¹ Yésu do lé tsɔtsi hɔamé yi yikɔ. Tétéa yiho nusrɔnlawo va gogoé bé wɔatsɔ susu va tsɔtsihoa ho tutu gbɔ. ² Vɔa édo yinti nuwo bé: "Mi n'lé kpɔ énukumɔawo kpata? Lé nyatoho méa, nlé gblɔɛ ni mi bé, ékpé dé n'ja nɔ ékpé dé ji yi nému wo." ³ Ké inyi bé énanyi dé Olivia ho toajia, yiho nusrɔnlawo va igbɔ lé bébémé yi olé biɔɛ bé: "Gblɔ ni mi, gakamé yi énukéawo wɔava imé. N'kayi lanyi jésiawo kudo énukéwo ladé tsé fia bé énuwuwua va do?" ⁴ Yésu do yinti nuwo bé: "Mikpɔ miadékéwo ji nyɔɛdé bé amédé n'gbé va blé mi o. ⁵ Dobé amé sugbɔ lava lé n'kɔ nyé ji yi wɔagblɔ bé:" ényé yi nyi Kritoa," yi amé sugbɔ la tiwo do. ⁶ Milasé ola lé honu tso ava wɔwɔwo n'ti kudo ava wɔwɔ yéyéwo n'ti; min'gbé tsaka lé miadékéwo mé, dobé énukiawo kpata ola va imé; vɔa n'kpɔ nyi éhihéa ho nuwuwu o. ⁷ Dobé édukɔ latso dé édukɔ n'ti, yi éfiadu latso dé éfiadu bu n'ti. Edɔ wɔamé lado yi anyiba lawuwu lé toho sugbɔ. ⁸ Vɔa énukéawo kpata lanyi vévéséséawo ho gɔméjéjé. ⁹ Lé gakumɔa méa améwo latsɔ mi dé asimé na éyométilawo kudo améwulawo. ¹⁰ Amé sugbɔ latso da lé yiho hɔsé gbɔ, wɔatsɔ wɔaho nɔviwo tsé sa na amé badawo yi wɔatsri wɔanɔnɔɛwo ho énya gbɔ. ¹¹ Tétéa ajédada ho ényagblɔdilawo wɔasugbɔ yi wɔatra amésugbɔ. ¹² Enuvɔn wɔwɔ lasugbɔ yi ahɔ toho nanyi, amésugbɔwo ho lɔlɔn atsi. ¹³ Yi améké lanɔté dé éséawo n'ti yi kaka énuwuwua wɔakpɔ dédé. ¹⁴ Yi Mawu ho énya nyɔɛ, ola honu tso yinti lé éhihéa mé kpata, sigbé dasé didi na édukɔwo kpata. Yi énuwuwua la va. ¹⁵ Enukum ta, né mikpɔ busunuwo ké latsɔ gbégblén va sigbé léké ényagblɔdila gblɔ lé toho kɔkoé (améké la hlɛn né sé igɔmé), ¹⁶ yi amékéwo lé Yudéa onési yi étoaji, ¹⁷ yi améké lé yiho éhɔtaméa n'gbé gbé diva bé énya tsɔ n'dé lé yiho ahoaméwo, ¹⁸ yi améké lé yiho ébomé n'gbé tso bé yi yikɔ ahomé bé yéa va tsɔ yiho awu lɔbɔ o. ¹⁹ Baba ni éfunɔwo kudo amékéwo si évi léa lé n'kéké kumɔawo mé! ²⁰ Midogbéda bé miaho sisi ho n'kékéa nanyi avuvɔ ho gamé o alo Sabbat ho n'kéké jio. ²¹ Yi lé gakumɔa mé ava wɔwɔwo ké n'jɔ kpɔ tso kaka éhihéa ho gɔméjéjéa majɔ o. ²² Né n'kéké kumɔawo n'va do wɔa amékpékpé n'ja kpɔ dédéwo; vɔa hado amétsatsawoa, gaméa latsɔ. ²³ Tétéa né inyi bé amédé toni mi bé: "mikpɔ, Kristoa lé gɛké, alo élé guwunwɔa, min'gbé kadé ijio. ²⁴ Dobé ajédada ho Kristowo kudo ajédada éyagblɔdilawo lava yi wɔawɔ nukunu ganwo lé miaho n'kumé tsagbé miabu miaho hɔsé, Mawu ho amétsatsawo n'tɔ tsan lé imé. ²⁵ Mikpɔ, n'ti gblɔɛ ni mi jé n'kɔ." ²⁶ Né otoni mi bé: "Mikpɔ, Kristoa lé égbédadaho, min'ja yia; alo élé éhɔmé yi léhɔ améwo, min'kadé ijia oa. ²⁷ Sigbé lé n'dɔkusu bina tso yiho fɔnfɔn toho kaka vayi yiho mlɔmlɔ tohoa, nɛnɛ yi amégbétɔ ho via lava. ²⁸ Toho ké élan kukuwo léa gawun yi akangawo tsan nɔna ²⁹ Né tsakatsaka ho gamé kumɔawo va yi vɔa, dɔkusu magbé bi lo, wlé labu yiho kéklɛn a, yi wlétiviwo la gén tso jipo, yi jipo ho n'sénwo la tso ji. ³⁰ Tétéa amégbétɔ ho vi ho jésia lazén lé hihéamé, yi hihéamé fiaduhowo kpata lalé hanu. Wɔakpɔ amégbétɔ ho via anɔ awujaja mé gbɔna kudé n'sé kudo kafukafu. ³¹ Lé ékpén ho didi sénsén dé mé yi yiho dɔlawo wɔabɔ amétsatsawo lé aya hoho toho aménéawo, tso jipo va anyigba ji. ³² Fifia misrɔnu tso égbo ho ati gbɔ. Né inyi bé étsin do yiho alɔ zézé tohoa yi do amakpawoa, mianyɛ bé akudidi ho gamé va do. ³³ Nɛnɛké né mikpɔ bé énukéawo kpata lé va iméa mianyɛ bé vava nyé gogo. ³⁴ Lé nyato méa, n'lé gblɔɛ ni mi bé jijimé kéawo kpata n'ja va yi kungbɔho énukéawo néjɔ o. ³⁵ Jipo kudo anyigba la vayi vɔa énya nyé ya la nayi tsé yi. ³⁶ Vɔa énuké kan nkéké kumɔa kudo gamé kumua, amédékpékpé n'yɛwo, jipo dɔlawo n'tɔ tsan n'nyawo, amégbétɔ ho via n'tɔ tsan, tata dika ko yi nya n'kékéa. ³⁷ Sigbé léké éjɔ lé Noa ho gaméa nɛnɛ yi amégbétɔ ho vi la va. ³⁸ Nɛnɛ kéyi tsé do n'kɔ na étsi dɔdɔ ho gaméa, améwo lé dunu yi lé nu énu, olé dé ésrɔnwo yi lé jiviwo, yi wɔaho viwo tsan olé dé ésrɔn va do kaka gakémé Noa va do adakawun a mé. ³⁹ Yi omunya énuké ja va jɔ o, vado gakémé étsidɔdɔ va yi kploaméwo yi. Nɛnɛ yi élanɔ lé amégbétɔvi ho vava gamé. ⁴⁰ Tétéa amé amévé lanɔ ébomé yi wɔava kplɔ amédika ji yi amédika kpɔtɔɛ la tsi. ⁴¹ Nyɔnu amévé la lé tu bafo, wɔatsɔ dika ji yi wɔatati évégɔa. ⁴² Yinti n'lé gblɔɛ ni mi bé mianɔ nujɔ dobé mimunya gakémé miaho apétɔa la vao. ⁴³ Vɔa mido la nyɛ bé né inyi bé aho nya gakémé fiafitɔ la va fin yi nuwo lé ézan méa, éla nɔ n'jɔ yi bé fianfi n'gbé va fi o. ⁴⁴ Enukum ta n'lé gblɔ ni mi bé miatsa mianɔ n'jɔ, do bé amégbétɔ ho via la va sigbé fiafitɔ nɛnɛ. ⁴⁵ Minyi subɔla énutoho wɔala kudo adawun déla kéwo wɔaté kpɔ aho ji, yi wɔana énududu évinyéwo dé gamé jia? ⁴⁶ Wɔayra subɔla ké apétɔa lava dogoé né inyi bé élé wɔ dé iji. ⁴⁷ Lé nyato méa n'lé gblɔɛ ni mi bé apétɔa latsɔɛ do n'kɔ na énukéwo lé isia kpata. ⁴⁸ Vɔ né subɔla bada dé n'tɔ lé gblɔɛ lé yidoké mé bé: "Apétɔnyé n'ja va fifiwo", ⁴⁹ yi lé tafu subɔla kpɔtɔɛwo lé du kudo aha mumua; ⁵⁰ subɔla kuwuan ho apétɔ lava lé gakémé subɔla n'tsɔ nku tsé dadɛ bé éla va wɔa ji. ⁵¹ Yiho Apétɔ lapoé yi la ŋɛ wluiwlui yi ado yiho toho nɛ sigbé ayéménuwɔtɔwo, lé toho ké avi fafan kudo énuhaha lé.