¹ Tel le bu mu imo me mu minwa mi bad to me ba wanzio, si kid ne me lizol ilo we, me nkel amon ne likwa lili ko sa libil, to amon ne ighwo-ghwo. ² Tel azwa me nteel ye imon manda, ani iyab manda mo maso mama sweme, ani tel azwa me likwikil le ikiele mibyi,kid ne me lizol ilo we, me nkel ilo mpaam. ³ Tel awa me bilo bi me bio biso ko kel ba mbwa, Nsa me biwi nud a me ne ba ntsu mbaa, kid ne lizol lo we, ikel mpaam. ⁴ Lizol likel ikas mbwun ani mbwun a mbwed, lizol likel we mu izol bilo be bakween ani ikal lileen, li kel we ani iku bisu to ani inka-ngol. ⁵ Li zolo we mu ikal na lo,li kala we ani mpud, asa we manda ma bi ku mbwun. ⁶ Kid ne bad ba lwine we manda mu nzila-nzil, lizol likala we mu isse si nde aseme kid ne bad ba luun masong. ⁷ Lizol li lololo bilo bio biso, a kwikile mu bio biso, asa mbwun mu bilo bio biso, akasa mbwun mu bilo bio biso. ⁸ Lizol li wa we. Nteel iwu-wa, manda matsu-tsu, iyab ilu-lud. ⁹ Munda bis li yaba ndaam, li bikulo si ndaam. ¹⁰ Si le ya manda ma Nziem, mama win kuu man mami-mini. ¹¹ Tel akele me muki, me amwe amon ne mwan a mpee, me atiemen amon ne mwan a mpee, mantiemen ma kele ma bikyi. Tel ntwe me mukwud bilo bio biso be bikyi me li biso mu libee. ¹² Kobun bis limono mu nked a indyil mu mpil ye lipyib, tel li bis li bi mon ighan-mis.Tel li me ya nzieb ndaam, si li me ayab mo maso bun bu ba nzieb me. ¹³ Si tel li bilo bi tud bi,bikala mu ikas mbwun, mu likwikil ani mu lizol. Si ilo ilwidil mu bio biso bi tud bi ikel lizol.