¹ Yehova yamba kuli Mose nyi Alone , ngwenyi , ² " Ambenu kuli A-Izalele , ngwenyi , ' Wano e akwa mwono munuhasa kulya hakachi ka tushitu ali hashi . ³ Munuhasa kulya waze eswe ha tushitu ali nyi sende ja kupula mba kakusekula . ⁴ Hindu , hakachi ka waze akusekula hanji kali nyi sende ja kupula , kunuchi kulya wano tushitu ngwe kamelu , mumu kakusekula alyoze , keshi sende ja kupula . Chocho akapwe wa luchisa kuli yenu . ⁵ Nyi sele , mumu ka kusekula alyoze keshi sende ja kupula , akapwe wa luchisa kuli yenu . ⁶ Nyi mbalu , mumu kakusekula alyoze keshi sende ja kupula , akapwe wa luchisa kuli yenu . ⁷ Nyi ngulu , mumu kali nyi sende ja kupula , alyoze keshi kusekula , akapwe wa luchisa kuli yenu . ⁸ Yifwo yo kunuchi kuyilya , chipwe mijimba yo ya kufwa kunuchi kuyikwata . Akapwe a luchisa kuli yenu . ⁹ Tushitu waze atwama mu meya munukalya waze ali nyi yihehe nyi mahalo wika , hanji mu kalunga lwiji hanji mu njiji . ¹⁰ Mba waze eswe keshi nyi yehehe nyi mahalo hanji mu kalunga lwiji hanji mu njiji , hakachi ka waze eswe akwenda mu meya akapwe mu meya nyi akwa mwono eswe atwama mu meya - akapwe a kuvwisa alwaji kuli yenu . ¹¹ Kumakapwa a kuvwisa lwaji kuli yenu kanda nulya yifwo yo ; mba , mijimba yo ya kufwa muyipwa ya kuvwisa lwaji . ¹² Keshika mweswe wa mumeya keshi chihehe nyi mahalo akapwe wa kuvwisa lwaji kuli yenu . ¹³ Wano e thujila makapwa a kuvwisa lwaji - nawa kanda nwalya mumu akuvwisa lwaji : nyi pupa , nyi chihungu , nyi chiselele , ¹⁴ nyi hula-yula , nyi kambuya nyikulita nyi vungu lyenyi , ¹⁵ nyi chikwakalo nyikulita nyi vungu lyenyi , ¹⁶ nyi kakulu nyi chambamba , nyi ngavota , nyi chikoi nyikulita nyi vungu lyenyi . ¹⁷ Nuka vwile lwaji chingulu mukehe nyi munene , katovwi , ¹⁸ nyi chozo nyi toji , nyi kuyu , ¹⁹ chitwanjimbu , nyi chitokola nyikulita nyi vungu lyenyi , nyi kolokokwe , nyi kafukufuku . ²⁰ Waze eswe akwete mapulwa alyoze kakukalala hashi ha molu a wana akapwe a kuvwisa lwaji kuli yenu . ²¹ Alyoze hakachi ka akwa mapulwa akukalala ha molu a wana munuhasa kulya waze ali nyi malinja a kutumbuka no hashi helu lya yilyato nawa . ²² Te wano munuhasa kulya ngwami makumbi nyikulita nyi vungu lyo , nyi mapasu nyikulita vungu lyo , nyi tuzombwela nyi kulita nyi vungu lyo , nyi luzeze nyi kulita nyi vungu lyo . ²³ Alyoze akwa kukalala eswe akwete mapulwa akwenda nyi molu awana akapwe a kuvwisa lwaji kuli yenu . ²⁴ Munukapwa akwa luchisa ndo chingoloshi mweswawo maka kwata ku mijimba yo ya kufwa . ²⁵ Mweswawo makambata chimwe cha ku mijimba yo ya kufwa makakosa mazalo jenyi mba makapwa wa luchisa ndo chingoloshi . ²⁶ Kashitu mweswe kali nyi chilyato cha kupula alyoze keshi nyi sende chikwo nawa keshi kusekula akapwe wa luchisa kuli yenu . Mweswawo maakwata malichisa . ²⁷ Cheswe chize chakwenda ha malinja ha tushitu eswe akwendela ha molu a wana , makapwa a luchisa kuli yenu . Mweswe makwata ku mijimba yo ya kufwa makapwa wa luchisa ndo chingoloshi . ²⁸ Yoze makambata mijimba yoya kufwa makosa mazalo jenyi mba iye makapwa wa luchisa ndo chingoloshi . Mumu o akwa luchisa kuli yenu . ²⁹ Hakachi ka akwa kukalala hashi , akapwe wa luchisa kuli yenu wano : nyi mukondo , nyi tumbi , nyi chitombwe , nyikulita nyi vungu lyenyi , ³⁰ nyi kasulu , nyi chiku , nyi kasengele kwekwe , nyi musevu , nyi nongwena . ³¹ Ha tushitu eswe aku kalala , wano e tushitu waze aluchisa kuli yenu . Mweswe makaakwata muze te hafwa makapwa wa luchisa ndo chingoloshi . ³² Kweswako makaholokela muze te hafwwa , muchipwa cha luchisa , chipwe chikwachilo cha mutondo , chipwe uzalo , chipwe kupu , chipwe njeke . Chuma cheswacho cha milimo yeswayo , chatamba kuchisa mumeya ; muchipwa cha luchisa ndo chingoloshi . Mba muchipema . ³³ Mumu ndoho yeswe ya uma chipwe cheswe chize kashitu wa luchisa makaholokela , cheswe muchikapwa mu ndoho muchikapwa chaluchisa , nyi ye ndoho nukayenyeke . ³⁴ Ya kulya yeswe haze meya ano hanaholokela nuyikapwa ya luchisa , mba ya kunwa yeswe muyikapwa mu chikwachilo cheswacho cha luchisa muyikapwa ya luchisa . ³⁵ Chuma cheswacho haze chihanda chimuwika cha mijimba yo ya kufwa muyikaholokela muchikapwa cha luchisa ; chipwe fono hanji jiko , akayishihe tuyipinji . Mumu yapwa ya luchisa mba kuli yenu muyikapwa ya luchisa . ³⁶ Alyoze fuji lya meya hanji shima lya meya meya anji o makapema ; alyoze mweswawo makakwata ku mujimba yo ya kufwa halichisa . ³⁷ Nyi kachi chimwe cha ku mijimba yo ya kufwa muchikaholokela ha mbuto yize nunambe kukuwa , muyikapema . ³⁸ Alyoze nyi hasa meya ha mbuto , mba chimwe cha ku mijimba yo ya kufwa muyikaholokelaho , muyikapwa ya luchisa kuli yenu . ³⁹ Nyi umwe kashitu mafwa yoze te wa kulya kuli yenu , mweswe makwata ku mujimba wenyi wa kufwa mapwa waluchisa ndo chingoloshi . ⁴⁰ Nyi yoze makalya mwimba wenyi wa kufwa makakosa mazalo jenyi mba makapwa wa luchisa ndo chingoloshi . Mweswe makambata mujimba wenyi wa kufwa makakosa mazalo jenyi mba makapwa wa luchisa ndo chingoloshi . ⁴¹ Mba kashitu mweswe wa kukalala ha mavu akapwe wa kuvwisa lwaji kuli yenu , kanda nukamulya . ⁴² Mweswawo kakulikoka ha jimo lyenyi , nyi yoze wakwenda ha molu a wana , nyi waze ali nyi molu anji anji - te a ku mavungu eswe akulikoka ha mavu , kanda nukaalya , akapwe a kuvwisa lwaji kuli yenu . ⁴³ Kanda nukalipwisa yenwene a lwaji kuli kashitu mweswawo wa kuli koka , chipwe kulichisa no hanga nukalipihise no, ka . ⁴⁴ Mumu yami Yehova Zambi yenu . Keshika munukalihandununa , nukalisele ku usandu , se nyi yami nguli musandu . Kanda nukalichisa nyi kashitu nyiumwe mukwa kulikoka ha mavu . ⁴⁵ Mumu yami Yehova nanuchijile ku chifuchi cha Engitu , ngukapwe Zambi yenu . Keshika munukapwa asandu , se nyi yami nguli musandu . ⁴⁶ Yino ye shimbi ya tushitu , nyi ya tujila, nyi ya akwa mwono eswe akwenda mu meya , nyi ya tushitu eswe akukalala hashi , ⁴⁷ nukahandunune hakachi ka akwa luchisa nyi apema ,hakachi ka mukwa mwono yoze munuhasa kumulya nyi mukwa mwono yoze kunuchi kuhasa kumulya . "'