¹ Tétéa Yésu lé gblɔna améhawo kudo yiho nusrɔnlawo bé: ² "Eséfialawo kudo Farizitɔwo nanyi dé Mosé ho azikpé ji yi. ³ Yita mido étowo yi miawɔ n'dékpékpé ké ola gblɔ ni mia vɔa miawoya min'gbéwɔ énuké owɔna o, dobéna wɔawo intɔa owun wɔna dé éké olé fia ji o. ⁴ Oblana agban kéwo kpéa tsé dona améwo ho abɔta yi wɔa n'tɔ yi omulé égbésɔsɔ bé wɔatsɔ wɔaho alɔ vi tso kpé dé améawo n'ti tsan o. ⁵ Owɔna wɔaho nukumɔawo bé améwo nékpɔwo ko bé onyi amé nyɔɛ yi. Wɔaho Mawunya, kpuikpui, kudo n'kudoji nuwo kéwo osana dé n'kɔ kudo abɔa kékénawu amédékpékpé tɔ yi odona jési wɔaho awuvlawo n'ti bé améwo nékpɔ bé wɔawo yi nyi amékéwo n'ti kɔa. ⁶ Olɔn na ékplɔ n'ti nɔnɔ kudo énuduhowo, yi olɔna n'kɔ ho azikpéwo ji nɔnɔ lé wɔaho tsɔtsihɔwo mé ⁷ kudo égbédodo tɔhɛwo lé wɔaho bɔbɔ tohowo kudo wɔayɔwo bé "nufiala kudo Apétɔ" évivinana wo n'tɔ. ⁸ Vɔa min'do la na yi wɔalé yɔ mi bé "nufiala", dobé énufiala dika yi lé mia si yi miakpata nɔvi nɔnɔwo yi minyi. ⁹ Yi mi'gbé yɔ amédékpékpé lé anyigba kia ji bé tata nyéwo, dobé tata dika yi lé mia si, yi yilé jipoa. ¹⁰ Yi min'gbéna tsan wɔayɔ mi bé "Nufiala o", dobéna énufiala dika yi lé miasi,yi yinyi Kristoa. ¹¹ Vɔa améké nyi miaho gan tɔa nényi miaho subɔla. ¹² Amékéwo dona wɔadoké dé éjia, ola didiwo dé gɔmé. Yi amékéwo didi wɔadékéwo dé gɔméa, oladowo dé éji. ¹³ Baba ni mi, miawo Eséfialawo kudo Farizitɔwo ajédatɔwo! Mitu jipofiaduhoa ho agbo dé améwo. Miawo n'tɔtsan mimulé imé yigé o, yinti milé jagbagba bé amékéwo lé wɔ wɔaho nutété bé yi wɔagédé iméa bé owun gbé yi imé o. ¹⁴ Baba ni mi, miawo éséfialawokudo Farizitɔwo ajédatɔwo! dobé mitafu ahosiwo yi hɔ wɔaho nu nɔamésiwo lé wosi. ¹⁵ Baba ni mi, miawo éséfialawo kudo Farizitɔwo ajédatɔwo. Dobé midinatsa lé apuwo kudo anyigbawo ji bé miawɔ amédé nétrɔ jimé. Né inyi bé étrɔ jiméa miwɔnɛ yi étrɔna zu zomavɔ ho vi wu miawo n'tɔ. ¹⁶ Baba ni mi miawo ké mi bé minyi kpɔla nkuvi gbagbatɔwo: " né inyi bé amédé tanu kudo tsɔtsihɔa nlé nɛ bé néwɔ énuvɔn o, vɔ né éyɔ sika ké lé tsɔtsi hɔméa tanu la, atéwun blé. ¹⁷ Miawo n'kugbagabanɔwo! n'ka yi lolo tso wu: "Sika alo Tsɔtsihɔ ké kɔ sika n'tia yi? ¹⁸ Yi, "améké tanu kudo tsɔtsi ho vɔsa ho kpéa n'wɔ n'dé kpépké o. Vɔa né inyi bé amédé tanu kudo énujɔjɔ ké lé n'kɔ ni vɔsa ho kpéa do la wɔ dé iji." ¹⁹ Mia amékéwo nyi n'ku gbagbanɔa, nuka yi lé vévédé wu énunana ké lé vɔsakpéa ji yi looo, alo vɔsa ho kpéa ké yin'tɔ wɔna bé énujɔjɔa n'tti nékɔ? ²⁰ Né inyi bé mita nu kudo vɔsa ho kpéa, tété la minya bé mitanu kudo énukéwo ijia kpata, ²¹ yi né mita tsɔtsihɔa, minyɛ bé mita Mawu ho amésiamé ké nɔna iméa. ²² Né inyi bé mita "Jipoa" minyɛ bé mita Mawu ho éfia ho zikpéa kudo Mawu amé ké nɔ ijia. ²³ Baba ni mi, miawo éséfialawo kudo Farizitɔwo, ajédada ho nunɔlawo! Minana adriké, sikɔni kudo tsyo ho énunana améwogɔn a, vɔa mitati éséa ho nu véviétɔ kéwo nyi kojoé dodo énubanuitɔ kudo nyatohowɔwɔ la. Elé ni mi bé miawɔ dé wɔatsa ji bé min'gbé dasi lé édé ji o. ²⁴ Miawo amékéwo nyi n'kugbagbanɔ ho kplɔlawoa! Midéna énujɔjɔ vitukuitɔa lé miaho énu nunuwo mé tsé dana n'gbé, vɔa mi mina ésɔkɛtɛwo ya. ²⁵ Baba ni mi, miawo éséfialawo kudo Farizitɔwo, ajédada ho énunɔlawo! Miklɔna kɔpu kudo agba gbangbawo n'ti, ganké wɔaho dɔméa dɔ kudo énuklénklén kudo amédékétɔ jiji. ²⁶ Farizitɔ n'kugbagbatɔwo! Miklɔ kɔpua kudo agba gbagban a mé tsutsugban tétéa wɔaho n'gbodomé tsan la kɔ. ²⁷ Baba ni mi, miawo éséfialawo kudo Farizitɔ, ajédada ho énunɔlawo! Milé sigbé éyɔdo ho ékpé kéwo n'ti akalo n'léwo nɛnɛ, ékéwo zéna lé éhihé nyɔɛdé yi wɔaho adɔméa nyi amékukuwo ho pu kudo énubuwo nɛnɛ. ²⁸ Nɛnɛ ké yi miawo tsa mi zéna lé éhihé lé améwo gbɔ sigbé minyi améjɔjɔɛwo, ganké lé imé iméa ajédada ho nuwɔwɔ kudo badawɔwɔwo yi lé miaho éjiwo mɛ. ²⁹ Baba ni mi, miawo éséfialawo kudo Farizitɔwo, ajédada ho nunɔlawo! Mitu éyɔdo na ényagblɔdilawo yi mijra éyɔdo mé na améjɔjɔɛwo. ³⁰ Yi migblɔna bé: "né inyi bé mi ké nɔ agbé lé mia tatawo ho gaméa élanyi bé miawɔ dika kudowo lé ényagblɔdilawo ho éhun kɔkɔ dɛ n'ti o. ³¹ Nɛnɛ yi milé di dasé lé miadékéwo n'ti bé minyi amékéwo wu ényagblɔdilawo ho jijimé viwo. ³² Enyɔ n'tɔ, fifia miwu énuvɔn ké mia tatawo jé yigɔméa nu. ³³ Edanwo ké minyia, édanwo ho jijiméviwo ké minyia lémɔn yi miawɔ yi si lé ézomavɔ ho fɔnbubu ho n'kɔ? ³⁴ Yinti yi n'dɔ ényagblɔdilawo, énuinyalawo kudo énufilawo dida mi, gankéa miwuwo, yi mikan édéwo tsan dé atitsoga n'ti. Yi mipo édéwo lé miaho tsɔtsihɔwo mé yi gbé ti wɔayomé yi édubuwo mé. ³⁵ Enuké léa yi nyi bé amékéwo n'nya édé lé iméa ho éhun ké kɔ dé anyigba tso kaka Abɛl amé jɔjɔɛ ho éhun kɔkɔdɛ ho gaméa kaka va jé Zakari, Bakari ho via, kéwo miwu lé vɔsa ho kpéa kudo kɔkɔɛ toho ho dodomé lé tsɔtsihɔaméa ho hun lava mia ji. ³⁶ Lé nyatoho méa n'lé gblɔ ni mi bé, énukéawo kpata lava jijimé kéawo kpata ji. ³⁷ O, Yéruzalɛm, Yéruzalɛm, éwo ké wuna ényagblɔdilawo yi dana ékpé amékéwo odɔ didawoa! N'ji bé mabɔ éviwo wo sigbé léké koklonɔ bɔna éviawo dé yiho aflaka mɛ, vɔa migbé yi mi n'dé émɔ num o. ³⁸ Fifia mikpɔ miaho ahowo gban. ³⁹ Dobé n'lé gblɔɛ ni mi bé kudo kakadé iji bé mijagbé kpɔm lo kaka vado gakémé mila gblɔ bé wɔayra améké gbɔna lé Apétɔ ho n'kɔmé."