¹ Nandambe nyi Ambihu , ana amalunga ja Alone , anjile mweswe chikwachilo chenyi , yasamo kahya , nyi insensu . Yalambula kahya keka kumeso ja Yehova , kaze iye ka atumine . ² Mba mwatuhukile kahya kumeso ja Yehova yaalaisha , yafwa kumeso ya Yehova . ³ Henaho Mose yamba kuli Alone ngwenyi , " Chino che chuma Yehova hamba ngwenyi , ' Mungusolola usandu wami kuli waze makakundama kuli yami . Kumeso ja e atu eswe mungukalema . "' Alone yaliholela lume . ⁴ Mba Mose yasanyika Mishaele nyi Elizafwa , ana ja Uziele natu ya Alone , yanda kuli ayo ngwenyi , " Tweyenu nuzundule akwenu kulutwe lya muma musandu nukaachize mu chilombo . " ⁵ Chocho yeza yambata , mu yikuto yo , yaachiza mu chilombo , chizechene ngwe Mose haatuma . ⁶ Mba Mose yamba kuli Alone nyi kuli Eliazale nyi kuli itama , anenyi a malunga ngwenyi , "Kanda nukasulula kambu jenu , chipwe mazalo jenu kanda nwapula , kuchina munufwa , kuchina ufwatulo ukapwile ha chikungulwila cheswe . Alone akwenu , vungu lyeswe lya Yizalele , mahasa kulilila kahya kano Yehova hawika . ⁷ Kanda nutuhuka ku chikolo cha mbalaka ya chikungulwila , kuchina munufwa , mumu hananuwayisa nyi maji kuli Yehova . " O chocho alingile nyikulita nyi liji lya Mose . ⁸ Yehova yamba kuli Alone , ngwenyi, " ⁹ Kanda ukanwa vinyu hanji kunwa chisasu , chipwe yena , chipwe ana je amalunga muze mununjila mu mbalaka ya chikungulwila , kuchina munufwa . Chino chikapwe chiyulo cha mutolo kuli yenu ndusu yisemuko yenu yeswe , ¹⁰ chanutamba kuhandununa yisandu nyi yuma yeswayo nawa hakachi ka yuma yipema nyi yuma ya luchisa , ¹¹ nukalongese A-Yizalele yiyulo yeswe yioze Yehova haakunjika kuli Mose . " ¹² Mose yamba kuli Alone nyi kuli Eleazale nyi Ita,a , anenyi a malunga waze asala ngwenyi , " Andenu mulambu wa wunga uze wasala wa ku milambu ya kahya kuli Yehova , nukaulye kushi futunwiso ku lumbu lya chilumbilo , mumu usandu wahyana . ¹³ Nukalye muma kusandu , mumu nyiwe nyi wa ane a malunga wa ku mulambu ya kahya kuli Yehova , mumu chocho hangutuma . ¹⁴ Pambo lya kuhungisa nyi chilama kahana kuli Yehova , nukalye kuchihela chipema Zambi hataiza . Yena nyi ana a malunga , nyi ane a mapwo hamwe nyi yena nukalye yihandu yino mumu hanakweheyo yikapwe chihanda che nyi che nyi cha ane a malunga , mya ku yitapo ya milambu ya sambukila ya A- Yizalele . ¹⁵ Chilama che kuzundula nyi pembo lya kuhungisa , akayinehe hamuwika nyi milambu ya kahya ya maji , akayi kuhungisa kuli Yehova , Muukapwa wa yena nyi wa ane a malunga hamuwika nyi yena , chihanda chenu cha mutolo chizechene ngwe Yehova hamba . " ¹⁶ Mose yafupafupa mwe pembe wa mulambu ha shili , mba yawana hamwocha . Keshika watenukina nyi Eleazale nyi Itama , ana ja Alone waze asala ; ngwenyi , ¹⁷ " Kuchi te kunwalile mulambu ha shili muma musandu , je wapwa usandu wahyana , mba Yehova hanwahawo kumbata uhenge wa chikungulwila , kufuka shili yo kumeso jenyi ? ¹⁸ Talenu , Manyinga jawo kaanehene muchima lya mumu musandu , chanutela kachi kulya muma musandu , ngwe chize anulwezele . " ¹⁹ Mba Alone yamba kuli Mose ngwenyi , " Talenu , musono halambula mulambu wo ha shili nyi mulambu wo wa kulumba kumeso ja Yehova , hindu chino chuma kichalingiwa kuli yami musono . Kachi nalyanga musono mulambu ha shili , kachi chapemenanga kumeso ja Yehova nyi ? " ²⁰ Muze Mose yevwa chino , chamuwahililile .