¹ Elo dodo bu ké Yésu gbé do lé jipo fiaduhoa nua yi nyi bé: "Ebotɔ dé do gbédéka lé n'dikanya mɛ bé yéahɔ apatɔwo bé wɔawɔ édɔ lé yiho vin boa mé." ² Ké inyi bé yikudo apatɔawo sé wɔa nɔnɔɛwo gɔméa vɔa bé wɔatu sidi wuiévé niwo n'kéké dika, étsɔwo tséyi vin boamé bé wɔajé édɔa gɔmé. ³ Egbé do lé gapopo étɔn gɔaji yi égbé kpɔ apatɔ buwo lé édɔjipé ké owun lé wɔdɔ déwo. ⁴ Egblɔ niwo bé: "miawo tsan miyi vin boa mé, matu éfɛn nɛnɛ ké milé jia nu mi." Tétéa oyi yi vawɔ édɔa. ⁵ Yi kéa, égbé do lé gapopo amadɛn gɔa kudo amasidékɛ gɔan ji yi gbé wɔwɔ nɛnɛ ké. ⁶ Yi gbé tséyi ijia égbé do lé gapopo wuiédéka gɔan jia égbé do yi gbé kpɔ amébuwo tsan yi lé biawo bé n'ka n'ti yi milé gɛké édɔdékpékpé mawɔ mawɔ; yi élé biawo bé n'ka inti yi minɔ anyi léké kpo édɔdé mawɔmawɔ lé n'kékéa kpata ji o?" ⁷ Odo yinti nɛ bé: "dobé amédékpékpé n'hɔ mi bé miawɔ édɔ nɛ o." Egblɔ nuwo bé, miawo tsan miyi vɛn boa mé bé miawɔ édɔ. ⁸ Fiɛsi va do, ébo tɔa to ni yi éboaji kpɔla bé: " néyɔ apatɔawo yi nétsɔ édɔwɔwɔawo ho éga niwo tso amé kpɔtɔɛ kpɔtɔɛa ji." ⁹ Ké apatɔ kéwo va lé gapopo wuiédékɛa jia étsɔ n'kéké dika ho éga niwo kpata. ¹⁰ Ké amékéwo va lé n'dékén mé futuwo va doa owɔɛsé bé ola tu fé nɔwo wu éké otu na amé kpɔtɔɛtɔɛawo vɔa dika ko yi otu ni wɔakpata. ¹¹ Ké wɔatsan ohɔ wɔaho éga vɔa, olé hanu lé wɔaho ébotɔa gbɔ. ¹² Olé gblɔ bé: "vɔa amékpɔtɔɛawo ya owɔdɔ gapopo dika ko yi tsa ohɔ éga dika kudo mi miawo ké miva éboamé tsutsugban yi wɔdɔ lé n'dɔkusu mɛa." ¹³ Vɔa éboa ho amégan do yinti ni amédika lé wɔa mévéa mé bé: "Ehlɔnyé bada kayi n'wɔ kudowo. Enyé kudo mi mihonu lé éga ké matu ni mia kén'gbɔ yi miyi éboaméa?" ¹⁴ Mihɔ énuké nyi miatɔ yi miayi; ényé n'tɔ yi éjro bé matu fɛn niwo nɛnɛ sigbé miawo tsan. ¹⁵ Alo nyémuwɔ ésé bé mawɔ énu nyɔɛ wɔa? Alo mia do dɔmézozo dobéna n'wɔ nyɔɛa? ¹⁶ Fifia misé igɔmé nyɔɛ bé amé kpɔtɔɛ kpɔtɔɛa la nyi tsutsu gban yi amé tsutsugban la nyi kpɔtɔɛa. San ho nu ŋlɔŋlɔ nyɔɛawo oŋlɔbé énya kia bé: "oyɔ amé sugbɔn va, vɔa vidé ko yi otsan lé wɔamé." ¹⁷ Ké Yésu lé jo yi Yéruzalɛm mɔa, éyi kudo yiho nusrɔnla wuiévéawo. Lé wɔaho zɔnzɔn mé lé émɔ jia, élé tonuwo bé: ¹⁸ "Mikpɔ, milé yi Yéruzalɛm yi wɔatsɔ amégbétɔ ho vi la dé alɔmé na édɛnkɔnu méganwo kudo agbalɛn nyalawo. Ola drɔn vɔnu nɛ, yi wɔawui ¹⁹ yi wɔatsɔɛ na étrɔn subɔlawo bé wɔakɔé, do funyafunya kudoé yi wɔakɛn dé atitsogan n'ti. Vɔa lé n'kékétɔ ho n'gbédoméa, élafɔn tso amékukuwo domé." ²⁰ Tétéa Zébédéo ho ésrɔn va Yésu gbɔ kudo éviawo. Ejé klo lé n'kumé nɛ yi lé biɔɛ n'dé. ²¹ Yésu do yinti nɛ bé: "n'ka yi olé ji yi?" Edo yinti nɛ bé: "wɔ bé évinyé amévéawo oné nɔ anyi lé nudisiwo kudo émiɔwo mé lé jipo fiaduhoa mé." ²² Vɔa Yésu do yinti bé: "omunya énuké olé bia o. Elé biawo bé mia tsan mi sɔgbé la té sé vévé ké n'lé ja séa?" Odo yinti nɛ bé: "misɔgbé." ²³ Etonuwo bé: "Adidoa, miaté kpé fua kudom. Vɔa anyi nɔnɔ dé alɔ dusi nyé kudo émiɔ jia munyi ényé yi la tsɔɛ ni mi o, dobé étɔnyé n'tɔ ti jradoé na amékéwo éjéna bé wɔakpɔ égomé lé imé." ²⁴ Ké énusrɔla améwo kpɔtɔɛ kéawo sé énya kéa, obiji vévédé kudo wɔa nɔvi évéawo. ²⁵ Tétéa, Yésu yɔwo va idoké gbɔ yi tonuwo bé: "minya, étrɔnsubɔlawo ho amégawo kpatsɛ niwo nɛnɛ ké yi wɔaho amé n'ku tawo tsan do n'sé dé wɔa ji. ²⁶ Vɔa n'do la nɔ nɛnɛ lé mia mé o. Enuké n'tia améké ji bé yéanyi miaho étatɔ la nanyi miaho subɔvi. ²⁷ Nɛnɛ ké yi améké lé ji bé éla nyi tsutsugban lé mia méa nanyi miaho subɔla, ²⁸ élé bé miaho nuwɔnawo nanɔ sigbé tɔnyé nɛnɛ dobé amégbétɔ ho via n'va bé wɔasubɔɛyé yo vɔa bé yéasubɔ améwo yi yéatsɔ yiho agbé na dé amé sugbɔ ta." ²⁹ Ké odo lé Yériko ho dua méa, amé sugbɔ tiwo do. ³⁰ N'ku gbatɔ amévé déwo nɔanyi dé émɔato. Ké osé bé Yésu vayi kɔa, olé da aha lé gblɔɛ bé: "Apétɔ, éfia David vi kpɔ nublanui ni mi." ³¹ Améha lé tonuwo bé wɔagbɛjɛ aha, vɔa ogbélé gblɔɛ sésɛndé wu tsan tɔa: "Apétɔ, éfia David vi kpɔ nublanui ni mi." ³² Tétéa Yésu tsité, yi lé biawo bé: "n'kayi milé ji bé mawɔ ni mi?" ³³ Odo yinti nɛ bé: "Apétɔ milé ji bé nawɔ yi miaho n'kuviwo néhu yi mia kpɔnu." ³⁴ Tétéa wɔaho nu wɔ nublanui ni Yésu, yi étsɔ alɔ tɔ wɔaho n'kuvi. Zidéka wɔaho n'kuviwo hun yi olé kpɔnu.