¹ Lé n'kéké amadɛn ho n'gbodo méa, Yésu kplɔ pétro, Yakobo kudo nɔvia Yohanɛs dé asi yi éto kɔkɔ dé ji. ² Lé étoajia, Yésu ho jéjémé trɔ zi déka. Yiho n'kumé lé klɛn sigbé dɔnkusu, yi yiho awu hé sigbé kékéli nɛnɛ. ³ Yi kpɔ, Mosé kudo Eliya va yigbɔ yi olé dé susu kudoé. ⁴ Pétro gblɔna Yésu béna: "ényɔ ni mi bé mianɔ toho kia.Yi né olɔn a miawɔ azaba amétɔ dé gɛké, dika lanyitɔwo, évégɔa lanyi Mosé tɔ yi étɔngɔa la nyi Eliya tɔ." ⁵ Ké oléhonua, alilikpo kéklɛn dé va tsɔn dé wɔaji yi égbé dé di tso alilikpoamɛ lé gblɔ bé, " amékéa yi nyi évinyé ké gbɔ nyé mulɔna énu lé o, ké ho nu jé na énunyé. Midoto énya ké éla gblɔ ni mia." ⁶ Eké égbéa lé dia vɔvɔn lé énusrɔnla oja nyi yi otsɔ n'kumé tsé tsɔn anyigba yi olé po lé wɔadéké mé. ⁷ Ké Yésu va wɔagbɔ yi tsɔ alɔ tɔwɔa la éhonu béna, "mitso, yi min'gbé vɔn o." ⁸ Tétéa ké otsɔ wɔaho n'kumé yi jia omukpɔ amédékpé o, Yésu dika ko yi lé tohoa. ⁹ Ké olé di lé étoajia, Yésu dé sé niwo bé omugbé gblɔ énuké toho okpɔa ni amédé o, va do gakémé ilava fɔn tso amékukuwo domé kén'gbɔ. ¹⁰ Nusrɔnla étɔ kéawo lé biɔ bé, "nuka inti yi Yudatɔwo ho Osɔfɔwo lé gblɔ bé élé bé éliya négbé va kén'gbɔ Mésia néva?" ¹¹ Yésu do yinti nuwo bé: "élé imé nɛnɛ. Elébé Eliya néva jra n'dé kpékpé do kén'gbɔ Mésia ya néva. ¹² Vɔa lé nyatoho méa, n'lé gblɔɛ ni mi bé Eliya va vɔ yi omudo jésio yinti yi amésugbɔ do funyafunya nɛ. Nɛnɛ ké yi amégbétɔ ho vi la tsa la kpéfu lé wɔaho asi mé. ¹³ Nusrɔnlawo kpɔɛ dé jési bé éléhonu lé Yohanɛs Batista n'ti yi Yésu nɔ nu hom lé. ¹⁴ Ké Yésu trɔyi améha gbɔa, tétéa n'tsu dé va igbɔ yi jéklo dé n'kɔ nɛ ¹⁵ yi lé gblɔ bé: "Apétɔ kpɔ nublanui ni ivinyé n'tsuvi kéa dobé élé lé ékponɔ ho dɔ yi élé kpéfu n'tɔ. N'tɔtsan éjana nyi dé ézo kudo étsimé kabakaba. ¹⁶ N'tsɔɛ vani nusrɔnlawo wo vɔa owunté yɔdɔ nɛ num o." ¹⁷ Yésu do yinti lé gblɔ bé: "miawo hɔsé manɔ isitɔwo kudo étamé sénlawo. Gakamé yi manɔ anyi kudé mi vasé do? Mikplɔ dévia vanum!" ¹⁸ Yésu nya gbɔgbɔvɔn a do lé dévia mé tétéa dévia ho lamé haya zidika. ¹⁹ Tétéa yiho nusrɔnlawo lé biɔ lé wlawla mé bé: "n'ka n'ti yi miawo ya minté lé nya gbɔgbɔvɔnwo?" ²⁰ Yésu lé do yinti nuwo bé, "élabéna miaho hɔsé n'lé yidoké mé o. Né inyi bé miaho hɔséa lé sigbé mafoku nɛnɛ la; miaté honu ni éto kia bé nétso lé gɛké yi néyi toho bu. N'dékpékpé ho wɔwɔ n'ja séwun ni mi o. ²¹ Yi né minya gbɔgbɔvɔn kéawo la élé numi bé mia blanu yi dogbéda sésédé kén'gbɔ. ²² Ké oké lé Galiléa, Yésu lé tonu yiho nusrɔnlawo bé: "ola tsɔ amégétɔ ho vi la tsé dé asi ni awulawo; ²³ yi wɔawui tétéa n'kéké amétɔa gbéa éla fɔn tso amékukuwo domé." Enya kia wɔ bé énusrɔnlawo tsi nuzizi mé. ²⁴ Eké Yésu kudo yiho nusrɔlawo va do Kapernaumua, tsɔtsihɔmégajɔlawo ova Pétro kudo Yésu gbɔ yi lé tonuwo bé: "miaho Apétɔa n'tu tsɔtsihɔmé ho éga oa?" ²⁵ Edo yinti nuwo bé: "nyatoho yi" Ké Pétro do ahoméa Yésu lé honu gban lé gblɔ bé: "lémonyi olé kpɔɛ mon Simɔn, anyigba ji ho éfiawo mékawo n'ti yi ola hɔ éga léwo alo fiaduhowo ma? Dukɔ mé viwo si alo améjrowo si yi?" ²⁶ Pétro do yinti nɛ bé: "lé améjrowo si." Yésu gbéyi iji lé tonɛ bé: "Fifia la n'hian bé duméviwo oné nɔ azɔgé o." ²⁷ Min'gbé wɔ bé égajɔlawo oné wɔ énuvɔn o a, yi aputa yi na da akpavi lékutsan do apuamé yi nalé akpavi ké la va gban; né ohu iho numéa nakpɔ éga. tsɔɛ yi na tsɔɛnɛ na égajɔlawo éla su na éwo kudo nyé."