¹ Tel li me nkel mu iku liyibil,bakuun ba ba baal ani ba bakad ne nsia mbwed ye liliel me,yin yi liel bini yin,yi likesel bini yin mbwun. ² Mu nsia mbwed yo yin yi li wel bini liguluk, kid ne bini li ishum bun bo li liel me bun,mbal nkim bini li nikwikil mu mpaam. ³ Munda iso me ake lilweng bun bo wel me: ⁴ Itsin masum ma bis Yesu a fhi bun bu ba swen mu manda ma Nziem,li ba mukes mu biko, ku ngwel a matsu ma tud nde Le futumuk bun bu ba swen. ⁵ Le fi ghan ko kel Cephas,ani ko kel ba kwim a bwel. ⁶ Le fi ghan si ko kel bad ilud minkam mi taan me ba baal ani me ba kad mu mbal mo,ba fhun mu nked a bo ake ba tal,baba nkim ake ba leel. ⁷ Kobun le fi ghan ko kel Jaque ku ngwel ko kel bo baso. ⁸ Ku ngwel a bo baso, le yi ghan ku nkel me amon ne Mwan wu tshu mu dum. ⁹ Munda me nkel mukyi mu ibwil ke ba longok bo baso,me nkwi we ne ba nzeme mu longok munda me ake dwis bad ba fhun mu libundu le Nziem. ¹⁰ Si mu lizol li Nziem, me ya ntwe bu nkel me bu,lizol li nde si ku nkel me li kele we lili mpam. Kobun me asele ngol ilud bo baso. ¹¹ Kid we ne me,si lizol li Nziem lili kele ani me. Kobun,ikala me to ban baba mo, tal ma lilongo bis ani ma likwikil bis. ¹² Tel li, kid ba kel mu imo ne Yesu ake afutumuk mu nked a ba fhu,isi nki bad baba mo mu nked a bini ba mo lufutumuk lo we? ¹³ Si kid ne lufutumuk le baba fhi lo we,liel ne Klistu afutumuk we. ¹⁴ Kid ne Klistu afutumuk we malong ma bis ma kel mama mpaam, likwikil lili bini si li kel lili mpaam. ¹⁵ Bis si li kel ba mbang ba bimpal ku nkul a Nziem, munda bis li ta imbang mu nkwum ye Nziem, mu iliel ne nde a mutisil Klistu ku lifhu, kyi nde akid we kobun. ¹⁶ Munda kid ne baba fhi ba futumuk we, Klistu si afutumuk we. ¹⁷ Kid ne Klistu afutumuk we,likwikil li bini li kel lili mpaam,li zinghe ti non-bu mu masum ma bini. ¹⁸ Kobun baba fhi munda Klistu, ba kel si ba bibil. ¹⁹ Si kid ne na mu lizing liso li lili shile mbwun ko kel Klistu,li kal bad baba lwidil munia mu ilud bad bo baso. ²⁰ Si tel lisi li,Klistu afutumuk mu lifhu,akel mud wo iso mu ifutuk mu bad baba fhi. ²¹ Bun bo yi lifhu mu nked a mud, mu nzil ye mud si ayi lufutumuk. ²² Bun bo kwed lifhu mu nzil ye Adam, bo baso ba fha, mu nzil ye Klistu bo baso ba fudu baba mwe. ²³ Kons mud mu mulwo nde; Klistu mud wo iso, ban baba kwikile ko kel nde,ba fudu mu lizing tel aya nde. ²⁴ Akoyan ikal nsuk, lefudul Klistu imfum ke Nziem ko kel Tad a nde Nziem, tel a man nde mu idus imfum kio iso ani ngol yoso. ²⁵ Munda nde Le bial ku ngwel a inied ba mbeen ba nde ku nsi makol ma nde. ²⁶ Mbeen a nde wo nsuk wo dus nde ikel lifhu. ²⁷ Munda nde ya si bio biso ku nsi makol ma nde. Si kid nde mwe ne; bio biso bi mu ywil,ikel kobun ne wo muwi imfum kin ne bilo bi mu ywil akel na nde. ²⁸ Tel a muywil bilo bio biso,kobun Yesu nde ngako akal kunsi ye mud wun wo muwi bilo bio biso, ku nsuk ne Nziem akal ilud bilo bio biso. ²⁹ Le ako yan, nki bi bwa ko kel ban baba wolo mbotik ko kel ban baba fhi? Kid ne baba fhi ba futumuk we, munda nki baba wa mbotik ko kel bo? ³⁰ Munda nki bis li kel tel lo liso mu ibad lifhu ³¹ Ba kuun ba ba baal ani ba bakad,bini ba likel likum li me, mu Yesu mfum a bis, me ndiel ne: Tsu lo liso,me ba nsi ku nkul a lifhu. ³² Lifud li me li kel nki, mu imud i me, kid ne me ake nween andi ba mbil ku Ephes, kid baba fhi ba futumuk we? Li dia,li nwa munda mushu li fhi-fha. ³³ Li kaan iku bifhud: Ba nduu ba bi ba bebese lizing li bwed ani bad. ³⁴ li ka kal lileen, lizing imbe-imbe! li ka sal masum. Munda bad baba mo ba muyeb we Nziem. Me ndiel munda iku ba wa nswen. ³⁵ Si mud mu mo afwul ne, baba fhi,ba futumuk isi nki? Nki nud bo ba yayo? ³⁶ Bini li yeb we nto ilo imo! Bilo likuno bini,bi fha we kid ne bio li bi men. ³⁷ Be kun nze, kel we ne nud itswu si libud li sel to libud linkim. ³⁸ Kungwele Nziem amu-wu wa nud bun bo zwel nde,mu kons muti nde amu wa nkwum a nde ye nde ngako. ³⁹ Musun nde so akel we ifa imo, wun musun wo bad, wu munke wo bambil, wun wo ba nwin, wun wo ba mbil ba madia. ⁴⁰ Ikel si ani nud ye inziem,ani nud ye imud. Si inkimi ikel andi likum le inziem, inkim andi likum le imud. ⁴¹ Ikel andi likum le tel, ikel andi likum le ngween andi likum le ba mpul-mwed, ansa mpul-mwed nsio nde ikala we ifa imo andi wu munkim. ⁴² Kobun,ikel ifa imo andi lufutumuk le bad baba fhi. Bin bi ba kwin,bi kwi mu ifha, si bin bi bi futumuk bi fha we. ⁴³ Ba bikuno mu ngieb si bi tswu mu likum, ba bikuno mu bibol si bi tswu mu ngol yo iso. ⁴⁴ Ba bikuno mu nud ye imud si bi tswu mu nud ye inziem. Kid ne ikel andi nud ye imud, ikel si andi nud ye inziem. ⁴⁵ Nsa mu mikaan ba swen,"Mud wo iso Adam le fudu mu lizing. Wo nsuk Adam le twe mu lizing le impev. ⁴⁶ Si wu kel mu impev wun, akel we mud wo iso,wu kel mu imud,wu kel mu impev a lwono ku ngwel. ⁴⁷ Mud wo iso wo kid Nziem ani maan, akel mud wo musun,wo ywele akel wo ku yul. ⁴⁸ Bun bu kel wun wu ba kid andi maan, afi si mu maan.Bun bu kel wun wo fi ku yul,akel amon ne baba kel ku yul. ⁴⁹ Ifa imo si bun bu libwed bis ifa ke imud, bun bu libwed bis ifa ke inziem. ⁵⁰ Yin yi mwe me ba kuun,musun ani makil ma kwi we mu ikod mu imfum ke Nziem.Kyib ikwi mu ikal ya mbel ye wini kyib. ⁵¹ Tal me ali liel liswekam limo: Bise baso lifha we si bise baso ba lisi-sob. ⁵² Mu mbal mo,ku need dis, mu ilolo ke nsuk. Ilolo ibi-bil, baba fhi ba fu-futumuk iwine masum, asi bis lisi-sob. ⁵³ Munda ikwin ne nud yi ye masum ito ye wine masum. Nud yi ye fha ito ye wun fha. ⁵⁴ Si tel lili kal ne nud ye fha a to ye win fha, yin ye fha li ito yin ye win fha, yan ya kuu manda man ma ba swen ne: Lifhu li mini mu ibyi. ⁵⁵ Lifhu,ibyi i nze akio? Lifhu mpel a nze ikel kun? ⁵⁶ Mpel ye lifhu ikel masum, ngol ye masum ikel ma nsik. ⁵⁷ Likum li kal ko kel Nziem wo liwa ibyi mu nzil ye mfum a bis Yesu Klistu. ⁵⁸ Kobun, bakuun ba me ba lizol li kal tin,li ka bwa, lisala na ma mbwed mu isal ke Nziem, li yaba ne isal i bini ikal we ke mpaam mu nzil ye mfum Nziem.