¹ Mu mpila yoyo, kua beno ba kento, lukala ku nsi a wisa kia makala meno. Lusa wo mpasi vo, kanele vo , makala man'kaka kaba tumamenanga mambu ma Nzambi ko, mu fu bia bakento bawu, si banungua kondua kua mpova; ² kadi si bamona kadilu biawu ye luzitu. ³ Bika diodio diavangama kondua kua mbonokono ya kumbazi: nsuki za kangua, bilunga bia wolo yevo min'lele mia mpila yampa. ⁴ Kansi, bika diavangamena ye muntu a muna kati kua n'tima, ye ntoko yi zingila ya Mpeve ya toma vuvama, dina dia ntalu beni va n'tuala Nzambi. ⁵ Kadi mu ntama yi mpila yoyo yakala mbonokono ya bakento bavelela. Bakala ye vuvu kiawu kua Nzambi ye bakala ku nsi a wisa kia makala mawu. ⁶ Yi mu mpila yoyo, Sala watumamenanga Tata Abalayama ye wam'bokelelanga mfumu ani. Wuwu luna bana bani, vo lusadidi ma mbote ye vo ka luna mona wonga wa mpasi ko. ⁷ Yi mpila mosi, beno mayakala, lufuete kala ye luzingu lua mbakusulu kua bakento beno, bonso wuna ye longa dia kondua ngolo, yi n'kento . Lufuete kubavananga luzitu bonso vingi a fua dia ntuadi dia n'kayilu a moyo. ⁸ Mu fokola, beno bawonso,lukala ye ngindu zi mosi, lusalazana, lukala ye nzola ya kimpangi, lukala ye nsatu a sadisa ban'kaka ye lukikulula. ⁹ Ka luvutula mambi mu mambi ko yevo fingu mu fingu ko. Kansi nkutu, lutatamana sakumuna kadi yi mu diodio lua bokelelua, mpasi lua tambula lusakumunu. ¹⁰ "Konso yuna bindamene mu zola luzingu ye mona lumbu bia mbote kafuete yambula vovela mambi ma ban'kaka ye losa luvunu lua wonso. ¹¹ Kakatuka mu nzila za wonso za mbi ye sala ma mbote. Kasosa luvuvamu ye kalandakana lo. ¹² Meso ma Nzambi mamonanga bankualunungu ye matu mani ma wanga ndombolo zawu. kansi ndose a Nzambi ka yiyangalelanga bobo basanga mambi ko." ¹³ Nani ndondo ku lusala mbi vo luzolele biobio bina bia lunungue? ¹⁴ Kansi vo lumuene mpasi mu diambu dia lunungu, luna luasakumunua. Ka lumoni wonga wa biobio bawu bamona wonga ko. Kalu kadi zengele zengele ko. ¹⁵ Kansi luzitisa Mfumu Klisto muna n'tima mieno. Lukalanga kaka luakubama muvana mvutu kua konso yuna kulu yuvula nkia kuma lunina ye vuvu muna Nzambie? Lusadila diadi mu wumpovi ye luzitu. ¹⁶ Lukala ye kanza kia n'tima kia mbote kidi bantu bafinganga luzingu lueno lua velela muna Klisto bafua nsoni kadi bakuluvovelanga mu mbi bonso vo luna ban'vangi a mambi. ¹⁷ Dilutidi wete, vo Nzambi zolele dio, luamona mpasi buluta vanga mambote kansi ka muntangu ya vanga mambi ko. ¹⁸ Klisto mpe wamona mpasi nkumbu mosi mu diambu dia masumu. Yani wuna walunungu wamona mpasi mu kuma kieto tuakala bakondua lunungu mu kutu nata kua Nzambi. Wavondua mu kin'suni kansi wafutumunua kua Mpeve. ¹⁹ Mukimpeve, wayenda ye walongela mpeve zina zina wuwu mu boloko. ²⁰ Bakala n'kolami muntangu luvibudulu lua Nzambi lua kala vingilanga lumbu bia Nowa, muntangu ya ntungulu ya nzaza ye Nzambi wavuluza fi kambi (miela nana) mu n'langu a maza. ²¹ Kiaki yi sinsu kia mbotokolo yita kuluvuluza mu wuwu ( Ka bonso mveleleso a ngivulu a n'suni ko, kansi bonso nsiamusu ya kanzanza kia mbote kua Nzambi) mu mfutumuka ya Yesu-Klisto. ²² Klisto yi lunene lua Nzambi. Wayenda kuna zulu. Mbasi za zulu, zi mfumu ye tulendo bifuete kala kunsi a wisa kiani.