¹ Kiokio Apolosi kakala kuna Kolinto,Polo, ku nima lutila muna zunga biawonso bia miongo bia Asia, waluaka kuna Efeso. Kiokio kakutana ye ndambu ya min'longoki, wabatela: " ² lua tambula Mpeve a N'longo, kiokio lua kuikila?" Bavutula:" katuawa nkutu vovela nkumbu ya Mpeve a n'longo ko." ³ Wavova:" nkia mbotama lua botatekua?" Bavutula: " mbotama ya Yowani." ⁴ Mudina Polo wavova: " Yowani waboteka mu kuma kia mviludilu a mavanga, wavova kua n'kangu mu kuikila kua ndondo wuta kuiza ku nima ani, disasidi, mu Yesu. ⁵ Mu m'vovo miomio, babotukua mu nkumbu a Mfumu Yesu. ⁶ Kiokio Polo kakuatula moko, Mpeve a N'longo ya kulumuka mu bawu, ye bavova mu zindinga ye bakala bikula. ⁷ Bakala kundambu za kumi ye zole dia bantu. ⁸ Kunima Polo wakota muna nzo a lukutakanu, muna wavova mu luvuvamu lua wonso. Mu ngonda tatu, wavovela mambu matadidi kimfumu kia Nzambi, ye wasiamisa bobo bakala kun'gua. ⁹ Kansi, kina vo ban'kaka bakala kaka ye n'tma mia kangama ye bakondua lukuikilu, babembola ndinga a Mfumu va meso ma n'kangu a wonso, Babasisa, bavambula balongoki, ye babalonga konso lumbu kuna sikola babokelelanga Tulanusi. ¹⁰ Diodio diavangama mvula zole, nate bawonso bakala vuanda kuna Asia, bayudayo, ye bangeleki, bawa mambu ma Mfumu. ¹¹ Ye Nzambi wavanganga masivi mangitukulu mu moko ma Polo, ¹² nate nkutu batulanga n'lele ye tenda bia n'lele biasimba nitu ani kua zimbevo, ye bimbevo ye mpeve za mbi za kala vayika. ¹³ Ndambu ya bankua min'kisi bayenda zietingi bateza sambidila bana bakala ye mpeve zambi mu nkumbu a Yesu, bavova: " yi kululombele mu nkumbu a Yesu ndondo Polo kalonganga!" ¹⁴ Bobo bakala sala momo bakala bana nsambuadi ba Seva, muyudayo, mosi mu banganga za Nzambi. ¹⁵ Mpeve ya mbi ya bavutula: " Nzeye Yesu, ye nzeye Polo yi nani, kansi ngeye wunani? ¹⁶ Ye muntu ndondo wakala ye mpeve ya mbi wakota mubawu, wabayala, ye wabavanga mpasi zayingi nate batina nzo yoyo kimuasi ye bavaluala. ¹⁷ Diodio diazayakana kua bayudayo bawonso ye kua ba ngeleki bawonso bavuandanga kuna Efeso, ye wonga wabavuata bawu bawonso, ye nkumbu ya Mfumu Yesu ya kembesua. ¹⁸ Bayingi mu bona bakuikila bayenda fungunanga ye vova mambu bavanga. ¹⁹ Ye ndambu mosi ya bobo basadilanga mavanga ma min'kisi, banata min'kanda miawu, bayoka mio va meso ma n'kangu a wonso: biawonso biakala muntalu nanga ya nkama ya ndisu za mbongo. ²⁰ Yi wowo mambu ma Mfumu ma kala tombokela mu lulendo ye ngolo. ²¹ Kunima manisa salu kuna Efeso, Polo wa baka lukanu mu zila ya Mpeve mu lutila kuna Makedonia ye Akayi mu nzila ya Yelusalemi, wavova: " ku ima kala koko, mfuete luaka mpe kuna Loma." ²² Polo wafila babole mu balongoki bani kuna Makedodia, Timoteo ye Elasite ndondo wan'sadisa. Kansi wasala yani mosi kuna Azia mu fintangu ntangu. ²³ Mu ntangu yoyo, kuna Efeso kua kala mpasi zanene mu kuma kia nzila. ²⁴ Muntu mosi wakala ye nkumbu ya Olefevele wabokeleluanga Demetiliyusi, m'vangi a biteke bia Diane bia ntalu beni , wakala nata n'sumbi miayingi kua mim'vangi mia biteke. ²⁵ Mudiodio wa kutakesa bisadi bia salu kiokio ye wavova: " Luzimpangi, luzeye vo mu n'samu wuwu tutabaka mbongo zayingi. ²⁶ Lutamona ye wa vo ka ku Efeso kaka ko, kansi nanga mu Asia dia m'vimba, Ndondo Polo watomene siamisa ye vilula bantu ba yingi. wuta vova vo kakuna nzambi yavangua mu moko ko. ²⁷ Kasalu kieto kaka ko kikotele mu vonza kia lembi kala diaka m'funu, Kansi mpe ye nzo a lusambulu ya Diana, nzambi ya nene, kayikala diaka m'funu ko. Ye mpe se kavidisa nene wandi, yani wuna wazangulua mu Azia ye mu nza ya m'vimba." ²⁸ Kiokio bawa mo, bazalua kua ngazi ye bakala kaya ye vova: " Wanene kena Diana dia Efeso." ²⁹ Mbanza yawonso yakota mu zengele zengele ye bantu bazawula kintuadi kuna kifuani fuani. Bakanga bakala zietanga ye Polo, Gayusi ye Alitilike, batuka ku Makedonia. ³⁰ Polo wazola kota vakati kua n'kangu, kansi min'longoki ban'sima. ³¹ Mudina, Bamfumu bamosi bazunga bakala bakundi ba Polo, bafila ntumua mu kun'tela vo kakoti mu kifuani fuani ko. ³² Fi kabu dia bantu mu n'kangu bakala kaya diambu dimosi, ye ban'kaka dia n'kaka, kadi n'kangu wakala mu zengele zengele. Ban'kaka kabazaya ko bila bakutakene. ³³ Bayudayo banata Alekizandele kua n'kaka ye n'kangu, man'tula va n'tuala a bantu. Alekizandele wakala sala bisinsu mu koko mu vana nsasulu kua n'kangu. ³⁴ Kansi kiokio babakusa vo wakala muyudayo, Bakaya bawonso mu ndinga mosi nanga hola zole: " Wanene kena Diana dia Efeso." ³⁵ Kiokio mfumu ya Mbanza kakulula nganzi za n'kangu, wavova: " Beno Bantu besi Efeso, nani kazeye ko vo Mbanza ya Efeso yina n'lundi ya nzo yatukutakanu ya Diane wanene ye fuani fuani kia sotoka tuka ku zulu? ³⁶ Wuwu kina vo mambu momo kamena nkutu m'funu ko, lududama ye kalusadi mu n'sualu n'sualu ko. ³⁷ Kadi lunete va n'tuala a kimfumu kiki bantu bobo ka bena mivi mia nzo a tusambulu ko, ka ban'tiaki mia nzambi eto ko, ³⁸ Mudiodio, vo Demeliusi ye m'vangi mia biteke mina yani bena ye m'fundu ye muntu, mbazi za n'kanu zina za zibuka ye n'sambisi mpe mina. Bika bafundasana. ³⁹ kansi vo luna ye diambu dia n'kaka ditadidi mambu man'kaka, sidia wizanena muna lukutakanu lua kubama. ⁴⁰ Kadi tulenda fundua vo tuna mim'vuni. Mvualangani yiyi kayina nkutu ye m'funu ko ye si tua kondua ngolo mu sasila yo. ⁴¹ Kiokio bavova wuna bavula n'kangu.