¹ Kunima lumbu tanu, Ananiasi ngudi ya nganga za Nambi waluaka, kintuadi ye bakuluntu ye kimpovela kimosi wakala ye nkumbu ya Tletule. Bafunda Polo kua Mfumu a zunga. ² Polo wabokelua ye Telutule wakala kun'funda, mu mpova ezi: ³ N'tinu wambote Felikisi, ngeye wukutu vananga luvuvamu luafuana, ye Nsi yiyi ya tambudi nsobolo ya m'funu mu nkubameno zaku za mbote; yimomo tubanzidi mu mawonso ye muawonso mu toma kubanzila. ⁴ kansi, mulembi kuvuandisa ntangu yanda, dodokolo bika wawa, mu n'tima aku wambote, tuna ye mafioti mavova . ⁵ Tumuene vo muntu ndondo wuna kipupa, wuta nata bantu ku mpambani vakati kua bayudayo ba nza yam'vimba, yani wuna mfumu ya fidibundu fia besi Nazaleti, ⁶ ye nkutu watenza vuadingisa nzo a Nzambi. Ye tuan'kanga. Tuazola kun'sambisa landila n'siku mieto. ⁷ Kansi kina vo n'sambisi Liziana waluaka, ye wan'katula mu moko meto mukingolo kibeni, ⁸ wavana luve kua m'fundi miani mu kuiza va n'tuala aku. Ngeye mosi, mu nzila ngiuvula zaku, lenda bakusa momo tutakum'fudila. ⁹ bayudayo bakota mpe mu m'fundu wowo, ye bakoma nsonso vo e mambu wuna mena. ¹⁰ kiokio mfumu ya zunga kakum'vana sinsu vo kavova, Polo wavutula: " kina nzeye vo mu mvula zayingi, ngeye wuna n'sambisi mu nsi yiyi, ngita baka mpova mu vuvu kiawonso vo mono ngita baka mpova mu kinuanina. ¹¹ Kavena nkutu lumbu kumi ye zola yiviokele ko, yakele kuna Yelusalemi mu kunda. ¹² Kabambuene mu zinzo za Nzambi yevo za tukutakanu, yevo muna mbanza ko, vo tutazonza ye muntu, yevo sosa nkutakani mu tunta n'kangu. ¹³ ye kabalendi songa kimbangi kia momo beta kumfudila wuwu ko. ¹⁴ Ngita dio tambudila kua ngeye vo mano n'sadilanga Nzambi ya Mase meto mu nzila yoyo beta bokelela vo Fidibundu, mu lukuikilu muna mawonso masonama muna min'siku ye muna mim'bikudi, ¹⁵ Ye yatula vuvu kiokio mu Nzambi, bonso batudila kio bawu kibeni, vo si vakala mfukulu ya balunungu ye bakondua lunungu. ¹⁶ Yidiodio n'sadilanga ngolo yakala muntangu zawonso ye kansansa kia kondua mbedoso kua Nzambi ye va n'tuala a bantu. ¹⁷ Kunima mvula za yingi za kondua kua kala yeno, ngizidi vana n'kayilu a nkenda kua Nsi ame, ye mu vana min'kayilu. ¹⁸ Yibosi bayuda ban'kaka besi Azia bambona yavelela muna nzo a Nzambi, kondua kua nkutakani ye vunguta. ¹⁹ Diakala kua bawu mu moneka kua mono ye kikitula m'fundi miame, vo bakala ye diambu diambi kua mono. ²⁰ Yevo, bika baba bavova keti nkia n'kanu a mponda banzengela, kiokio ya kala kuna mbazi a n'kanu a basanduki(Senhedrin), ²¹ wana nkutu vo kayi kaya kaka yasala kaya vakati kuawu ko: yi mudiambu dia mfulukulu a bafua mono nginina mu mfumdusu va n'tuala eno. ²² Felikisi, ndondo watoma zaya nadede mansueki ma bundu diodio, wabayambua wakavova: " kiokio m'fundisi Liziasi si keza, se yafimpa n'samu aku." ²³ Ye watuma kua mfumu a makesa kalunda Polo, mu kimpuanza fioti, ye mu kakidila vo kamosi nkutu ko mu bayani ban'sadisa. ²⁴ Kunima lumbu bia fiuma, Felikisi wayiza ye Dilusile, nkento ani , wakala muyuda, ye wabufisa Polo. Wan'yuvula mu matadidi minu kiani mu Klisto. ²⁵ kina vo Polo wakala vovelela mu momo matadidi lunungu, kukiyala, ye mu momo ma mfunsusu ya kuntuala, Felikisi, muluzakamu, wavova: " mu wuwu katuka vava, kiokio si yabaka mpuasikila, si yakubokela. ²⁶ Mu ntangu yoyo yakala ye ngindu vo Polo si kam'vana mbongo; mudiodio wantumisa nkumbu zayigi, mu mokena yani. ²⁷ mvula zole zaviokela mu mpila yoyo, ye Felikisi wavinganua kua Fesitusi. Mu zola muesa bayuda kiese, Felikisi wayambula Polo muna boloko.