1
Yehova yamba kuli Mose ngwenyi ,
2
" Amba kuli A-Yizalele , ngwe , ' Nyi umwe pwo maka mita masema mwana wa luinga , makapwa wa luchisa matangwa shimbyali , chizechene ngwe ha matangwa a kulihandununa ha kujila chenyi chocho mapwa wa luchisa .
3
Ha tangwa lyamuchinake mapwisa mwe mwana ngalami .
4
Mba pwo makapwa chizechene mu manyinga jenyi a kumupemesa makumi atatu a matangwa nyi matangwa atatu . Kanda akakwata nyichimwe chuma chisandu chipwe kunjila muma musandu ndo matangwa jenyi a kumupemesa hahwa .
5
Alyoze nyi masema mwana wa pwo , makapwa wa luchisa semana jali , chizechene mu manyinga jenyi . Mba kupemesa cha naye muchikaheta ndo ku matangwa makumi asambano nyi matangwa asambano .
6
Muze matangwa jenyi a kumupemesa hahwa , apwe hali mwana wa lunga apwe hali mwana wa pwo akanehe mwana - panga wa mwaka umuwika akapwe mulambu wa kulumba , akahane nawa mwana - lyembe hanji katele akapwe mulambu ha shili . Kuchikolo cha mbalaka ya chiwanyino , kuli sasendote .
7
Mba iye maulambula kumeso ja Yehova akamufukile shili , mba mapema ku kuhita cha manyinga jenyi . Yino ye shimbi ya kutwala kuli pwo muze masema mwana apwe wa lunga apwe wa pwo .
8
Nyi kahashile kulanda mwana - panga , akande tutele aali hanji ana - amembe aali , umwe akapwe mulambu wa kulumba mukwo a kapwe mulambu ha shili mwe sasendote mamufukila shili ; mba makapema . "'