¹ Ké Yésu honu kéawo vɔa, éjo lé Galiléa, yi Yudéa ho anyigbaji gogo Yɔdan ho étɔa gbɔ. ² Améwo sugbɔ yi oti do yi élé dagbé lé wɔanti. ³ Farizitɔwo déwo va igbɔ bé yiwɔa doé kpɔ, olé biɔ bé: "n'lé ni n'tsu bé nagbé ésrɔ do susu dékpékpé n'tia?" ⁴ Yésu lé do yinti nuwo bé: "Alo mimu hlɛn bé kaka gɔméjéa, éwɔwo atsu kudo asi yi ma? ⁵ Yi égbé gblɔ bé: "dé susu kéa ta, n'tsu la tso yi tati tata kudo énɔa yi éla va lé dé ésrɔn a n'tia, yi wɔamévéa ola wɔ n'tilan dika?" ⁶ Fifia dé omugbé nyi amé amévé, vɔa n'tilan dika. Ké nyrawua yi nyi bé, énuké Mawu bla amédékpékpé n'gbé do mama imé o." ⁷ Tétéa olé biɔbé "fifia n'ka n'ti yi Mosé do ésé nimi bé n'tsu néna ésrɔngbégbé ho homa ésrɔn a yi négbéwo?" ⁸ Yésu do yinti nuwo bé: "Mosé na mi émɔ bé miagbé miasrɔnwo, élabéna miaho éjimé sésɛn n'tɔ, vɔa gɔméjéa n'lé nɛnɛwo. Yi ⁹ n'lé gblɔɛ ni mi lé nyatoho mé bé, améké lagbé ésrɔn a dé ahasi wɔwɔ n'ti ko ta vɔa susu bu n'ti la yi va dé nyɔnu bu la, wɔ ahasi. ¹⁰ Yésu ho nusrɔla gbɔɛ nɛ bé: "né inyi bé élé nɛnɛa, élakényɔ tséwu bé n'tsu n'gbé dé ésrɔn o." ¹¹ Yésu do yinti nuwo bé: "n'nyi amédékpékpé yi lasé énya kéa gɔmé o, vɔa amékéwo n'ti yi Mawu kpé doa yi. ¹² Dobéna oji amédéwo yi onyi étatɔ tso kaka wɔaho jɔjɔmé, yi amébuwo ya la, amédéwo yi wɔ otrɔ yi zu nɛnɛ bé o n'gbé dé ésrɔn o. Vɔ amédéwo ya la, ogbé ésrɔn dédé lé jipo fiaduhoa ta. Améké lɔn la néhɔ énya nyéwo." ¹³ Jila déwo kplɔ wɔaho vi ké onyi déviviwo va Yésu gbɔ bé nétsɔ alɔ dé wɔaji yi nédogbéda dé wɔaji. Tétéa énusrɔnlawo wlajré ni jilawo. ¹⁴ Yésu gblɔ béna: "mina déviviwo néva égbɔnyé, mingbé tu émɔ nawo, dobéna wɔatɔ yi nyi jipo fiaduhoa." ¹⁵ Nɛnɛ yi étsɔ yiho alɔ dé wɔaji yi yrawo kén'gbɔ otso. ¹⁶ Yi ntsu dé va Yésu gbɔ yi lé biɔ bé: "Apétɔ n'kayi mawɔ kén'gbɔ yi makpɔ agbé mavɔ o?" ¹⁷ Yésu tonɛ bé: " n'ka n'ti yi olé ji la nya nyɔɛ dédéwo? Dika n'tɔ tsan nyɔ, vɔa né inyi bé ola kpɔ agbé mavɔa, odo la lé éséawo dé asi vévé dé." ¹⁸ N'tsua gbé biɔ bé: "Esé kalawo yi?" Yésu do yinti nɛ bé: "n'gbéwu amé o, n'gbéwɔ ahasi o, n'gbé fifi o, n'gbéda ajé, ¹⁹ bu tatawo kudo énɔwo, yi nalɔn éhawovi sigbé owo tsa nɛnɛ." ²⁰ Dékajɛvia lé gblɔɛ nɛ bé: "n'wɔ dé énukéawo ji kpata to kaka gakémé n'lé diviviméa. Fifia n'ka yi gbé kpɔtɔ bé mawɔ?" ²¹ Yésu gblɔ nɛ bé: "né olé ji bé atrɔzu amé jɔjɔɛ kpata la, yi nava sa késinɔnuwowo yi natsɔ éga tsona wɔaménɔwo, yi késinɔnu lanɔ jipo fiaduhoa mé niwo. Né owɔ énukéawo vɔ la va tim do." ²² Ké dikajɛvia sé énya kéwo Yésu gblɔ nɛ a, éjoyi kudo énublanui, dobé késinɔnu sugbɔ nɛ. ²³ Yésu lé tona yiho nusrɔnlawo bé: "lé nyatoho méa, n'lé gblɔɛ ni mi bé mianya bé éla sésé ni étsitɔ bé nédo jipo fiaduhoa mé. ²⁴ Yi n'gbélé gblɔɛ ni mi bé élé bɔbɔɛ bé ésɔkɛtɛ bé néto abui vitukui ho édo mé wu bé étsitɔ nédo jipo fiaduhoa mé." ²⁵ Ké énusrɔnlawo osé énya kiawoa, éwɔnukunu nawo, yi olé biɔ bé: "fifia dé, mɛka yi laté kpɔ hɔhɔ lé hihé kia mé o?" ²⁶ Yésu trɔ yi kpɔwo, yi tonuwo bé: "ékia n'lé bɔbɔɛ na amégbétɔwo, dobé n'dé kpékpé n'sésé ni Mawu yao." ²⁷ Tété Péto lé biɔ bé bé: "kpɔ miawoya mitati n'dékpékpé yi tiwo do; n'kayi mija kpɔ lé imé?". ²⁸ Yésu lé tonuwo bé: "Lé nyatoho méa, n'lé gblɔɛ ni mi bé amékéwo la tim do lé jijimé kéwo lava va iméa, né inyi bé amégbétɔ ho via va nɔanyi dé yiho éfia sikpéji vɔa, miawo tsamila nɔ anyi dé azikpé wuiévéa ji yi mia drɔvɔnu Izraël ho fia duawo." ²⁹ Amédé kpékpé ké la tati yiho aho, nɔvia n'stu kudo nyɔnuwo, tata, énɔa, éviawo alo yiho anyigban hado n'tinyéa akpɔwo alafa dika yi akpɔ agbémavɔ. ³⁰ Yi améwo lé fifia ké osugbɔ ké onyi tsutsugban ola va nyi kpɔtɔɛa, yi gbogbo tɔ ké onyi kpɔtɔɛwoaola nyi gban tɔ.