¹ Adi lo gwena ye lufundusu gwena ayo wena mugadji ga Yisu Klisto. ² Mu mwila gisina gu luzingu gi mpeve mu mbuga yi Klisto Yisu giga ga pedi ngolu mu mbuga yi masumu ma lu fwa. ³ Mugio ayo yi ga godjidi mu mbuga yi misigu, ami mugu sala mu mbuga yi guhela gu mwila, Nzambi maga igu gishilu. yeyi maga dumushidi mwana yedji sila mu mbuga yi gimusuni gigeledi ye wowo wu masumu mu mwila gu kala makabu ma masumu, ye yeyi maga fundushi masumu mu mbuga yi gimusuni. ⁴ Ye aga sadidi gio mu mpila mbi lu yalu lu misigu lugugisamani mugadji giedji. adu lo dugu zinganga mugi musuni, ha mugi mpeve. ⁵ Hadu wo hagu zinganga mugi musuni owu agu kalanga mu kiesi mu mapanzi magi musuni, ha hadu agu zinga mugi mpeve agu kala mu kiesi mu yima yigi mpeve. ⁶ Mu mwila gudi hana mugi musuni gwena lu fwa ha gudi hana mugi mpeve gwena luzingu ye ngemba. ⁷ Mu mwila gudi hana mugi musuni lo gwena fumu gwena Nzambi mu mwila yoyi lo yena mu mbuga yi misigu mi Nzambi ye yoyi lo yifana. ⁸ Hadu wo hena mugi mudu lo afana gusebidisa Nzambi. ⁹ Dangu di hanu lo nwena mugi musuni, ha mu gimpeve, mbi gwena gagidi mbi mpeve yi Nzambi yena mugadji dienu. ha mbi gwena ye mudu ugando mpeve yi Klisto, lo hena wenzi. ¹⁰ Mbi Klisto wena mugadji dienu, gi mudu mugi gafa giga kala ye soni mu mbuga yi masumu, ha mpeve yi moni yena ye giyega gagigadi. ¹¹ Mbi mpeve yi mudu yo aga fudusili Yisu mugadi dia fwa yena mugadji dienu, ayo uga fudumusidi Yisu mugadi dia di hadu agu fwa maga hana gega lusingu mu mila mienu mi lufwa, mu mbuga yi mpeve yendji yena mugadji dienu. ¹² Mugio, anedu, adu dufana gu ginzigisa madodji, ha lo mbi mugi musunu mu guzinga mugi musunu. ¹³ Mu mwilu mbi anu nu ba guzinga mugi musuni, anu munu gafwa, ha mbi mu gimpeve anu munu gaziya isalu yi mila,munu gazinga. ¹⁴ Mugio adu engi aga dwadisa manini mu mbuga yigi mpeve yi Nzambi, hadu wo ena ana Nzambi. ¹⁵ Mu mwila nu, anu lo nuga yambidi mpeve mu uhiga ye mu woma. Mbalu yega, anu nu yambidi mpeve yi luyalu, mu mbuga yo adu mudu guse bilanga: « Aba, Dawa». ¹⁶ Mpeve munu guda gimbangi mu mpeve yedu beni mbi adu dwena ana Nzambi. Mbi adu dwena ana, adu dwena gega a luzolu, gwena Nzambi. ¹⁷ Ye agagana ana a luzolu ye Klisto, mbi sila adu mudu gunioguga ye yeyi, mu mpila mbi adu dukadi mulugumu ye yeyi. ¹⁸ Mu mwila ami inunga mbi minianga mi dandgu di lo miena gigeledi ye lugumu lo luga kala gumesu. ¹⁹ Mu mwila gi fudji giba gumena guganda gu mudjima guga dulesa ana a Nzambi. ²⁰ Mu mwila gi fudji migi gu lemvuganga mu gagidi, lo mbi mu luzolu lwenzi, ha mu luzolu lu mudu yo uga lusadidi. ²¹ Gwena minu mi pimbu mugu luhana. Mbi gifudji gio beni migi gadihana mu uyiga uwimbi, ye giogi giga huluga mu lugumu lu ana Nzambi. ²² Mu mwila adu dwisi mbi gi fudji gikima migi gudilanga ye migi gusalanga mu minianga de mwanonu. ²³ Ha lo gwena mugio buna, ha gega adu beni duga gedi ye ndumba ditegu zi gimpeve adu gega munu gudidila mu gadji diedu beni, mu gumena giyega giedu, gifumu gi mwila wedu. ²⁴ Mu mwila adu duga hulugidi mu mbuga yi minu. Ha muyo yidu gunungila, adu lo gidusala gwidala, Mu mwila ayo agusa minu uga dala kega? ²⁵ Ha mbi adu dusa minu muyo yiduga gonda gudala tegu, adu dugu menanga ye guganda mudjima. ²⁶ Mu mpila yo, mpeve migu dusadi sanga gega mugu hela gwedu. Mu mwila adu lo dwisa mpila yigu sambila, ha mpeve yo beni migu sambanga mu mwilu du si dwena ha wa guhela. ²⁷ Mudu yo ugu guisayanga mena gu mudjima, wisi manunga magi mpeve, mu mwila yoyi igu sambilanga mu mwila aguigisi mu luzolu lu Nzambi. ²⁸ 0 Adu dwisi mugio, mbi Nzambi agu salanga yima yikima mu mwila ma pimbu ma hadu agu muzolanga, ye howo aga lenziga manini mu luzulo lwenzi.[ Manunga magulu ma mosi magu hosanga mbi: « yima yikima igu salanga mbuga yi mosi mu mapimbu.»] ²⁹ Mu mwila awo aga mwisiyiyi tegu, ye maga ponini gega mugu kala gigeledi nga gidimbu gi mwana wenzi, mu mpila mbi akadi mwana ugu valuga utegu mu gadji ga pangi akima. ³⁰ Awo aga ponini aga kedi howo aga lenzigidi. Awo aga lenzigidi, yeyi gega maga hulusidi, yeyi kega maga gumisidi. ³¹ Adu dufana guhosa yigi mu mapanzi magi fagio? mbi ena yadu, na ugakala mbeni wedu? ³² Yeyi yo uga gonzidi gugadula mwana wenzi beni, ha yeyi maga muhanini mu gufwa mu mwila masumu medu akima, Kiyo adu dufana gugonda gu muwa pwede yima yi kima yenzi? ³³ Na ufana gufunda hadu aga ponini Nzambi? gwena Nzambi ye beni ugu solanga. ³⁴ Nayo mugadji dienu ufana guvugila mu gwenu nkanu? Klisto ena mudu yo gafidi mu mwila du, yeyi, wena funu yingi gega, aga fudumugidi. Ye ena yoyo ugu sambilanga mu mwila du. ³⁵ Na uga dugabula mu luzolu ye Klisto? Minianga, mapasi, gumegamana, nzala, gu gonda miledi, mbi lo ma panzi mabi, mbi lo idumba? ³⁶ Gagidi nga giga sonamana: « Adu mudu ga fwa mu mwila yeyi a gadji ga ufugu. Adu duga pona manini nga ma mema amo ma dwalanga mugu maziya.» ³⁷ Muma panzi amo makima, adu dwena ye gibingu mu mbuga yi mudu yo wuga du zodidi. ³⁸ Mu mwila ami ngiena muguisiya mbi, gugadi lu fwa, gugadi luzingu, gugadi awanzio, gugadi gifumu, gugadi yima yi dangu di gugadi yima yi dangu di giesa gugadi hadu a ngolu, ³⁹ Gugadi udadi, gugadi ginzinga, gugadi gima gikima gio giaga sadidi, lo giga kala ye giyeka gigu dugabula mu luzolu lu Nzambi, lwena mugadji ga Yisu Klisto fumu wedu.