yenu , Kunushi kangumona chize kulyapwila ndo munwamba ngwenu 'kawaha yoze meza mujina lya Mwene.'''