¹ Oh!mbi ayi ufana guganda muzima muyo idadila gubiya giami! ² Mu mwila ami ngiena uhala mu nwena nu mu uhala u Nzambi,mu mwila ami iguzolanga gunu kwedisi gwena yala umoshi,mu mwila gunulesa gwena Klistu nga mudu yo ugonda gwisiya amala. ³ Mbalu zingi,mu mpila yoyo nioga diaga fudjidi Eva mu upala wenzi,ami ngiena mu woma mbi manunga menu magonzi gudenga gana ye magidjigi gwena Klistu ye gudi gulumusa. ⁴ Mu mwila mbi mudu wesa guloga Yisu yoyo udu galulongidi du,mbilo anu nuyamba mpeve yoyi yinu gayambidi gu dwena du,mbilo musamu u pimbu wunu gefidi gu dwena du,anu nufana mugu mugieba pimbu sila. ⁵ Mu gio,inunga mbi ami lo iga kedi pamba gu masina ma Antumwa o mu pimbu. ⁶ Mbi ami ngiena mudu ugonda gwisiya mu mwila posidi yami,ami lo ngiena gu masina mayo ugesiya,ye adu mudu gamulesidi mu gadji dienu mu yima yikima ye mu mapanzi makima, ⁷ Mbi lo ami iga sadidi disumu mu mwila,gudi gulumusa ami beni mu mpila mbi anu nuga ndugi,ami yiga nulongidi yi kenda musamu u Nzambi. ⁸ Ami ngiendanga gu mabundu mamoshi munu gubaga lufudu,mu mwila gunu sadisa nu.Ye dangu diga kedi gunwena nu ye kega ami ngiena ye pwisa yi konso gima gio,ami lo itungi sanga mudu; Mu mwila apangi aga dugidi gu Masedwani maga hidigidi yikima yo iga gonzidi. ⁹ Mu ikima ami lo izolanga mbi anu nukadi mu lemu diani,ye ami midi giebanga. ¹⁰ Mu gagidi ga Klistu gena gu ngiena mi,ami igu hosanga mbi masamu u lugumu lo uga gaduga mu ginziunga gi gia Akayi. ¹¹ Mu mwilegi?Mu mwila ami lo igu nuzolanga?Nzambi wisi! ¹² Ha ami yagusala ye yiga salanga mu mpila yoyo,mu gugadula manunga mo gwena o aba gugamba manunga,mu mpila mbi owu akadi nga adu mu mapanzi magudi gumisanga. ¹³ Hadu agifa gio ena antumwa abi,hadu agisalu apala,agu disanga nga antumwa a Klistu. ¹⁴ Ye lo gwena yi gwibu gila mu mapanzi ma gifa gio,mu mwila Sadani ye beni magu dialumunga nga wanzio u mwani. ¹⁵ Lo gwena yi gwibu ngila mbi isalu yo yalu mugi kega mu isalu yi gagidi.Nsuga yoyi mu igakala nga isalu yowu. ¹⁶ Ami ngiena mu gunusida,lo gwena ye mudu ufana gusenda mi nga zoba;mbi lo,sendenu mi nga zoba;mu mpila mbi ami kega idi gumisi gandambu. ¹⁷ Ayo yiba guhosa,ye lugwigilu lu gukala ye nunga di lugumu,ami lo iba guhosa mu mwila Fumu,ha iba guhosa nga mulashi. ¹⁸ Mu mwila gwena ye engi agu digumisanga mu gimusuni,ami kega miga digumisanga. ¹⁹ Mu mwila anu munu gugiebanga mazoba mu luzolu,anu nwena ndungi. ²⁰ Mbi mudu unu dimuna,mbi mudu unu ziya,mbi mudu ugaduga gunwena nu,mbi mudu ena ihosa hosa,mbi mudu ugu bula gu mbunzu,anu nufana guganda muzima. ²¹ Ami ngiena mu soni mugu nuhosila,adu mudu gadilesidi mu gugonda gikesa.Mu dangu di,yikima yo ifana gumega mudu,ami iba guhosa nga zoba,ami kega,miya gumega! ²² Owu ena a Ebre?ami kega.Owu ena hadu a Isaledi?Ami kega.Owu ena mu ganda di Abalayama?Ami kega. ²³ Owu ena asadi a Klistu?Ami iba guhosa nga mudu yo uba guhosa ihosa hosa.Ami ngiena kega gwahida owu:mu gukanini lufwa,mu gusa mu bologu,gwena pimbu.Pimbu mu ida yi lufwa, ²⁴ Mbalu zidanu ami iga yambidi ida magumi mawana gwena Azwifi,gadula dimoshi, ²⁵ Mbalu zisadu ami iga bula manini mu midondu,mbalu imoshi ami igomba manini mamani,mbalu zisadu ami iga bugumu gidi,ami iga sadidi ufugu umoshi ye piba imoshi mu gadji ga wumbu di twiya. ²⁶ Mbalu zingi mu mibembo,ami iga kedi mu lufwa mu nzadi,mu lufwa gwena ipumbulu,mu lufwa gwena hadu ambu diami,mu lufwa gwena apaganu,mu lufwa mu mambu maneni,mu lufwa mu mademu,mu lufwa mu nzadi mu neni,mu lufwa gwena apangi abi. ²⁷ Ami iga kedi mu gisalu ye mu pashi,miga dega manini gwena hadu engi,mu nzala ye mu pwisa yi mema,mu guduna gudia mu mbalu ye mbalu,mu pewu ye kagi. ²⁸ Ye mu gugonda guhosa gima giega,ami igakedi mu gadji ga manunga,mapanganga mabundu makima. ²⁹ Na ugonda ngolu?Na wesidi mu gubwa,ayo mwiga sidi mi twiya? ³⁰ Mbi gufana mugu digumisa,gwena mu gugonda gwami gu gikesa ami iba gudi gumisa. ³¹ Nzambi ayo dada u Fumu Yisu,ye muga sagumugidi mu mamvula makima,wisi mbi ami lo iba gudifuda. ³² Gu Damasi,Guvernere u Fumu Aretasi agiebanga hadu a mbu di Damaseni,mu mwila gukama mi; ³³ Ha maga kulumusidi mu piba,mu gidunga,udadi u gibaga,ye ami miga djinini gu miogu miowu.