¹ Dina dia mpasi beni mu kulu sonekena mu n'samu wa lusadusu lua vewa kua basantu. Ikuma, ² nzeye luzolo lueno lua mbote, lolo ngita kikembesa mubeno kua besi Makedonia, vo Akayi wuna wakubama tuka mvula yiviokele; ye vema kueno ku tomene susumuna ndonga ya nene. ³ Mfidisi zimpangi, mpasi vo matondo lutambudi mu salu kieto ka makadi ma mpamba ko mu n'samu wowo, ye luakala bakubama, bonso yavovele wo. ⁴ Kizolele ko, vo besi Makedonia bezidi yame ye ke bakuluwani luakubama ko, ye vuvu kiokio kia tubangumukina, mu lembi vova vo kia kulubangumukina. ⁵ Diodio ya muene dia m'funu vo ya teka fila ntete zimpangi kua beno, ye balandila mpaninu eno lua sila, mpasi yakala yakubama, ye yakala diambu dia maninu, kansi ka diawimi ko. ⁶ Luzayadio, nduna kunanga kiafioti, salanga mpe kia fioti, ye nduna kunanga biayingi salanga mpe biayingi. ⁷ Bika muntu muntu kavana bonso wuzengele n'tima ani, kondua kua kiadi yevo komekena; kadi Nzambi zolanga nduna vananga mu kiese. ⁸ Ye Nzambi lenda kufusa ye mpila tusakumunu tuwonso, mpasi vo wutatambu biawonso ntangu zawonso, lenda manisa nsatu zaku, ye wavua mpe biayingi mpasi wasala konso salu kia mbote, ⁹ bonso diasonama vo: watoma zibula n'tima ani, wavana kua bamputu; ndungi ani yisikilanga ntangu zawonso. ¹⁰ Nduna vananga mvuza kua n'kuni, ye dimpa muduambu dia madia mani, se kaluvana ye funisa mvuza, ye sika kudika m'butu mia ndungunu eno. ¹¹ Yi mpila yoyo si luavuamina mu bima biawonso mu konso n'kayilu wowo, muzila eto, si yavana matondo kua Nzambi. ¹² Kadi lusadisu lua n'kayilu wowo ka wumanisanga kaka nsatu za basantu ko, kansi wuna diaka nto ya nene ya matondo kua Nzambi. ¹³ Mu tambudila lusadisu lolo beta teza sadil a, beta kembesa Nzambi mudiambu dia ntumameno eno mu salu kia nsangu za Klisto, ye n'kayilu mieno mia bima kua bawu ye kua bantu bawonso. ¹⁴ Basambilangu kuayingi mukuma kieno, kadi batoma kuluzolanga mudiambu dia n'lemvo wanene luasadilu kua Nzambi. ¹⁵ Bika n'lemvo wavewa kua Nzambi mukuma kia n'kayilu ani kawu lendi vovoka ko.