¹ Muntu munkumbu ya Anania ye n'kento ani Safila, ateka ndambu ya mvuilu awu. ² Wakalula ndambu ya mbongo, nkento ani wazayawo mpe, wayenda tula ndambu ya n'kaka vana malu ma zintumua. ³ Kansi Petelo wavova:"Anania, diambu dianki satana kazadidi mu m'tima aku nate ye watonta Mpeve a n'longo ye katula ndambu ya ntalu a via? ⁴ Kiokio kia kala vo ka diatekolo ko, ka diakala diaku kue? Ye wawu ditekolo, ka dikele diaku kue? Neyi yindudidi mambu momo muna n'tima akue? Kuvunini antu ko kansi Nzambi." ⁵ Kiokio Anania kawa mambu momo, wabua ye wa zengoka fulumunu. Wonga wangolo wa buila awonso awa mambu momo. ⁶ Matoko mayiza man'zinga mu kun'zika ⁷ Tezo kia wola tatu zaluta, n'kento ani waluaka, kazaya ko momo maluta. ⁸ Petelo wan'tela: "Wunzayisa keti yi mu ntalu yoyo lua tekele via diodio?" Yani wa vutula: " Ingeta yi muntalu yoyo." ⁹ Kansi Petelo wan'tela:"Mu diambu dia nki luawizanene mu tonta Mpeve ya Mfumu? Tala wowo azingidi yakala diaku vovo muelo ena, ye si aku nata. ¹⁰ Yani wa bua vana vawu ye fulumunu kia zengoka, ye matoko mayiza ye awana wa fua. Anata ye an'zinga vana mbela yakala diani. ¹¹ Wonga wa ngolo wa buila dibundu dia m'vimba ye awonso awa mambu momo. ¹² Dimbu ya bidi ye masivi ma vangamanga va kati kua n'kangu ye mu nzila ya zintumua. Akala vakimosi muna lumbu lua Salomo. ¹³ Kansi ke muntu mosi kutu ko walenda bundana yawu. Kansi tu, n'kangu wa toma kuba zola. ¹⁵ A leka minu mu Mfumu akulama ye kulama diaka ye makabu mayingi ma ayakala ye akento, ¹⁴ nate ye banata zi mbevo muna nzila, zalekosua va mfulu ye va basa, mpasivo kiokio Petelo kavioka kita kiani kia fuka an'kaka. ¹⁶ Ndonga ya antu atukanga mu Mbanza za kinzungidila za Yelusalemi, anata zi mbevo ye akuamusuanga kua mpeve za mbi, ye awonso aniaka. ¹⁷ Kansi ngudi a nganga wa telama ye awonsono akala yani (yi dibundu dia saduki), akala azalua kua kimpala. ¹⁸ ayimba zi ntumua ye akuatula muna boloko dia Mbanza. ¹⁹ Kansi muna mpimpa, mbasi ya Nzambi ya zibula mielo mia boloko wa avayikisa ye wa atela: ²⁰ " Luenda, lutelama muna nzo a Nzambi ye lulonga kua n'kangu awonso mambu mawonso ma luzingu lualu. ²¹ Kio kio awa wuna, akota muna nzo a Nzambi muna n'suka n'suka alongela. Kansi Mfumu a Nganga wayiza ye akala yani, wabokelesa mbazi a n'kanu ye n'kuluntu mia wonso mia Isaeli, ye watuma benda baka zi ntumua muna boloko. ²² Kansi Mfumu za makesa ka ayenda ku awana muna boloko ko, avutuka, mu vana nsangu ezi: ²³ "Tuele wana boloko dia toma kangama ye min'kengi mia telama vana muelo, kansi kiokio tuzibudi dio, ka tuwene muntu ko muna kati. ²⁴ Kiokio mfumu a tempelo ye ngudi a nganga awa mambu momo, atoma yitukua mu yawu kibeni ye mu mana melanda ku nima. ²⁵ Kansi muntu wayiza wa atela: " antu lua tudidi muna boloko muna tempelo ena ye mu longelanga ena en'kangu. ²⁶ Dina mfumu a tempelo ye ya makesa ayenda ku abaka, kansi ka mukingolo ko, kadi akala ye wonga wa zubua matadi kua n'kangu. ²⁷ kiokio akua nata , akua tula vana mbazi a n'kanu. Ngudi a nganga wa kuayuvusa mumpova ezi : ²⁸ " tua toma ku lukanikina mu longela mu nkumbu yoyo, kansi luzadisi Yelusalemi dia mvimba ye longi dieno, ye luzolele vuika menga ma muntu ndondo kua yeto." ²⁹ Kansi Petelo ye zintumua avutula: " Tu feti tumamena Nzambi kansi ka antu ko. ³⁰ Nzambi ya mase meto wa fulukisa Yesu, ndondo lua vonda lua koma vana n'ti. ³¹ Nzambi wa n'zangula ye wa m'vuandisa kuna lubakala luani mpasi kala muana a N'tinu ye m'vuluzi, mu vana mpilulu a diela kua Isaeli ye ngiambudulu a masumu mani. ³² Tuna mbangi mu mawonso mama, mpila mosi ye Mpeve a n'longo yoyo Nzambi kavene kua awonso aku n'tumamenanga. ³³ Kiokio antu a mbazi an'nu awa momo, atoma fuema ye azola vonda zintumua. ³⁴ Kansi vakala n'falisi mosi wa nkumbu ya Gamalieli, Dokuta dia n'siku, wazitusungu kua antu awonsono, wa telma ye wavana luve mu vayukisa Ntumua ku mbazi mu fintangu ntangu. ³⁵ Bosi yani wavova kua yawu: "luesi Yisaeli, lukeba mu momo luzolele vanga kua antu wowo. ³⁶ Kadi ku nima fintangu ntangu, Tedasi watelama bonso muntu ye ndonga ya antu tezo kia nkama ya abundana yani. Wavondua, ye awonso an'tumamananga amuangana ye akituka antu ampamba. ³⁷ Ku nima muntu ndondo, Yuda musi Ngalili watelama muntangu ya nsonokono ya antu ye wa nata ndambu ya antu. Yani mpe wa fua, ye awonso an'tumamenanga amuangana. ³⁸ Muamu ntangu yayi, yikulu telele: " lukala kuanda ye antu wowo ye lubayambula kimpuanza, kadi vo nkubameno yoyo evo diambu diodio ditukidi kua antu, se dia manisa. ³⁹ Kansi vo dia Nzambi, kalulendi dio lunga ko; Ye lulenda banza kutu vo luta nuana ye Nzambi." Bosi akuikila. ⁴⁰ Kunima, abokela zintumua, akua zubisa, ye akua kanikina muvavela mu nkumbu ya Yesu, bosi akuayambula. ⁴¹ Avayika ku mbazi a n'kanu mu kiese kia sa vo dia mbote kua yawu mu mona mpasi mu kuma kia nkumbu yoyo. ⁴² Kunima, lumbu ka lumbu, muna nzo a Nzambi ye nzo muna nzo, alonga ye alongela ntangu ka ntangu vo Yesu i Klisto