¹ Mudina, mudiambu dia Yesu wamona mpasi mu kin'suni, luvuata mabanza mamosi; kadi konso yuna muene mpasi mu n'suni wakatuka mu masumu. ² Mudina, muntu wa mpila yoyo kazingilanga diaka mu nzinunu za bantu ko, kansi mu luzolo lua Nzambi mfumu a moyo. ³ Kadi ntangu yanda yiviokele mu sala luzolo lua kipakanu: nzinunu za n'suni, kinduvu kia malavu, mpambani,mpaka ye mambu ma tadidi nsambidilu a binzambi nzambi. ⁴ Bamonanga dio diakinzenza vo beno ka lukubalandanga ko mu mambu ma vilangesa, yidina bavovelanga mambi mu beno. ⁵ Banatanga mambu mawu kua yoyo wakubama mu sambisa bamoyo ye bafua. ⁶ Yi mu kuma kiokio mpe n'samu a mbote walongelua kua bafua, mpasi vo kana wuna kina vo ba sambisua mu kin'suni kiawu bonso bantu, bezingilanga bonso Nzambi mu kimpeve. ⁷ Nsukulu ya konso kima yifinamene. Mudina lukala luavelela mu kimpeve, ye luavelela muna mabanza meno munzila ya bisambu. ⁸ Lutila nkutu konso kima, beno ye beno lukala ye nzola ya sikalala, kadi nzola yi fukanga mbidi a masumu. ⁹ Lusalazananga beno ye beno kondua kua vunguta. ¹⁰ Wu kina vo konso muntu mu beno wabaka n'kayilu, lusadila wo mu salazana beno ye beno. Lusala mpila yiyi bonso n'lundi a mbote a n'kayilu miampila mu mpila mia ngovo mitukidi kua Nzambi. ¹¹ Vo muntu vovele,bika diakala bonso wuta vovela mpova za Nzambi; vo muntu wuta sadisa, ka sadila wo mu ngolo zozo zi kun'vananga Nzambi. Lusalanga mambu ma mpila yoyo mpasi vo nanga Nzambi ka sanisinua kua Yesu-Klisto. N'kembo ye lulendo kua Yesu-Klisto mu m'vu ya m'vu ya m'vu. Amen ¹² Bakiazolua, ka lukadi lua nzenza ko mu ntezolo ya tiya yita kulu yizila, bonso vo kima kia ngitukulu ki kulu luakidi. ¹³ Kansi, mpeleko mpila mpasi za Klisto wuta teza mona, luyangalala, mpasivo beno mpe lua yangalal mu ntangu n'kembo ani si wamoneka. ¹⁴ Vo lufingulu mu kuma kia nkumbu a Klisto, luna lua sakumunua, kadi Mpeve a n'kembo ye Mpeve a Nzambi yikundanga mu beno. ¹⁵ Kansi ka mosi ko mu beno ka mona mpasi bonso m'vondi, muivi, m'vangi a mambi yevo muntu kondolo mbumba. ¹⁶ Kansi, vo muntu wuta mona mpasi kadi wuna muklisto, kamuena dio nsoni ko; kansi kutu, bika kasanisina Nzambi mu nkumbu yoyo. ¹⁷ Kadi yi ntangu yiyi mbazi a n'kanu yi fuete yantikila muna nzo a Nzambi. Ye vo yiyantikidi kua beto, nki kilanda kua bau ka batambudilanga mambu ma Nzambi kue? ¹⁸ "Ye vo nkua lunungu vulukidi muna mpasi, wana bankuamambi ye bankua masumu bue si bakituke?" ¹⁹ Mudina, bika bana bamonanga mpasi mu luzolo lua Nzambi, bavana miela miawu kua m'vangi a nza, ye tatamana vanga mambote.