¹ Kiokio Petelo ye Yowani bakala vova kua n'kangu, banganga za Nzambi, n'tuadisi a Nzo a Nzambi, basadiseyo baluaka, ² Kabayangalala ko mu momo bakala longela kua n'kangu, ye vovela nkumbu ya Yesu mu n'samu wa mfulukulu ya bafua. ³ Bakubatula moko, ye bakubatuba muna boloko nate ku nima lumbu kialanda; kadi nkokela yakifuanina kala. ⁴ Kansi, bayingi mu bobo bawa mambu ma Nzambi bakuikila, ye ntalu ya mantu yakula nate kundambu za mafunda tanu. ⁵ Kunima lumbu kialanda, mfumu za n'kangu, bakuluntu ba Dibundu, ye min'soniki bakutakana kuna Yelusalemi, ⁶ Kintuadi ye Anne, ngudi yabanganga za Nzambi, Kayifa, Yowani, Alekizandele, ye bawonso bakala mu kabu dia bangudi za nganga. ⁷ Batula vana kati kati diawu Petelo ye Yowani, ye bakuayuvula: " munkia lendo, yevo mu nkumbu a nani lusadidi momo? ⁸ Kansi Petelo, wazala kua Mpeve a N'longo, wabavutula:" Bamfumu za n'kangu ye bakuluntu ba Isayeli, ⁹ kadi wunu tuyuvulu mu diambu dia vangu dia mbote divangamene mu muntu wuna yekimbevo, mpasi tuavova keti weyi kasasukidi, ¹⁰ luzaya dio beno bawonso, ye mpe bika n'kangu wa wonso wayeseli wazaya! yi mu nkumbu a Yesu Klisto, ndondo lua koma vana kulunsi, ye ndondo Nzambi kafuluza mu bafua, yi mu yani muntu ndondo wuna van'tuala eno kenena ye mavimpi ma lunga. ¹¹ Yesu yi tadi lualoza beno lutunganga, ye dia kituka dilutidi m'funu vana konko ¹² Kakuna ye mpulusu mu wan'kaka ko, kadi ku nsi antangu kakuna nkumbu ya n'kaka yavewa vakati kua bantu ko, mu yoyo beto tufuete vuluzilua. ¹³ Kiokio bamona lusiamusu lua Petelo ye Yowani, bayutukua, kadi bazaya vo bakala mu n'kangu bantu bakondua nzayilu; ye babasungamena kadi bakala ye Yesu. ¹⁴ Kansi kina vo bakala mona va ndambu awu muntu ndondo waniaka, kabalendu vutulako. ¹⁵ Bakubavayikisa kuna nganda ya mbazi a n'kanu, ye banuanisa mabanza bawu ye bawu, bavova : " we tu lenda sa mu bantu baba? ¹⁶ Kadi ditomene zakana kua n'kangu a wonso wa Yiseyeli vo sivi dimosi divangilu kua bantu baba, ka tulendi dio fidila kutu mpaka ko. ¹⁷ Kansi, kidi diambu kadi saki muangana vakati kua n'kangu ko, tubakanikina mu kingolo mu vovela diaka tuka wuwu nkumbu yoyo kua konso muntu." ¹⁸ Ye kiokio bakubabokela batoma kubakanikina mu vovela ye longela mu nkumbu ya Yesu. ¹⁹ Kansi Petelo ye Yowani babavutula: " lutoma banza beno mosi keti dina dia lunungu, va n'tuala Nzambi, mu kulutumamena ye kolamena Nzambi; ²⁰ Kadi katulendi lembi vovela mona tumuene ye tuwidi ko. ²¹ Ku nima kubakana diaka, bakubayambula, kadi kabazaya ko weyi bafuete kubavanina tumbu, kadi bawonso bakala kembela Nzambi mu momo maluaka. ²² Kadi muntu ndondo watambula luniakusu lua masivi wakala ye makumaya ma m'vu. ²³ Kunima yambulua, bayenda kua bayawu, bavova mawonso nganga za Nzambi ye bakuluntu bakubatela. ²⁴ Kiokio bakubawa, bawonso bazangula ndinga zawu kua Nzambi, ye bavova:" Mfumu, ngeye wavanga zulu, n'toto, m'bu ye biawonso bina mo, ²⁵ ngeye wavova mu nzila ya Mpeve a N'longo mu nua wa Se dieto, sadi kiaku Davidi: " mudiambu dia nki niungu niungu vakayi kua min'kangu, ye mabanza mampamba kua min'kangu?" " ²⁶ Mfumu za n'toto za tutelamena ye bana bawu bakotela Mfumu manenga ye kusua kiani. ²⁷ Kadi, Elode ye Ponso Pilatu bakangana muamu mbanza yiyi kintuadi ye zinsi ye n'kangu wa Isayeli mu kotela sadi kiaku kia velela yesu manenga, ndondo wakusa nge kibeni, ²⁸ mpasi bavanga mawonso koko kuaku ye kimfumu kiaku biakubika tuka ntama. ²⁹ Ye wuwu, Mfumu, tala makani wawu, ye vana vuvu kia sikalala kua sadi biaku mu longela diambu diaku, ³⁰ wubatula koko kuaku, mpasi baniakisa, basala masivi mu nkumbu ya sadi kiaku kia velela Yesu. ³¹ Kiokio basambila, fulu kiokio bakala bakutakana kia nikuka; bawonso bazalua kua Mpeve a N'longo, ye bakala longa diambu dia Nzambi mu vuvu kia wonso. ³² Mbidi ya bobo bakuikila bakala n'tima mosi ye muela mosi. Ka mosi ko wakala vova vo bima bibi biame, kansi biawonso biakala bia kintuadi bawu ye bawu. ³³ Zintumua bakala vana mu ngolo zawonso kimbangi kia mfulukulu a Mfumu Yesu. Ye n'lemvo wanene wakala ye bawu bawonso. ³⁴ Kadi va kati kuawu kava kala nsona ko: bawonso bakala ye zimpatu yevo ye zinzo bakala zo teka, ye nata mbongo batekela zo, ³⁵ ye batula zo vamalu ma zintumua, ye bakala zo kayisa kua muntu muntu landila nsatu zani. ³⁶ Yosefi, wavewa nkumbu yoyo kua zintumua Balanabasi, yisongela muana lusiamusu, n'kuna wa Levi, muisi Sipele, ³⁷ wateka mpatu ani, wanata mbongo, ye watula zo vana malu ma zintumua.