¹ Muze te Yesu hamanununa maliji ano , wakatukile ku Ngalileya nyi wejile kumanjiza ja Yundeya kuze kanda lya kalwijiwa Yolondawu . ² Mbunga yinene amu kawile , nyi yiye wa awukile . ³ Afwaliseu ejile kuli yiye , akamweseke , ngwo, '' Muchilita nyi shimbi hali mutu kulakula mukwo pwo ha chikuma cheswacho nyi/'' ⁴ Yesu waakumbulwile nyi kwamba ngwenyi , '' kunwatangile lunga nyi pwo ? ⁵ Nyiyoze waatangile nawa yamba ngwenyi , hachikuma chino mutu akahichike tata nyi naye akalinunge nyi mukwo pwo, ano aali kumakapwa musunya umuwika . ⁶ Chocho hi aali nawako , alyoze musunya umuwika . Chize keshika Zambi hananungu, mutu myiumwe kanda akachi handununa.'' ⁷ O yamba kuli iye ngwo, '' kuchi te kevwe Mose watushinjiilile kuhana mukanda wa kulakula mba akamutwale?'' ⁸ Iye yamba kuli ayo ngwenyi , '' Hakukala cha mbunge jenu , Mose wanutaijile kulakula akwenu mapwo, alyoze chize ku uputukilo kuchapwile chocho . ⁹ Alyoze ngunambe kuli yenu ngwami, mweswawo malakula mukwo pwo shina ha upangala , mba mambata mukwo, walinga utanji; nyi yoze mambata yoze hanamulakula malinga utanji.'' ¹⁰ Tumbaji twenyi yamba kuli iye ngwo , '' kachi chikuma cha mutu muchipwa chocho nyi mukwo pwo, kachci hichipemako kumbata.'' ¹¹ Alyoze Yesu wambile kuli ayo , '' Eswe kahashile kumbata liji lino , ndo waze aahelelyo. ¹² Mumu kwali aunuku waze asemukine chocho kujimo lya anaye, kwali aunuku waze aapwishile aunuku kuli atu , kwali aunuku waze alipwishile aunuku mumu ha wanangana wa malilu . Yoze mahasa kutambula lino longeso , akalitambule.'' ¹³ Mba anehene kuli iye ana akepe hanga asayike moko jenyi hali ayo alembe , alyoze tumbaji aakanyishile . ¹⁴ Alyoze Yesu wambile ngwenyi , '' Taizenu ana akepe , kanda nwakanyisa kwiza kuli yami , mumu wanangana wa malilu wa wano ene .'' ¹⁵ Wasayikile moko jenyi hali ayo , mba wakatukile kuze nyi kuya. ¹⁶ Mba , umwe lunga wejile kuli iye ngwenyi, '' Longeshi ,chuma chipema chika mungulinga hanga ngukapwe nyi mwono wa mutolo ? ¹⁷ Yesu wambile kuli yiye ngwenyi , '' kuchite unanguhula ha kutwala ku chipema / kwali umuwika mupema , alyoze kachi unazange kunjila mu mwono , funga maliji a shimbi.'' ¹⁸ Aye yamba kuli iye ngwenyi , ''shimbi jika?'' Yesu ngwenyi , '' kanda ushiha , kanda ulinga utanji, kanda wiya, kanda ushindakenya mahuza, ¹⁹ lemesa tatenu nyi noko , uzange mwenyembo we chizechene ngwe wakulizanga yena mwene,'' ²⁰ Mukweze yamba kuli iye ngwenyi , '' jino jeswe hinguna afungu. Hindu yikwo ika mungufupa?'' ²¹ Yesu yamwamba ngwenyi, '' kachi unazange kupwa mungunu, yako , ulanjise ize ulinayo , ukahane kuli yiswale , mba kumwopwa myi upite mwilu , hanga wize, ungukaule.'' ²² Alyoze muze mukweze wevwile liji lize ahanjikile Yesu , wayile nyi chinyengo, mumu wapwile nyi upite unji. ²³ Yesu wambile kuli tumbaji jenyi , '' Pundu ngunambe kuli yenu , chikalu hali pichi kunjila mu wanangana wa malilu . ²⁴ Cheka nawa ngunambe kuli yena , chili chashi hali kamelu kupalika ndusu muliso lya ndongo kuhyana hali pichi kunjila mu wanangana wa Zambi.'' ²⁵ Muze tumbaji evwile chino , alishimwokenene chikolo nyi kwamba ngwo, ''Iya kevwe mahasa kulilamwina ?'' ²⁶ Yesu waatalile nyi kwamba ngwenyi , '' kuli atu kuchishi kuhasa, alyoze kuli Zambi yuma yeswe muyihasa kupwa.'' ²⁷ Hohene Petulu wamukumbulwile nyi kwamba ngwenyi, '' Talenu , hituna hichika yuma yeswe nyi kukukaula . Ika kevwe mutukapwa nayo?'' ²⁸ Yesu yamba kuli ayo ngwenyi , '' Pundu ngunambe kuli yenu ngwami , mu mwaka waha muze Mwana mutu makatwama ha ngunja yenyi ya uhenya , enu nunangukaula nyi yenu nawa munukatwama ha kumi lya ngunja nyi ngunja jali , nyi kupatwila kumi lya mavungu nyi mavungu aali a Izalele. ²⁹ Nyimweswe hanahichika mazuwo , hanji ana akwo , hanji mandumbu, hanji tato, hanji naye, aana chipwe munda mumu ha jina lyami kumakatambula kulakaji ja yisuho mba makahinga mwono wa mutolo. ³⁰ Alyoze anji atangu kumakapwa akwa kusula , nyi akwa kusula kumakapwa atangu.