¹ Wuwu kina vo tuta sala kintuadi, tu lulombele vo kalubaki n'lemvo wa Nzambi mu nkatu ko. ² Kadi yani wavova: " kio ntangu ya fuana, ya toma kululandila kibeni, ye mu lumbu kia mpulusu, ya kulusadisa." Tala, wuwu ntangu yi fueni, tala lumbu kia mpulusu yaku yi kiki. ³ Ka tutudidi va ntuala wumosi wumosi tadi dia ntela sakuba ko. Kadi ka tuzolele ko vo salu kieto kia vuezua. ⁴ Kansi nkutu, mu konso diambu, tuasadidi bonso sadi ya Nzambi ya kieleka, muna siaminia, muna kingongo kia n'tima, muna kiadi, muna ntontolo, muna zubua, ⁵ muna nkotolo a maboloko, muna fietakesua, muna salu ya ngolo, muna mpimpa za kodua leka, muna nzala, ⁶ muna kin'longo, muna nzayilu, muna mvibudulu, muna kiese, muna Mpeve a Nlongo, muna zola kua kieleka. ⁷ Tuna sadi yani mu mpova ya kieleka, mu lulendo lua Nzambi luna ye ya nduania ya lunungu mu koko kua lunene ye kua lumonso. ⁸ Tuta sala mu luzitu ye muna kondua kua luzitu, muna vuninua mambu ye muna sanisinua. Tufundulu vo tua ankua luvunu, kiongolo tuna ankua ludi. ⁹ Tuta sala bonso tulembolo zayua, kansi tutomene zayakana; bonso afua kansi tuna moyo, bonso tuatumbua mu kuma kia mavangu meto kansi kondua baka tumbu kia lufua. ¹⁰ Tuta sala bonso ankua kiadi kansi ntangu zawonso tuna mu kiese, bonso amputu kansi tuvuidi ya wonso. ¹¹ Esi Kolinto, tuakulutela kieleka kia wonso, ye n'tima eto wuna wa toma zibuka kua yeno. ¹² Ka yeto ko tua kanga e n'tima mieno, kansi yeno mosi lua kikulula mu nsatu zeno za n'suni. ¹³ Wuwu, mu mpovana za kieleka (ngita vova bonso kua wana fioti) lu toma zibula n'tima mieno. ¹⁴ Ka luki vuki ye balembi kuikila ko. Kadi, nkia mvukasani kilenda kala va kati kia singama ye kondua singama? Ye nkia kintuadi kina va kati kia n'temo ye tombe? ¹⁵ Nkia nguizani yi lenda kala vakati kia Yesu Klisto ye beliale? ¹⁶ Ye kintuadi kina va kati kia ndo wakuikila ye ndo wa lembi kuikuila? Nkia nguisani yina va kati kia nzo a Nzambi ye teke? Kadi tuna kin'longo kia Nzambi a moyo, bonso Nzambi kavova: " ¹⁷ Yidina, luvayika va kati kiawu ye luvambana " , wutele Nzambi. " ka lusimbi nkutu kani kima kia sumuka ko ye si yalutambula. ¹⁸ Si yakala Se kua yeno ye si lua kala yana ame a makala ye akento": wuvovele Mpungu tulendo.