¹ Ŋkɔnɔntɔ gan nu bé:" Enutsɛ wo nyi nyawoa? ² Etienne ȡoŋtsi ni be:" Ŋsuwo, fofonyɛ kudo étɔnyɛwo, mi ȡotoŋ: Ŋtsi kɔkɔɛ o Mawu tsi ȡé yiȡokui fia mia tɔ Abraham gatsimɛ yi lé Mézopomia, kéŋgbɔxué yava tsi Sharran; toni be: ³ Kplɔ tɔwo wo nɛ na djo lé éduo mɛ, nɛ na yi édu tsi na dasa nɔn o mɛ. ⁴ Exɔn mɛa, édjo le Shaldéenwo duɔmɛ vɛ yi tsi Sharran; étɔlɔ o ku yomɛa, Mawu kplɔɛ yi daȡo éȡu tsimɛ milé fifɛa. ⁵ Ŋȡé sɔ énu nɔ̂amɛsi ȡé nio, ŋȡé ni fitsi yi la da afɔwo ȡo ŋtɔ tsâo. Vɔa é fian adjɔgbé ni, ȡo étsi Abraham ŋȡé ȡo évi o wa, be yé la ni édutsɛ sigbé énu nɔ̂amɛsi nɛnɛ, yiŋtɔ kudo yio xomɛ tsi la va va. ⁶ Mawu nuni bé," djidjimɛ viwo o la nɔn agbé lé amɛdjro nyingbandji, wo la zun kânumɔn, yi o la do fũnyan fũnyan nɔn wo sɔ na éxué kavétakpo téxué nɛ. ⁷ Yi nyɛyɛ na ȡo kodjo nɛ dukɔntsɛ tsimɛ wo la nyi kluvi léa, Mawu yi nu nɛnɛ, yi étsɛ godoa na, wo la djo lé xɔn. Yi wo sunmɔn lé téxué xɔn. ⁸ Yi i sɔ évo soso o zoȡuȡu sɔna Abraham, gatsimɛ Abraham dji Izaki, é so évo ni lé ŋkéké amɛnyi gôa gbé; Izaki va dji Yakɔbu, yi Yakɔbu va dji tɔgbi wuivéɛwo. ⁹ Tɔgbiɛwo houanŋ ȡo Josɛfu ŋtsi yi wo sɔɛ sa nɛ wa kplɔɛ djoyi Ejipto, Mawu nɔn kudui, ¹⁰ yi i hluín lé funkpékpéwo mɛ, é sɔ yayra kudo énunyan sɔ ni lé faraɔ̂, Ejipto o fiɔ o ŋmɛ. Faraɔ̂ sɔɛ sɔ wa Ejipto kudo yio xué bliboɔ o kplɔla ¹¹ Adɔwuamɛ kudo ayaȡuȡu ganȡé va kɔȡo Ejipto kudo Kana nyigban dji, ŋȡuȡu ȡékpékpi ȡé va lé mia tɔwo si o. ¹² Etsi Yakɔbu sé be blé le Ejiptoa, é dɔ mia tɔgbio ȡoȡa tsutsugbantɔ. ¹³ Zévégɔ̂a jozɛfu ȡé yiȡokui fia nɔnviɛwo; yi Faraɔn tsan djési Jozɛfu o xomɛ. ¹⁴ Jozɛfu dɔ nɔnviɛwo ȡoȡa étɔa Jakɔdu, be yiku-kudo yio xomɛtɔwo nɛ va Ejipto, wo kéŋkéŋ o hɛnhlɛnmɛ la nɔn amɛ katakpo tsi wo. ¹⁵ Nɛnɛ yi Jakɔbu géȡo Ejipto o nyigbandji; fitsi yi kudo mia tɔwo kutsi. ¹⁶ O kɔwo va yi Sishɛm, aftsi o vɛ ȡi wo ȡo, lé yɔdo tsi Abraham sɔ klosalo sɔ xulé lé Hamor o viwo si lé Sishɛm ¹⁷ Gatsimɛ adjɔgbé tsi Mawu fian nɛ Abraham la kpɔ émɛ vava, dukɔ̂a kékéta yigbé dji ȡo édji kpi lé Ejipto, ¹⁸ kaka va sin gatsimɛ éfiɔ bu va zéta lé Ejipto, éfiɔ xɔn ŋȡe djési Jozɛfuo. ¹⁹ Efiɔtsɛ blé dukɔ̂a yi i do funyâfunyâ nɛ dukɔ̂a, éȡéha wo, nɛ wo gbétɛnŋ nɔn agbéo. ²⁰ Lé ŋkéké xɔn wo mɛa, o dji Moyizi; édjɔȡékadjɛ lé Mawu o ŋmɛ yi o kpɔ édji na wétri amɛtɔn lé étɔlɔ o xomɛ. ²¹ Etsi o ȡitoa, Faraɔn o vi nyɔ̂nu xɔɛ yi i hín sigbé yiŋtɔ o vi nɛnɛ. ²² Okplanu Moyizi kuȡo Ejipto tɔwo nunyânyâ ŋtsi; yi i sɛnŋ lé yio nuxo kudo yio dɔwawao mɛ. ²³ Etsi iȡo éxué amɛkaa, éva susumɛ ni be yavɛ dji yénɔnvi Izraɛl viwo kpɔ. ²⁴ Nɛ ékpɔ wo lé funyafunya doɔ nɛ Izraɛlvi ȡéa, Moyizi hluín ni yi i xonɔn Ejiptotɔa a sɔ ȡéhlɔn: ²⁵ Exɔnɔnsé be yé nɔnviɛ la nyi be to yedjia Mawu la hluín wo, vɔa wo ŋȡé mɔ̂nu djé mɛo. ²⁶ Lé ŋkégbéa, é tété gogo Izraɛlviȡéo tsi we lé adjréwaɔ; édjagbagba bé ya ȡawo; étonɔn wo be: " Ðékadjɛo, nɔnvi mi nyiɛn; ŋȡé ŋtsi mi lé édji biɔ do mianɔ̂nuiwo? ²⁷ Vɔa amɛtsi lé adandji ȡo nɔnviɛ ŋtsia tutui yi nuni be: Mɛȡé yi ȡo éfiɔ ku kodjo ȡotɔ ȡo mianu? ²⁸ Ðéyi odji la wuŋ sigbé létsi o wu Ejiptotɔa ésɔ nɛnɛa? ³⁰ Tsi Moyizi sé ényɔntsɛa, ésidjo vɛ zun amɛdjro lé Madian nyigbandji, aftsi i nɔn yi dji évi amɛvé. ²⁹ Lé éxué amɛka godoa, atsikplɛtɔ ȡé zé ni lé Sinayato o zogbé dji, lé ézo bibi o aȡé mɛ. ³¹ Tsi Moisi kpɔ ézoa, ȡéȡéfia tsi zé lé émɛa kpatsɛ; étsimɛ i zɔn gogui be ya trɔkpɔɛ nyuiȡéa, Mawu o gbé ȡi ȡo tomɛ ni be: ³² "Enyɛ yi nyi étɔwo o Mawu, Abraham o Mawu, Izaki kudo Jakɔbu o Mawu."Moizi hunhun gégégé yi ŋȡé tɛnŋ kɔ ŋmɛ yi édio. ³³ Axuétɔ to ni bé: " Ðé tsokotawo o, ȡo nɔnxué tsɛa anyigban kɔkɔɛ yi i nyi. ³⁴ Ŋkpɔ dukɔn tsinyɛ tsi lé Ejiptoa o ayaȡuȡu; ŋsé o alénana yi ŋȡi va be ma va hluɛn wo gan; fifia yi, ŋdɔo ȡoȡa Ejipto" ³⁵ Moizi tsi wo gbé, gatsimɛ yiinu bé: "Mɛȡé yi ȡo éfiɔ alo kodjo ȡotɔ? Yi i nyi amɛtsi Mawu ȡɔ ȡoȡa sigbé éfiɔ alo amɛ hluɛngâtɔ nɛnɛ. Mawu ȡɔɛ ȡoȡa to tsikplɛtɔ tsi zé nɛ Moizi lé gbémɛ dji. ³⁶ Moizi kplɔwo to lé Ejipto, lé djési, ŋdandonu wawamɛ lé Ejipto, lé axu djíɛ dji kudo lé zogbédji sɔ na éxué amɛka. ³⁷ Moizi tsɛ ké yi to nɛ Izraɛl dukɔn be: " Mawu la na yi ényɔ̂nudaȡɛtɔ sigbé énynɛ nɛnɛ la sité lé mia nɔnviwo domɛ nɛ mi". ³⁸ Yi i nyi amɛtsi nɔn éhalɔ domɛ lé zogbédji ku tsikplɛtɔ tsi xonuxo nɛ Moizi lé Sinai o to kɔkɔlɔ dji. Ŋsutsɛ nɔn anyi ku mia tɔwo; Yi i xɔ agbé nyɔn tsi nyi miatɔa va nɛ mi. ³⁹ Amɛtsi mia tɔwo gbé tonu séséna; wo ȡo asi hɔndomɛ ni yi wo trɔ yi Ejipto lé wo djio mɛ. ⁴⁰ Lé gaxɔnmɛa wo tonɛ Arɔn bé: Nami mawu tsi la kplɔmia. Ðo mi ŋȡé nyan nutsi lé vavaɔ nɛ Moizi tsɛ tsi kplɔ mi to lé Ejipto o. ⁴¹ Wo li légba lé ényivi o nɔ̂nɔ̂mɛ mɛ, wo savɔ ni yi wo kpɔ djidjɔɛ so o alɔnudɔwo ŋtsi. ⁴² Mawu trɔ ŋgbé do wo yi sɔ wo do asi nɛ djiŋkusi o ahuakɔnwo; sigbé létsi o ŋlui ȡo nyɔ̂nudaȡɛtɔ wo womamɛ. Izraɛl xuédo, ȡé yi mi sɔ énu wuwuwo kudo vɔsa nuwo naŋ lé éxué ka mɛ shɔnŋ lé zogbédjia? ⁴³ Mi xɔ Molosh o zava, kudo mawu Remfan o wuétrivi, nɔ̂nɔ̂mɛ tata tsiwo mi wa nɛ mia donugu na: Yiŋtsia, na kɔ mi yi daȡo kaka Babilɔna o godo. ⁴⁴ Mia tɔwo xɔ zava tsɛ sigbé ȡasé ȡuȡu nɛnɛ lé zogbédji, sɔ zɔn ȡo létsi Mawu ȡifia gatsimɛ i xonuxo nɛ Moizi, nɛ ya trɔ tɛ sɔ zɔnȡo nɔ̂nɔ̂mɛ tsi i kpɔa dji. ⁴⁵ Zava tsɛ yi mia tɔwo kudo Josué wo hɛn ȡo asi lé wo mɔn zɔnzɔn mɛ va ȡo dukɔn tsi o Mawu nya lé woŋtɔwo nyigbandji yi sɔ mia tɔwo daȡo va sɛn David o ŋkékéwo dji, ⁴⁶ yɛ tsi kpɔ Mawu o amɛnuvévé; yi i biɔ be wa tu nɔnxué ȡé nɛ Yakɔbu o Mawuɔ. ⁴⁷ Vɔa Salomɔn tu xɔ nɛ Mawu. ⁴⁸ Ðékpékpi tsi i nyia, djiŋkusi tɔa ŋȡé nɔ̂nɔ̂ axué tsi o sɔ alɔ tu mɛ o; sigbé létsi nyɔ̂nudaȡɛ lɔ nui bé: ⁴⁹ Djiŋkusi nyi yio fiɔzikpi, yi anyigban nyi yio afɔȡodjinu. Axuétɔ nu be: axué ŋȡé ŋmɛ yi mi la tɛŋ tu nuŋ? Alo fiȡé yi la nyi gbɔnȡomɛ xué tsinyɛ? ⁵⁰ Alo ŋȡé alɔ tsinyɛ yi wa énutsɛwo kéŋ o wa? ⁵¹ Miamɛtsiwo ékɔ lia na, édji kudo éto sɛŋ na woa, mi djé agla ȡo gbɔngbɔn kɔkɔɛa ŋtsi; mi lé énu waɔ sigbé létsi mia tɔwo wa va yi nɛnɛ. ⁵² Enyɔ̂nudaȡɛtɔ tsiŋȡé yi mia tɔwo bufɔn o? wo wu o djéŋkɔ nɛ amɛdjɔdjɔɛ lɔ o vava; amɛtsi mi trɔzun amɛ satɔ kudo amɛ wutɔ na, ⁵³ miɔwo tsi xɔ ésé tsinɛ atsikplɛtɔwo ȡo daȡɛ, vɔ yi miŋȡé lé dɔȡɛowa." ⁵⁴ Etsimɛ éha nunɔnlawo sé ényɔn tsɛwoa, wo bi dji, yi wo ȡu aȡuklui ȡo Etiɛnu ŋtsi. ⁵⁵ Vɔa, yɛ tsi ȡɔ kudo gbɔngbɔn kɔkuɛa, hin ŋkuvi ȡo édji, yi kpɔ Mawu o gan nyínyí; ékpɔ Yésu nɔnté lé Mawu o ȡusi mɛ. ⁵⁶ Etiɛnu nu bé: Mi kpɔȡa. ŋkpɔ djiŋkusi hun, yi agbétɔ o viɛ lété lé Mawu o ȡusi mɛ. ⁵⁷ Eha ŋkɔ nɔntɔwo do axua ganȡé, tu wo to wo i wo do axua ȡo éta ni; ⁵⁸ wo kplɔɛ to lé éduɔ mɛ yi wo xo kpi: ȡasé ȡutɔwo ȡé énutsi wo do o kɔȡo ȡékadjɛ ȡé tsi o yɔnɔn be Saul o afɔgɔnmɛ. ⁵⁹ Gatsimɛ wo lé ékpé xoɔ Etsiɛnua, élé ékui fâɔ yɔ axuétɔ lé nunuɔ bé: Axuétɔ Yésu, xɔ gbɔngbɔn tsinyɛ. ⁶⁰ E djéklo, dogbéȡa sinsínȡé be: Axuétɔ, ŋgbé ȡo étéxué nɔn wo. Tsi i nu ényɔntsɛ vɔa, é ȡo alɔn mɛ