¹ Lé gakumua méa, Efia Hérodɛs sé Yésu ho n'kɔ. ² Egblɔna yiho subɔlawo bé: "ézé bé Yohanɛs mawutsidéta ni améa gbé gbɔ agbé, yinti yi nusén kiawo lé wɔdɔ lé imé." ³ Fifia, Hérodɛs na yi olé Yohanɛs yi otsɔɛ tsé dé gakpamé, hado Hérodia ho nɔvi Filipo ho ésrɔn nyɔnu wunti. ⁴ Dobéna Yohanɛs ké gblɔna Hérodɛs bé: "n'nyɔ bé néhɔ nɔvia Filipo ho srɔn hadé o." ⁵ Hérodɛs ké kugbɔho bé yiawui gankéa élé vɔn na édukɔ, dobé améwo kpata tsɔnɛ sigbé Yohanɛs nyi ényagblɔdila. ⁶ Yi ké Hérodɛs ho jigbé ho azan vadoa, Hérodia ho vi nyɔnuvi va du éwé lé dodomé na amékéwo yɔ va azan duhoa yi éwoé dudu nyakpɔkpɔna Hérodɛs. ⁷ Yita édo n'gbé na nyɔnuvia bé yéanɛ n'dékpékpé ké éla biɔyé. ⁸ Yi éké dévia tsɔ énya tso gblɔ na énɔa vɔa, énɔa tonɛ bé négblɔ na Yohanɛs mawutsidéta dona amé kégbɔho. ⁹ Tétéa éfia tsaka lé yidéké mé, vɔa hadé énya ké yi n'tɔ gblɔa ta kudo hadé amékéwo va azan duhoa, yita édégbé énukéa néva imé. ¹⁰ Tétéa édɔ yiho dɔtsɔlawo bé oné va tso Yohanɛs ho éta va lé gakpamé. ¹¹ Yi otsɔ éta tso dé agbagbɛjɛji tso va na nyɔnuvia bé nétsoyina énɔa. ¹² Tétéa Yohanɛs ho nusrɔnlawo ova tsɔ n'tila kukua tsé va di. Yiho n'gbéa oyi va gblɔ énya na Yésu. ¹³ Eké Yésu sé énya kumua, éjo lé gawun yi do étɔjihun dé mé yi va wla lé toho dididé. Yi éké améwo sé énya kéa otso édu vovowo mé va yi otido kudo afɔ. ¹⁴ Eké étrɔ va apuata ékpɔ bé améwo sugbɔ yi va lé jété kpɔyé lé apuata. Tétéa wɔaho nu wɔ nublanui nɛ yi éyɔdɔ édɔnɔwo. ¹⁵ Eké fiɛnsi vadoa, yiho nusrɔnlawo va igbɔ va lé gblɔnɛ bé: "gɛkéa zogbéji yi, yi n'dékpékpé n'lé bé améwo néduo dobé fiɛnsi mé ho énududu ho gamé vayi hoho yita gblɔna améawo bé oné yi kɔpéawo mé bé wɔaplé énududu." ¹⁶ Vɔa Yésu do yinti nawo bé: "n'hian bé oné yi o. Mia n'tɔ miji n'dé nawo bé oné du." ¹⁷ Odo yinti nɛ bé: "Vɔa kpɔnɔ amatɔn kudo akpavi amévé yi lé gɛké ni mi." ¹⁸ Yésu gblɔ nawo bé: "mitsɔɛ va nam." ¹⁹ Yi Yésu tona améawo bé oné nanyi dé égbéawo ji. Etsɔ kpɔnɔ amatɔan kudo akpavi amévéa yi étsɔ yiho n'kuviwo tso kpɔ jipo yi éyra kpɔnɔa yi éŋɛ dé toho amévé yi étsɔɛ na yiho nusrɔnlawo bé oné mɛ na améawo. ²⁰ Wɔakpata odui yi dɔho nyɔɛdé, yi ké obɔ wluiwlui kpɔtɔɛwoa édɔ ajafi wuiévé. ²¹ Amékéwo odu kpɔnɔ olé sigbé ntsu kotoku amatɔn nyɔnu kudo déviwo wunlémé o. ²² Lé ékia ho n'gbodoméa Yésu tona yiho nusrɔnlawo bé wɔagé dé étɔjihunamé bé wɔava wɔɛ nɛnɛ lé toho évégɔan tsan yi éyé n'tɔ yéatsi yi yéakplɔ améha tso yi ahowo mé. ²³ Ké otona améawo otso yi ahomé vɔa yi dika yi étoji bé yéadogbéda. Ké fiɛnsi vadoa yi dika yi lé gawun. ²⁴ Vɔa toho ké étɔjihuna léa didi kudo apua ho boto, étɔjihuan bu yidoké dobé aya lé po n'tɔ ²⁵ Anɔ sigbé fɔfɔmé gané mé, yi Yésu zɔ lé apuaji gbɔnɔ wogbɔ. ²⁶ Yi éké nusrɔnlawo kpɔɛ yi ézɔ gbana wɔagbɔa lé étɔajia, adika tsowoyi olé gblɔ bé: "aŋɔli yi", yi olé daha. ²⁷ Tétéa Yésu honu didawo zidika yi lé tonuwo bé: "ényé yi mingbé vɔn o, miaho éji né jé imé." ²⁸ Pétro do yinti nɛ bé: "Apétɔ, né ényi owo yi tututua, wɔ yi ényé tsa mazɔ va égbɔwo lé étɔaji." ²⁹ Yésu do yinti nɛ bé: "évɔ va!" Tétéa Pétro do lé éhuanmé yi zɔ lé étɔaji gbɔnɔ Yésu ³⁰ gbɔ.Vɔa ké Pétro kbɔ aya adika tsoé yi étɔɛji lé yi étsia gɔmé, yi élé daha bé Yésu néhɔ nɛyé!" ³¹ Yi zidika Yésu vlu yiho alɔ yi lé Pétro yi lé gblɔnɛ bé: "owo hɔsé vidétɔ, n'ka n'ti olé kadi énya yi?" ³² Yi ké Yésu kudo Pétro odo étɔji huanmé vɔa, aya tɔté. ³³ Tétéa énusrɔnlawo ké olé éhuanméa osubɔ Yésu yi lé gblɔnɛ bé: "Mawu ho vi yi onyi lé nyatoho mé!" ³⁴ Yi ké otso étoa voa oyi Ganézarɛt ho anyigba ji. ³⁵ Ké amékéwo lé gawun kpɔ Yésu jésia wɔaho vava di lé édoamé bé améwo né va kplɔ wɔaho édɔnɔwo tsé va yigbɔ yi né da édɔ niwo. ³⁶ Edɔnɔ déwo lé dékuku ni Yésu bé wɔatsɔ wɔaho alɔ tsé tɔ yiho awua ho boto, yi amékéwo té tsɔ wɔaho alɔ tso tɔa okpɔ édɔyɔyɔ.