¹ Yésu gbé honu niwo ké lé élododo mé lé gblɔ bé: ² "Jipo fiaduhoa lésigbé Efia dé ké jra ésrɔn dédé ho azan ni évia. ³ Edɔ yiho subɔlawo bé wɔava yɔ amékpékpéawo va, ganké wɔawo ya ogbé bé yéwo n'ja va o. ⁴ Efia gbé dɔ subɔlabuwo tsé yina amékpékpéawo ké bé oné tonuwo bé: "n'dékpékpé sɔgbé ni azan vɔ, énududua mivɔ, amésiamé néva kaba." ⁵ Ganké amékpékpéawo owun tsɔ édé lé imé nawo. Ojo yi wɔaho jijiwo, amé dika yi ébomé, yi améka tsan yi édɔwo mé. ⁶ Yi édéwoya bi ji n'tɔ yi lé éfia ho subɔlawo yi powo nyɔɛdé yi wu édéwo n'tɔ tsan. ⁷ Tétéa, Efia tsan biji yi dɔ yiho sɔjawo ova wu amékpékpéawo yi tɔzo édua kpata. ⁸ Lé ékiawo ho n'gbéa, éfia gblɔ na yiho subɔlawo bé: "n'dékpékpé sɔgbé ni n'kékéa ho nududu vɔa amékéwo n'kpéwoa omujé ni bubu ké n'tsɔ niwo. ⁹ Yintia miyi émɔtatawo kudo ablɔwo ho kɔnawo ji yi amésiamé ké miakpɔ ko la, mikpéwo oné va yi miadu azan." ¹⁰ Subɔlawo wɔ dé énya kia ji, yi lé madidi méa okplɔ améwo va sugbɔ, amé nyɔɛwo kudo amé badawo. Nɛnɛ yi ésrɔdédéa ho ahoaméa yɔ kudo améwo. ¹¹ Vɔa ké éfia do éhɔamé bé yéakpɔ amékpékpéawo yi yadogbé niwɔa, ékpɔ n'tudé ké n'do azan ho awu o. ¹² Efia lé biɔ bé: "Ehlɔnyé, lémɔ néwɔ kén'gbɔ yi odo géké yi omu do azan ho awu o? Tétéa n'tsua tsi ya n'ya énya ké éla gblɔ o. ¹³ Tétéa éfia dégbé ni yiho subɔlawo bé: "oné lé n'tsua yi oné bla yiho alɔ kudo afɔ yi wɔatsɔɛ ji lé gɛké va dangbé dé viviti mé toho ké avi kudo adu dudu lé." ¹⁴ Dobé owɔ amésugbɔ vɔa amé vidé koyi otsɔ." ¹⁵ Tétéa Farizitɔwo ojoyi va lé ji léké wɔawɔ yi tsɔ énya do Yésu n'ti kudo yi n'tɔ ho numéyawo. ¹⁶ Odɔ wɔaho nusrɔnlawo tsé kpé dé Hérodia tɔwo yi ova lé bia Yésu bé: "nufiala mi nya bé améké sɔgbé kpata yi onyi, yi néfia Mawu ho mɔ lé nyatoho mé. Améwo ho énya gblɔgblɔ n'wɔna n'dé nawo, dobé omutsɔna édé lé imé niwo alo énuké onyia mé o. ¹⁷ Fifia gblɔɛ ni mi, n'ka yi nyi susu wɔa? élé itoho bé wɔajɔ édu ho éga ni Kayizaroa alo n'lé itohowo?" ¹⁸ Tétéa Yésu nya wɔaho énu bada kéodo dé étaméa iya n'ti élé biawo bé: "miawo ajédada ho nunɔlawo! mɛkayi milé ji bé miado gamɔ na yi kudo miaho biabiawo?" ¹⁹ Mitsɔ éga dé ké mitso tu na édu nim yi makpɔ. ²⁰ Yésu biawo bé: "mɛka ho nɔnɔmé tata kudo n'kɔ yi lé éga ji yi?" ²¹ Odo yinti nɛ bé "kayizaro yi." Tétéa Yésu gblɔ nawo bé: "ényɔ, mitsɔ kayizaro ho nu tsé na kayizaro, Mawu tɔ tso na Mawu." ²² Ké osé doéntia, otsi ya wɔakpata yi okaka tati yi dika. ²³ Ganké gbékumɔa gbéa, Zadukitɔwo déwo kéwo n'lé hɔsé bé amékukuwo la tso lé énuwuwɔa va Yésu gbɔ yi lé biɔ béna: ²⁴ "Apétɔ? Mosé toni mi bé né n'tsu dé ku yi n'jivi wɔa, élé bé nɔvia n'tsu nédé ahosia yi wɔajivi tsagbé dévia nényi améké kua tɔ." ²⁵ Nɔvi n'tsu amadrɛn déwo lɛ. Gbantɔa désrɔn yi ku tati nyɔnua évi maji maji, yi améké jɔ do yiho yoméa tsɔ ahosia tsé wɔ ésrɔ; ²⁶ yi itsa ku sigbé fofo évi majimaji ké; yi étɔngɔa kaka vayi amandrɛn gɔa ji oku kpata yi dati nyɔnua. ²⁷ Tséyi ijia nyɔnua tsan va ku ji. ²⁸ Fifia gblɔ ni mi, lé tsitrétsitsia jia mɛkayi la dé nyɔnua, dobé wɔakpata odé. ²⁹ Vɔa Yésu do yinti lé tonuwo bé: "milédavo n'tɔ élabéna min'lésé ŋlɔŋlɔwo kudo Mawu ho nusén a gɔmé o. ³⁰ Dobé lé tsitrétsitsi ho n'kékéa jia, ésrɔ dédé n'ja gbé nanyi o yi min'ja yi ésrɔndédé tohowo; dobé améwo kpata lanɔ sigbé Mawudɔlawo kéwo lé jipoa nɛnɛ. ³¹ Vɔ né énuké kan amékukuwo ho tsitrétsitsia, mabia mi bé mi mimu hlɛn énuké Mawu ŋlɔ ni mi bé: ³² "N'nyi Abraham ho Mawu, Isak ho Mawu, kudo Yakobo ho Mawu oa? Mawu n'nyi amékukuwo ho Mawu o, vɔa améké lé agbéwo ho Mawu." ³³ Yésu ho dotian wɔ nukunu nuwo n'tɔ. ³⁴ Eké Farizitɔwo sé bé Yésu na bé Zadukitɔwo o bɔnua, obɔ wɔadékéwo zidéka. ³⁵ Yi wɔadométɔ dika, améké nyi éséfiala gandéa té Yésu kpɔ yi lé biɔ bé: ³⁶ "Apétɔ ésé ka yi nyi ésé ké kpé tsowu lé éséawo mé?". ³⁷ Yésu do yinti nɛ bé lɔn Apétɔwo Mawu kudo éjiwo kpata, luvɔwo kpata kudo susu kpata. ³⁸ Iya yi nyi ésé tsutsugban tɔa kudo éké kpatsɛ ni éséawo kpata. ³⁹ Eké gbé ti doa yi nyi bé: "nalɔn évégɔnwo sigbé owo n'tɔ nɛnɛ." ⁴⁰ Odo ésé buwo kpata kudo ényagblɔdiwo ho nyawo do ésé amévé kéawo ji yi." ⁴¹ Lé ékia ho n'gbodoméa Farizitɔwo va bɔ dɔé, yi Yésu lé biawo énya. ⁴² Lémɔyi yi mi kpɔɛ mɔ tso Yésu n'ti? Mɛka ho vi yi ényi Kristɔa? Odo yinti nɛ bé: "David ho vi yi." ⁴³ Yésu gbé biawo bé: "Né inyi bé David vi yi la, n'kajɔ ké gbɔgbɔ kɔkɔé diva David yi élé ho nua élé yɔ Mésia bé Apétɔ do? ⁴⁴ Mawu gblɔ na Apétɔnyé bé: "nɔanyi dé nudisi ji nam vasédé gakémé matsɔ éfuntɔwo wo tsé wɔ tɔwo ho afɔtutunu!" ⁴⁵ Né inyi bé David yɔna Kristo bé: "Apétɔ" fifia lémɔyi ényi David ho vi mɔ yi?" ⁴⁶ Biabia lolowuwo yi owun té do yinti nɛ o. Yi tso n'kéké kumɔaji wɔadométɔ dékpékpé n'gbé lé wɔ biabia nɛ o.