¹ Kunima mambu momo, Polo wasisa Atene ye wayenda kuna Kolinto. ² Kuna wawana ye musi yudayo mosi wakala ye nkumbu ya Akilasi, musi Ponto, watuka ka ntama yingi ko ku Italia kintuadi ye n'kento ani Pilisile, mudiambu dia ndomba ya n'tinu Klode kua Ayudayo awonso asisa mbanza ya Loma ye Polo wa yiza kua yawu. ³ Polo wazingilanga ye wasadilanga kintuadi ye yawu kadi alongoka salu kimosi. Akala m'vangi mia nzo za ngoto. ⁴ Polo wavovelanga muna nzo za tukutakanu konso kua lumbu kia lumingu. Watoma siamisa Ayudayo ye esi Geleki. ⁵ ansi kiokio Silasi ye Timote akulumuka tuka kuna Maseduani,Polo watumua kua Mpeve a N'longo muta kimbangi kua Ayudayo vo Yesu yi Klisto. ⁶ Kiokio Ayudayo atelamena dio ye an'finka, Polo wakubula n'lele miani ye wabavovesa:" Bika menga meno makala vana n'tu mieno, kina nkutu ye zitu dia ngielele yimosi mu yeno ko, wuwu ngiele kua apakanu." ⁷ kiokio kalutila kuna, wayenda kuna nzo a Tisi Yusitisu, muntu wakuikilanga mu Nzambi. Nzo ani yakala va mbela nzo a lukutakanu. ⁸ Klisipusi, mfumu a nzo alukutakanu, ye kanda diani akuikila mu Mfumu. Ndonga ya esi Kolinto awanga Polo, akuikila ye avubua. ⁹ Mfumu wavova kua Polo muna Mpimpa mu mona meso:" Kukadi ye wonga ko kansi vova, kukangi nua ko. ¹⁰ Kadi mono ngina yaku ye ka muntu nkutu ko lenda kuvanga mbi kadi ngina ye antu ayingi mu mbanza yiyi." ¹¹ polo wavuanda kuna, mu n'vu mosi ye ndambu, walonga mambu ma Nzambi vakati kuawu. ¹² Muntangu Gayoni kakala ngiadi a zunga kia Akayi, ayudayo awonso atelamena Polo ye annata kuna mbazi a n'kanu. ¹³ Avova:" Muntu yuyu wakuidisi n'kangu mu sambila Nzambi mu momo meta bela n'siku. ¹⁴ Polo wakala nsatu mu vova kiokio Gayoni kavova kua Ayudayo:" Ayudayo, vo diakala dia kondua ndungunu evo dia mponda, nga dina dia nduenga mu vova yeno. ¹⁵ Kasi wuwu kina vo ditadidi yuvu mu kuma kia mambu, ye nkumbu, ye n'siku eno, lukubika mo yeno kibeni. Kizolele kala m'fundisi wa mambu momo ko." ¹⁶ Gayoni wan'vayikisa mu nzo ya mbazi a n'kanu. ¹⁷ Mudina awonso atula moko mu Sositeni, mfumu ya nzo alukutakanu ye am'bufa va n'tuala mbazi a n'kanu. Kansi Gayoni ka kivana mu momo asalanga ko. ¹⁸ Polo, kiokio kasala ntangu ya nda ye a mpangi, wabasisa ye wasayuka ku silia kintuadi ye Plisila ye Akila , tekela ka katuka kuna sawu dia maza, wazengesa nsuki zani kuna sankelea kadi wa vana nsilulu yaki musi nazaleti. ¹⁹ Kiokio aluaka ku efeso, Polo wa sisa Plisila ye Akila kuna, kansi wazola yani mosi ka kota mu nzo a lukutakanu ye vovana ye Ayudayo. ²¹ Alomba kua polo mu kala yawu fi ntangu ntangu diaka, kazolako. ²⁰ kansi wabasisa , wavova:"singiza vutuki kua yeno vo Nzambi zolele dio ." wana wayenda ku Efeso. ²² kiokio Polo kaluaka kuna Sezale, watomboka ye wavana mbote kua dibundu dia Yelusalemi, wakulumuka diaka ku Antioka. ²³ Kunima lutisa ntangu kuna, Polo wayenda mu zuinga kia Ngalatiya ye kia Filingua ye wasiamisa n'longiki mia wonso. ²⁴ Yudayo mosi wakala ye nkumbu ya Apolo, musi Alekizandele watuka ku Efeso, yani wakala nkua lulendo mu mpova ye ngolo mu masonukua. ²⁵ Apolo wakala wa longoka mu malongi ma Mfumu. Wakala wazalua kua Mpeve, mpova zani zakala na dede mu mambu matadidi Yesu, kansi wazaya kaka mbotokolo ya Yoani. ²⁶ Apolo wayantika vova mu ludi kiawonso muna nzo a lukutakanu. Kansi kiokio Plisila ye Akila angua, ayenda kua yani ye kun'asila ²⁷ Kiokio kakala ye nsatu za lutila kuna Akayi, zimpangi bakun'siamisa ye basonekena min'longoki mia Akayi mpasi ban'tambula. ²⁸ Apolosi wanuanisa bayudayo va ntenda nkongolo mu lendo ye nzayilu yakala yani, mu toma songa, landila masonukua, vo Yesu yi Klisto.