¹ Farizitɔ déwo kudo agbalɛnfialawo tso Yéruzalɛm va bé wɔalé ényadé kpɔ kudo Yésu. ² Ogblɔ bé: "n'ka n'ti yi énusrɔnlawowo owun lé wɔdé mia Yudatɔwo ho blimamé ho édénkɔnuawo ji o? Owun klɔna wɔaho alɔ kungbɔho oduna nu o." ³ Yésu do yinti lé gblɔnawo bé: "yi miawo tsan n'ka n'ti yi miaho édénkɔnuawo tso dé Mawu ho séawo ji? ⁴ Dobé Mawu gblɔ bé: "bu tatawo kudo énɔwo" yi améké la tso dé yiho jilawo n'tia éla ku." ⁵ Yi miawo ya migblɔna bé, né inyi bé amédé gblɔna tata alo énɔa bé: "énuké matso kpédé n'tiwoa, n'tsɔɛ tsé wɔ ajɔgbé ho nu na Mawu." ⁶ N'gbé hian na amé kumua bé né do bubu étoa n'ti o. Nɛnɛ yi mitutu Mawu ho éséawo tsagbé miaho édén kɔnuawo né kpɔ n'kɔgbé yiyi. ⁷ Miawo ajédada ho nunɔlawo! Yésaya gblɔ nyatoho ké inyi bé égblɔ nyadi lé mian n'ti bé: ⁸ "amékiawo lé bum kudo wɔaho énuwo, vɔa wɔaho éjiwo didi lé égbɔnyé. ⁹ Evidé dékpékpé n'lé wɔaho subɔsubɔa mé o, dobéna ofia wɔawo n'tɔ ho éséwo yi otati lé Mawu tɔa n'ti." ¹⁰ Yi Yésu yɔ améha la va igbɔ lé tonawo bé: "mido to énya ké n'lé ja gblɔ ni mia tsagbé miaté sé igɔmé." ¹¹ N'nyi énuké nadu tso to énuwomé yi la wɔ wo amé makɔmakɔ o! vɔa énuké la do lé énumé niwɔa yi la wɔwo amé makɔmakɔ." ¹² Yi énusrɔlawo va yi gblɔna Yésu bé: "onya bé énya ké ogblɔa vé dɔmé ni Farizitɔwo n'tɔa? ¹³ Tétéa Yésu do yinti nawo bé: "ati dékpékpé ké tatanyé n'dowoa wɔahuin kudo ékéan kpata. ¹⁴ Min'gbé ké n'démé nawo! émɔfiala n'kuvi gbatɔ yi onyi. Né inyi bé n'kuvi gbantɔ lé kplɔ n'kuvi gbatɔa, wɔamévé kpata olava gé jé édo mé." ¹⁵ Pétro do yinti na Yésu bé: "dé élo dodo kia gɔmé ni mi." ¹⁶ Yésu biɔ bé: "miawo tsan mimu sé énya kia gɔméwoa? ¹⁷ mimunyɛ bé n'nyi n'dékpékpé ké amé duna to yiho adɔkaviwo méa yi dona lé gazé mé oa? ¹⁸ Vɔa énuké dona tso amé ho numéa tsona yiho éjimé. Enukumuawo yi ponadi amé. ¹⁹ Dobé éjimé yi susu badabadawo tsona, améwuwu, ahasiwɔwɔ, matriwɔwɔ, éfinfin, ajédada kudo améhonu gbégblén dona tso. ²⁰ Enukéawo yi ponadi amé. Vɔ né inyi bé owun klɔ alɔ kéngbɔ odunu woa, oma podi o." ²¹ Tétéa Yésu tso la gawun yi yi Tiro kudo Sidɔn ho nutoawo mé. ²² Yi kana nyɔnu dé ké lé gawuan kpɔ Yésu yi dékukunɛ lé gblɔ bé: "Apétɔ, éfia David ho vi, kpɔ nublanui nam. Gbɔgbɔvɔn do évinyé nyɔnu via mé yi élé do funyafuna nɛ gasiagamé." ²³ Vɔa Yésu n'do yinti nɛ o. Yiho nusrɔnlawo va lé dé kuku nɛ lé gblɔ bé: "tona nyɔnua bé néjo yi dobé élé daha dé étomé ni mi." ²⁴ Vɔa Yésu do yinti lé gblɔ bé: "odɔm bé mava dé Yudatɔwo dédé yo." ²⁵ Yi nyɔnua va jéklo dé yiho n'kumé lé gblɔ bé: "Apétɔ kpédé n'tinyé." ²⁶ Yésu do yinti lé gblɔ bé: "n'nyɔ bé wɔatsɔ déviwo ho n'dudu tsé kɔn'gbé ni avuwo." ²⁷ Yi nyɔnua do yinti bé: "Elé itého nyatoho, vɔa né inyi bé déviwo dunu vɔa vi ké okɔna gbéa avuviwo tsɛnɛ duna. ²⁸ Yésu gblɔnɛ bé: "nyɔnu, hɔsé wɔa lolo n'tɔ, énuké olé jia néva imé nawo." Yi tétéa évia haya zidika. ²⁹ Yésu jo lé gawun yi yi apua ho toho évégɔa lé galiléa, yi élia éto dé yi yi vanɔ étoaji. ³⁰ Améha sugbɔ dé va igbɔ, okplɔ édɔnɔ ké onyi lamétututɔwo, n'kuvigbagbatɔwo, étokunɔwo, adétutunɔwo kudo amésugbɔ buwo ké olé lé édɔbuwo tso yigbɔ yi éyɔ édɔ nawo. ³¹ Tétéa éjijɔ améha, olé kpɔ étokunɔwo lé honu, bafawo lé zɔn azɔnli kudo n'kuvi gbatɔwo lé kpɔnu. Ewɔ nukunu nawo n'tɔ yi okafu Izraël ho Mawu. ³² Yésu yɔ yiho nusrɔnlawo yi tonawo bé: "amékiawo honu lé wɔanblɛ nam, dobé olé gɛké kudom yi owun du n'dékpékpé o. Nyéwun ji bé manyawo jo ké féfé lé léwo dobé n'lé vɔn bé ola va bu dé wɔadékéwo lé émɔ ji." ³³ Nusrɔnlawo lé biɔ bé: "ganɛ yi miakpɔ énududu lé égbédadapo kia yi ana amésugbɔ kiawo?" ³⁴ Yésu lé biawo bé Kpɔnɔ nɛnɛ yi lé miagbɔ lé gɛké o?" Odo yinti nɛ bé: "amandrén kudo akpavi wluiwlui déwo." ³⁵ Tétéa Yésu dégbé na améawo bé oné nɔ anyi dé anyigba. ³⁶ Otsɔ kpɔnɔ amandréa kudo akpaviawo yi ké Yésu dakpé dé wɔaji vɔa, éŋɛ kpɔnɔa dé toho amévé yi étsɔwo tsona nusrɔnlawo bé oné tsona améha. ³⁷ Wɔakpata odui yi odɔho. olɔ kankan bɔ dé tého dika yi édɔ ajafi amandrɛn. ³⁸ Amékéwo dunua ho hlénhlénmé nyi n'tsu kotoku améné, nyɔnuwo kudo déviwo n'lé iméo. ³⁹ Yi Yésu dé émɔ na améha bé wɔayi yi yintɔ gédé étɔjihuanmé yi jo yi Magadan ho nutoawo mé.