¹ Vɔa ŋsuȡé tsi o yɔnɔn be Ananias, kudo asiɛ, wo sa wo nunɔ̂amɛsi o akpaȡé, ² yi wo ȡé lé éga lɔ ŋtsi daȡɛ ( asiɛ gnan) yi wo sɔ kpɔtɔɛ va daȡo apotriɛwo afɔgɔnmɛ. ³ Vɔa Pierre nu be:" Ananias, ŋȡéŋtsi Satana ȡɔ édji nɔn nɛnɛ yi kaka o va lé nusu kâɔ nɛ gbɔngbɔn kɔkɔɛ yi sɔ anynigban tsi osa o ga o akpaȡé wla? ⁴ Nɛ ŋȡe sɛowa, ȡé ŋȡa kpɔtɔ nyi tɔwowa? yitsan tsi o sɛa, ȡe égalɔ ŋȡe nyi tɔwowa? Ŋȡe yi nan yi o susu énu ninnintɔ lé édji tɔwo mɛ? Ŋȡé kânusu nɛ agbétɔwo vɔa nɛ Mawu. ⁵ Etsi Ananias sé ényɔntsɛwoa, édjé anyi yi so hunnn. Amɛtsiwo keŋkeŋ sé énutsɛ tsi djɔa ȡɔ kudo vɔnvɔn. ⁶ Ðékadjɛwo va, wo blɛ ȡo éȡo mɛ, yi wo kɔɛ vɛ ȡi. ⁷ Gaxoxo amɛtɔn godoa, asiɛ va kɔȡɛ, yi ŋȡé nyan énutsi djɔ va yio. ⁸ Pierre biɔsé be:" Ŋyɔ̂nu, égatsi mi sa anyigban lɛ xɔ̂a? éȡoŋtsi be:" Ɛn, éga xɔn yɔ." ⁹ Exɔ̂a Pierre nuni be:" lé yiwa yi lé gbéȡodu mɛa mi té Mawu o gbɔngbɔn kpɔ? Amɛtsiwo ȡi asuo lété lé éhɔnlɔdji, yi wo la kplɔoyi." ¹⁰ Zéȡéka édjé anyí djafɔgɔnmɛ ni, yi so hunn, yi étsi ȡékadjɛlɔwo trɔva, wo kpɔɛ kuku; wo kɔɛ vɛ ȡi ȡo asuɔ gbɔ. ¹¹ Vɔnvɔn ganȡé djé hamɛ dji, amɛtsiwo keŋkeŋ sé ényɔntsɛwo tsan dji. ¹² Apotriɛwo wa djési kudo ŋdandonu sugbɔ lé dukɔ̂a domɛ. Wo keŋkeŋ lédu lé Salomɔn o kpatalɔ mɛ. ¹³ Vɔa djido ŋȡé lé amɛȡési bé ya tété gogo wo; gankéa, dukɔ̂a ȡo lɔnlɔn ganȡé nɛ apotriɛwo ¹⁴ Xɔsétɔ gbogboȡéo, ŋsu kudo nyɔ̂nuwo sɔ wo gbé na Axuétɔ, ¹⁵ aléa be wo kɔ dɔnɔnwo ȡo batsi alo aba dji sɔva somɔn, lé ŋȡo mɛ be nɛ Pierre va lé yiyiɔ yo vɔnvɔnlí nɛdjé wo domɛtɔ ȡéo dji. ¹⁶ Dukɔn tsiwo trɔdo Jéruzalɛm mɛ tɔ sugbɔ wo tsan va, yi wo kplɔ dɔnɔn wo kudo amɛtsiwo lé gbɔngbɔn vuɛn wo ŋsɛn mɛo va, yi wo keŋ kpɔ dɔyɔyɔ. ¹⁷ Vɔa hũnɔngan sité, yi amɛtsio kplɔɛdo wo (Saduka o gbɔngbɔn hamɛ tɔwo); yi wo ȡɔ kudo ŋhuan ¹⁸ yi wo lé apotriɛwo do éduɔlɔ o gakpamɛ ¹⁹ Lé ézan mɛa, Axuétɔ o tsikplɛtɔ ȡé va hun gakpa o gbo wo, ȡéwoto yi tonɔn be:" ²⁰ Mi yi, nɛ mia nɔnté lé gbédoȡa xɔamɛ, mi xo xixé tsɛmɛ nuxowo keŋkeŋ nɛ dukɔ̂a." ²¹ Etsi wo sé ényɔn tsɛa, wo géȡo gbédoȡa xɔamɛ le fɔnfɔnmɛ yi wo tɔnu fiafia amɛwo. Vɔa avɔsatɔ wo mɛgan, kudo yio ŋtsimɛwo xoxu Izraɛl o amɛsínsínwo, yi wo biɔ be wa yi kplɔ apotri tsiwo lé gamɛ va. ²² Vɔa sɔdja tsi o dɔdoȡa wo ŋȡé kpɔwo lé gakpa mɛo, yi wo trɔgbɔ va ȡogbé: ²³ " Mi kpɔ gakpa lé tutu kudo aȡaŋ, édji kpɔtɔwo lété lé éhɔ̂a dji, vɔa tsi mi huía, mi ŋȡé kpɔ amɛȡé lé émɛo." ²⁴ Etsi gbédoȡaxɔ dji kpɔtɔ o mɛgan kudo hũnɔngan wo sé ényɔn tsɛ woa, wo tsi djodjodjoé lé wonɔ̂nuio mɛ sɔ kuȡo énu tsi la va djɔ lé égodo. ²⁵ Vɔa amɛȡé va kɔȡɛ yi to nɔn bé:" Ŋsutsɛwo tsi mi lédo gakpamɛa, wo lé gbédoȡa xɔmɛ yi wo lé énufiaɔ dukɔ̂a." ²⁶ Exɔ̂a gakpadjikpɔtɔ o mɛgan kudo yio sɔdja wo, vɛ kplɔwo blɛwu va, ȡo wolé vɔ̂vɔ̂ɔ be dukɔ̂a la va xokpé yéo. ²⁷ Etsi wo kplɔ wo va, osɔ wo ȡo kodjoȡotɔwo ŋkɔ. Yi ŋkɔnɔntɔgan biɔwosé, ²⁸ lé nunuɔbé:" Mi dosé nɛ mi sinsínȡé bé mi ŋgbé fianu lé nyikɔ xɔn mɛo, gankéa, mi kankan mia nufiafia ȡo Jéruzalɛm, yi mi lé djidjiɔ la kɔ ŋsutsɛ o hun ȡo miadji. ²⁹ Vɔa Pierre kudo apotriɛwo ȡoŋtsi nɔn wo be:"Mi ȡo la sɔ bubu na Mawu wu agbétɔ." ³⁰ Miatɔ wo mawu fɔn Yésu, amɛtsi mi ka ȡo atsi soga dji, yi wui. ³¹ Mawu kɔɛ ȡodji ȡo yio ȡusimɛ nɛ ya nyi éfiɔvi kudo hluingantɔ, tsi la hɛn djimɛ trɔtrɔ kudo nuvuin wo sɔsɔké vanɛ Izraɛl. ³² Mi nyi ȡasé ȡutɔ nɛ énutsɛwo kuxo gbɔngbɔn kɔkɔɛ tsi Mawu na amɛtsiwo ȡonɔn sisi ni wo ³³ Etsi kodjoȡotɔwo sé ényɔntsɛa, wo bidji yi wo ȡui be yéwa wu apotriɛwo. ³⁴ Vɔa Fariziatɔ tsi o yɔnɔn be Gamaliɛl, ésé fiatɔ, amɛtsi dukɔ̂a kéŋkéŋ ȡo bubu na, sité yi ȡégbé be wo nɛ ȡé apotriɛwo to lé ȡaba xoxomɛ. ³⁵ E to nɔn wo be, " Izraɛl tɔwo, mi kpɔ nyuiȡé lé énutsi mi lé djidjiɔ la wa nɛ mɛtsɛwo. ³⁶ Gaxoxo ȡéo kéa, Tédas sité yi ȡégbéfan be yé nyi amɛȡé, yi amɛ sigbé hɛnhlɛnmɛ kavétakpo téxué nɛ xoxu ȡoŋtsi. Wo wui, yi amɛtsiwo kpɔɛdowo, kankan trɔzũ énu maȡinu. ³⁷ Ŋsutsɛ yomɛ, lé amɛ hɛnhlɛn gamɛa, Yuda Galiléatɔ dɔn amɛȡéwo ȡo yiȡokui ŋtsi yi wo kpɔɛdo. Yitsan tsrɔn, yi amɛtsiwo kplɔɛ dowo kankan ³⁸ Fifiɛa, ŋlé nunuɔ nɔn mi, mi tétéyi lé amɛtsɛwo ŋtsi, yi mia ȡasiwo lé woŋtsi, ȡo nɛ ȡoȡotsɛ alo tamɛ susu tsɛ so agbétɔwo gbɔa éla gblé. ³⁹ Vɔa nɛ wo wanao so Mawu gbɔa, mi ŋȡa tɛŋ ȡu wodjio; mi la va kpɔɛ bé yéwo lé aȡika doɔ kudo Mawu". Wo va sé égɔnmɛ. ⁴⁰ Wo ȡé apotiɛwo to, xo wo yi dosé nɔn o be wo ŋgbégbé xonuxo ȡo Yésu o nyikɔmɛo, wo ȡé asi lé woŋtsi yi wo djo. ⁴¹ Wo to lé kodjo ȡoxuɛ kudo djidjuɛ be wo xo busu nuxowo ȡo yéwoŋtsi ȡo éta. ⁴² Yi gbésiagbéa, lé gbédoȡa xɔmɛ, lé axuéwo mɛa wo ŋȡé nɔnté énu fiafia kudo nuxo xoxo so kristo ŋtsio.