¹ Li luun mu ikal mu lizol, li kal andi ngol mu bisal be impev munda bini likwi mu ibikul. ² Munda wun wo mo mu minwa me impev, akiele we ko kel bad, si a liele ko kel Nziem, nto mud mumo ayaba we munda nde amo manda ma impev. ³ Si wun wo bikulo a liele ko kel bad munda iku ba wa ngol, inkes ani iku ba wa tin. ⁴ Wun wo mo mu minwa me impev, abi wa ngol nde ngako, si wun wo bikulo awa inkes ko kel bad bo baso baba sama mu Nzo-nziem. ⁵ Tel li me nzwel ne bine bo baso li mo mu minwa me impev, si ilwidil ne bini li bikul.Wun wo bikulo wun, mulwid wun wo mo mu minwa me impev si kid ani wo bud liele ma ibini mu manda ma mo mud wo liele mu minwa me impev, Nzo-nziem li ikwe ku nkul. ⁶ Ba kuun ba ba baal ani ba bakad, kid ne me aya ko kel bini mu imo mu manda ma impev, bi lisemes munkim kid ne manda man bini li mayeb we? Nda ye maken, nda ye ibikul to ye ilong. ⁷ Kid ne bilo bi wine mwe bi sa iliel amon ne: nsiom, ikul-tod to izza, iliel i bo ikel we ifa imo,iso nki ba yab ne nki ilo ba kel mu ibed? ⁸ Munda kid mvil-a-mvil bil,ako yan mud ndeso le yab ne tel likwi,na nde wun wo kisi ne ayilam mu ikwe ku mangwil? ⁹ Kobun ikel ifa imo ani bini kid ne likel mu ilong manda mama kel ne bad ba maybe we,bad ba yab isinki nki manda ma likel mu imo bini? Bini li mu mo a bini si bad ba li yab we. ¹⁰ Mu ntod yoso,minwa mi kel mi fhun,si kons munwa akel ani ntendul a nde. ¹¹ Si kid ne munwa wun wo mo mud me muyebe we,me le to amon ne munzis, nde si wo ya mo nde Le shal amon munzis ku nkel me. ¹² Ifa imo munda bini, munda bini li kel imba-imba mu bisal be impev, likal ani ngol munda li kwe ku nkul mu bisal be libund. ¹³ Wun wo sama mu minwa me impev, asam munda nde ayab nki mio nde a mwen. ¹⁴ Munda kid me nkel mu isal mu minwa me impev,mpev a me si ikel mu isaam, mayel ma me li ma shal mbel mo. ¹⁵ Me asa isi nki? Li me abu saam mu impev i me ani mu maken ma me.Me abu yim si mu impev i me ani mu mayel ma me. ¹⁶ Kid ne lo,bini li kel mu isaam na mu impev,isi ban ba kwimin ne: "Ame" mu iwine iyab ne nki mio bini li kel mu imo? ¹⁷ Ibini ne bini li kel mu iwa makab ma bwed si wu munkim akel ngol ilo we. ¹⁸ Me awa likum ko kel Nziem munda me amo mu minwa me impev ilud bine baso. ¹⁹ Si mu nked a Nzo-nziem, me nzwel mo bilo bi taan be mfun munda mu iwa ba kwen ngol ya mbel ni mo me mu minwa minkam-minkam me impev. ²⁰ Bakuun ba ba baal ani ba ba kad li ka kal baan ba kyi mu iwakan i bini; si mu mambi likal amon ne baan ba kyi si mu mantiemen ma bini makal ma ikwud. ²¹ Mu ma nsig ba swen ne: Mu nzil ye bad ba nkim ani mu minwa me bad ba nkim,me aba liliel ko kel bad ba, si bo ba nzwil we, bo liel Yesu. ²² Si kid ne li tel ku ibwed, minwa me impev mi kel idiim ke bad baba wine kwikile si ke bad baba kwikile, si ibikul ikel idiim ke bad baba kwikile si ka ke bad baba wine kwikile we. ²³ Nto li tal-nto li tal, kid ne Nzo-nziem yo iso bad ba mo mu minwa me impev, baba kel ku nzil ani baba wine likwikil ba liel we ne bad bana ba biel lel? ²⁴ Si kid ne li kel mu ibikul bine baso,mud wo ku nzil to wo wine likwikil ikod, aku kwikil mu mio miso me mon nde, ba lisemes mun min mio miso me mwen nde. ²⁵ Mama kel ku mukil ande le mutisil ku nzil, ansa ya nkul mabwu, le saam Nziem,le kisi ne ibini Nziem a kel andi bini. ²⁶ Tel liso li ba sa nki, bakuun ba babaal ani ba bakad? Mu tel livuno bini kons mud akel andi isham, andi malong andi ngwel andi mpev a Nziem to maken ma itendul. Li sal mio miso munda ne Nzo nziem ikwe ku nkul. ²⁷ Kid ne mud mumo amo mu munwa wo impev, si kid ne ikel andi bad bwel to ba tud to ba fhun ba mo mumo-mumo,mud munkim akal mu itendul mama mo bo. ²⁸ Si kid ne nto mud mumo wu kwi mu itendul nde we,nde le kal pii mu Nzo nziem,amo ko kel nde ngako ani ko kel Nziem. ²⁹ Kid ba mbikudi bwel to ba tud ba kel mu imo, ban bo baso ba ywil mu maken mo maso manda ma ba mo bo. ³⁰ Kid ne mumo mu nked a ban baba bwi-nsi azwi nteel, wun Wu kel mu imo,le yesel mu imo. ³¹ Munda kons mud mu nked a bini kwi mu ibikul mu tel li nde munda kons mud a wol maken,akal si ani miaman. ³² Munda mpev ye ba mbikud, ba mbikud si ba ilwinine. ³³ Munda Nziem akel we wo maghan-maghan si wo ngemb. ³⁴ Bun bu kel mu manzo-nziem mo maso ma ba santu, bakad ba kwi we mu imo munda baba wi we nzil mu imo, si ba kal ku nsi bun bu mwe ma nsig. ³⁵ Kid ne ba kwin mu iyab ilo imo,bo baluum nzil ko kel balim ba bo ku nzo. Munda ikel lizid we mukad mu imo mu Nzo-nziem. ³⁶ Nki nda nziem ifi ko kel bini? Nki,yo iyi na munda bini bad ba mo? ³⁷ Kid ne mud mumo abi yab ne nde akel mbikudi to akel mpev, abi yab ne bilo nswen me bi,bikel ma nsig ma Nziem. ³⁸ Si kid ne mud mumo djimin,ba mudji-djimin mpe. ³⁹ Kobun ba kuun ba ba baal ani ba bakad,lizol ngol makab ma ibikul,li matswi mud mu imo mu minwa me impev. ⁴⁰ Si mio miso mi our mu pii ani ikal mu nzil-a-nzil.