¹ Saul kpɔ djidjɔɛ so Etsiɛnu wuwu ŋtsi. Nɛnɛ yi tamɛ sinsin ȡo Mawu ha tsi lé Yéruzalɛm djé gɔnmɛ; yi xɔsé tɔwo kankan ȡo judéa kudo samaria nyigban dji, ényɔ̂nudaȡɛ tɔwo kpo yi ŋȡé lé wo mɛo. ² Amɛ vɔn Mawu wo yi ȡi Etsiɛnu lé alé nana ganȡé mɛ. ³ Saul djagla ȡo Mawu ha ŋtsi; é ȡisa to axué o mɛ, ȡé ŋsu ku nyɔ̂nu wo to vɛ kɔȡo gakpamɛ. ⁴ Xɔsétɔ tsi wo ŋtsi o sɛn tamɛ ȡo wo djémɔn lé Mawu nyɔn nuɔ lé yiyiɔ. ⁵ Filipo géȡo Samaria dumɛ yi ȡégbéfan so kristo ŋtsi. ⁶ Etsi amɛwo sé, yi wo kpɔ djésinu tsi waɔ yi Filipo léa, wo ȡotui. ⁷ Amɛtsiwo mɛ gbɔngbɔn vuin léa o kpɔ éka tutu, yi gbɔngbɔn lɔ wo lé totoɔ, lé axua doɔ; amɛ kplibɔwo ku kpotinnɔ̂ wo tsan kpɔ dɔyɔyɔ. ⁸ Yi djidjɔɛ kpɔkpɔ ganȡé nɔn éduɔ mɛ. ⁹ Ŋsuȡé tsi o yɔnɔn bé Simɔn, wanɔn madjiki lé ŋkéké tsi wo va yi o mɛ; yio nuwawa o kpanɔntsa Samariatɔwo, yi i sɔ yiȡokui wanɔn amɛgan. ¹⁰ Samaria tɔwo, so ȡévi kaka va kɔȡo amɛganxo wo dji nani bubu; wo nunɔn be: " Ŋsu tsɛ ȡo Mawu o ŋsɛn, amɛtsi o nyikɔ yi nyi amɛgan" ¹¹ Wo ȡonɔn tui, ȡo yio madjiki wawa kpanɔntsa amɛwo. ¹² Vɔa amɛsiamɛ xɔ Filipo o nyɔn nunu sɔ kuȡo Mawu o fiɔȡuxué kudo Yésu Kristo o nyikɔ ŋtsi dji sé, yi ŋsutsan, nyɔ̂nutsan wo xɔ nyɔ̂nyrɔ̂. ¹³ Yi Simɔn ŋtɔ tsan xɔsé; yi étsimɛ i xɔ nyɔ̂nyrɔ̂, ŋȡé gbé djo lé Filipo ŋtsio, yi tsinɛ i lé djésido kudo ŋdandonu wo kpɔwɔa, é tsaka. ¹⁴ Etsi apotri tsi wué lé Yéruzalɛm o sé bé Samariatɔwo xɔ Mawu nyɔ̂a, wo ȡo Piyɛ kudo Ejan ȡoȡa wo. ¹⁵ Etsi wo vɛ ȡoa, wo dogbéȡa ȡo ta nɔn wo, nɛ wa tɛnŋ xɔ gbɔngbɔn kokuɛ. ¹⁶ Ðo ŋȡé ȡiȡo amɛȡé dji lé wodomɛo; Nyɔ̂nyrɔ̂ kpo wo xɔ lé axuétɔ Yésu o nyikɔmɛ. ¹⁷ Exɔ̂a Piyɛ kudo Ejan ȡo alɔ éta nɔn wo, yi wo xɔ gbɔngbɔn kɔkuɛ. ¹⁸ Etsi Simɔn kpɔ be amɛwo lé gbɔngbɔn kɔkuɛ xɔɔ to alɔ ȡota nɛ amɛ mɛa, é sɔ éga nawo. ¹⁹ Yi i nu bé, " mi na nyɛtsan ŋsɛn xɔn, nɛ to alɔ ȡota nɛ amɛwo mɛa, ma na gbɔngbɔn kɔkuɛ." ²⁰ Vɔa Piyɛ ȡoŋtsi ni bé: " Woŋtɔ kudo égawo mi la tsrɔn, ȡo o bu be yéla tɛnŋ sɔ éga a sɔ xlué Mawu o nunana. ²¹ Enu nana alo adjɔ ȡé ŋȡé lé ényɔn tsɛ mɛ nɔn wo, ȡo lé Mawu ŋkɔa, édjio ŋȡé kɔ. ²² Trɔ lé édji vuɛnȡi tɔwo xɔn mɛ, fankui yi na yɔ axuétɔ nɛ ȡohian ya sɔ édjro vuɛnȡi xɔn o agɔ sɔ kéo. ²³ Ðo ŋkpɔ be o lé aȡi vuɛnȡi ȡé kudo nuvuí o bablamɛ. ²⁴ Simɔn ȡoŋtsi nɔn wo bé: " Mi dogbéȡa nɛ Axuétɔ ȡo éta nun, nɛ énu tsi mi nu tsɛo o ȡé ŋgbé djɔ ȡo djinyɛo." ²⁵ Etsi Piyɛ kudo Ejan o ȡu ȡasé yi wo xonuxo so Mawu o nyɔn ŋtsia, wo trɔ yi Yéruzalɛm; lé émɔn djia, wo djra aŋɛn nyuín lé Samaria o du sugbɔ mɛ. ²⁶ Axuétɔ o tsikplɛtɔ xonuxo nɛ Piyɛ be: " Sité nɛ na yi émɔn tsi so Yéruzalɛm va yi Gaza o wézéxué." ( émɔn xɔn nyi zogbé.) ²⁷ E sité yi i yi. Kpɔȡa, Etiopia ŋsu ȡé lé émɔn lɔ dji, ŋsu tsi o ta, tsi nyi Etiopia tɔwo o nyɔnufiɔ Kandake o ŋsɛntɔ, amɛtsi kpɔnɔn yio gawo dji. E va Yéruzalɛm, a va dogbé ȡa. ²⁸ E trɔ lédjodjoɔ, yi i lé anyinɔ̂nɔ̂ lé ahuawa kékévimɛ lé énu hlẽɔ lé ényɔ̂nudaȡɛtɔ Izaya o woma mɛ. ²⁹ Gbɔ̂gbɔ̂a xonuxo nɛ Filipo: "zon gogo ahuawa kékéɛ." ³⁰ Exɔ̂a, Filipo sidu yi ahuawa kékéviɛ gbɔ, é sé Etiopia ŋsuɔ lé énu hlẽɔ lé ényɔ̂nudaȡɛtɔ Izaya o woma mɛ, yi i toni be: "O sé énutsi hlẽɔ o léɛ gɔnmɛa?" ³¹ Etiopia ŋsuɔ ȡoŋtsi ni be: "Lé na wa asé égɔnmɛ nɛ amɛȡé ŋȡé kpéȡo ŋtsinyɛo?" Ekpé Filipo bénɛva nɔn anyi lé yégbɔ lé ahuawakékéɛmɛ. ³² Ŋɔnŋlɔn lɔ o akpa tsi hlẽɔ Etiopitɔ lɔ léa yiké: Sigbé alin nɛnɛa, o kplɔɛ yi élan saxué; Yi sigbé alinvi tsi ȡoaȡa lé amɛtsi lé éfun kpaɔni o kɔnmɛ nɛnɛa, ŋȡé kénuo. ³³ Lé yio bɔbɔɛ nyi-nyi mɛa, o so kodjo ni. Yio djidjimɛ viwo ȡé, mɛȡé yi la tu éka nɔn wo? Ðo o ȡé yio agbé ȡa lé anyigbandji. ³⁴ Ŋsu tata biɔ Filipo sé bé: " ŋȡékuku séa, mɛȡéŋtsi yi ényɔ̂nudaȡɛtɔlɔ lé nuxo xoɔ so? Yiŋtɔ ŋtsia, alo so amɛbu ŋtsi?" ³⁵ Filipo ȡoŋtsi ni, tɔdji Izaya o ŋɔnŋlɔn o akpaȡé dji, yi i xonuxo ni kuȡo Yésu o aŋɛn nyuiɛ ŋtsi ³⁶ Etsi wo lé yiyiɔ, wo vɛ ȡo ési xaxa ȡé to; Ŋsu tata nu bé: " Kpɔȡa, ési lé fiɛ; ŋȡé yi la xémɔn nɛ axɔn nyɔ̂nyrɔ̂?" ³⁷ Yi Filipo to ni be nɛ o xɔɛsé kudo édji bliboa, éxɔ̂a ké o ȡémɔn nɔn. Yi i xɔgbé ni bé: "ŋ xɔɛsé be Yésu Kristo yi nyi Mawu viɛ." ³⁸ Etiopia ŋsua ȡégbé bé wa nɔnté ahuawakékéɛ, yi wo géȡo ésiɛmɛ, Filipo kudo ŋsu tatalɔ; yi Filipo nyrui. ³⁹ Tsi wo to lé ésiɛ mɛa, Axuétɔ o gbɔngbɔn kɔ filipo djo, yi ŋsu tata lɔ ŋȡé gbé lé kpɔkpɔɔ o, vɔa élé djidjuɛ kpɔ lé yio mɔn zɔnzɔn mɛ. ⁴⁰ Vɔa Filipo vɛ kɔȡo Azot. Elé ésa ȡiɔ lé aŋɛ nyiɛ doɔ lé dukɔ̂a mɛ kaka yi Sézaria.